2 Kɔr. 7 - Tampulma

¹ Mu bi daŋnɛ, sɛm nama ya vɔwi naa o fun vɔu a nyɛ ya. Ma nyɛ ya chaksi ya titi, chen ni ya zi yisi doŋau a li ya bara awa ya bambe ni a ta. Ma nyɛ ya kpaŋi saha maga hali a wa peti a ya tu chaan tima, domi ya nyɛ Koosa wa jirima.

Ma Nyɛ Mu Tuha Sɔɔni A La Gali Saha Maga

² Ma chasi ma tusa a nyɛ ya. Ya ha wa tum tum tagna a nyɛ nandigi ni. Ya ha wa di nandigi koo a mur ba.

³ Ya wara sɛm nannɛ a nyɛ ma di ya na ma galimsa. Ya funɛ piin ŋɔ mau di ya daŋni mau kinkan. Ya nyɛnɛɛ koo ya sitɛɛ, ma zi vɛɛn nyɛn ya bambe niu.

⁴ Ya se su ma kinkan, domi ma waa ya ya jirima nara. Ma kpami ya a li ya namsi maga ni, chen ni ya tusa zi sɔɔniu a la gali saha maga.

⁵ Ya funɛ wa tel Masɛdonia pulum, ya wa fun koti a hiisi. Doonani maga ya yaa fun burgi, ya yaa na namsiu. Nidamata yaa funɛ muksi yau kinkan. Chendaha tu chɔk yaa fun su ya tusau,

⁶ amaa Koosa naa la belimi ninamsɛ chen, waa funɛ tum Taitus di o wa kpami ya.

⁷ Ya tusa funɛ sɔɔniu ya na un chen a nu o laaboor chenani ma fun a kpami un. O fun ŋɔ ya di maa daŋni ma na minu kinkan, awa chenani ma tusa chɔk domi muksi naa ma kpa du min chen daha. O gbanko funɛ ŋɔ yau di lalaknɔ ma se sɛrɛu di ma tiŋ ya biksi ti. O funɛ ŋɔ ya o laaboor ti peti, ya tusa fun sɔɔni kinkan a kaali o te tel ti ni.

⁸ Mu tuha funɛ chɔk kinkan a li tɔn naa mu fun te sɔbi a nyɛ ma chen ni, amaa mu funɛ nu di ma tusa wa chɔk vusi, chen fun bu ya min tu sɔɔna.

⁹ Chenani mu fun chɔk ma tusa wa fun nyɛ mu tuha sɔɔni, amaa chenani ma gil ma tum tagna a bur a tiŋ Koosa nyɛ o sɔɔniu. Chenani ma tusa fun chɔk sɔɔni Koosa tuha gbankou.

¹⁰ Chenani ma tusa fun chɔk nyɛ ma gil ma tum tagna a bur a tiŋ un. Ya ya chen, wuzu digi o zi kotiu a yisi ya a li ya tum tagna ni hali a wa peti. O wa ya kin naa ya zi vɛ. Naa vɛ nyɛ Koosa chɔk o tuha, wuzu digi Koosa zi wa na o galimsau a ta un yɔri.

¹¹ Domi ma waa funɛ nyɛ Koosa chɔk ma tusa, ma se sɛrɛu di ma kɔɔri ma sɔna a bu kɔɔri wi naa kaɛɛ. Ma daŋni di ma bu na ya kinkan a kpak un ma bambe ni di ma lɛrgi naa la tum tum tagin diŋna. Tum naa maga ma fun tum, ya wa na ma galimsa.

¹² Ya funɛ sɔbi tɔn tiu di ya suŋi naa funɛ tum tum tagin ti awa naa funɛ la tum tagin ti. Ya gbanko funɛ sɔbi chen ni di Koosa biksi ma chenani ma daŋni ya. Nan kaali kin naa balɛ na maga.

¹³ Ma waa funɛ kpami ya kinkan a sɔɔni ya tusa. Taitus funɛ ŋɔ ya chenani ma kpami un, ya tusa fun sɔɔni a kaali chenani a fun te sɔɔni.

¹⁴ Taitus funɛ li bar nɔ di o wa ma wati, ya funɛ ŋɔ unu di ma ya ya jirima narawa. Ma wa fun nyɛ ya na hiisa. Ya ha vɛɛn a sɛm sɛm wutɛwa a nyɛ ma. Chen vɛɛna, chenani ya fun ŋɔ Taitus ni, chen ya wutirɛ.

¹⁵ O lisi chenani ma fun la un a du a kpa ma titi a nyɛ un a saksi di ma tiŋ o nɔ. Lalaknɔ oo daŋni mau a gbaari chen daha.

¹⁶ Mu tuha sɔɔnɛu kinkan di mu se su ma a chi nan.