2 Kɔr. 6 - Tampulma

¹ Min, Timoti awa Koosa lagmi a tum o tuma. Chendaha ya sumi ma di ma kpa chenani Koosa fun suŋi ma a tum tuma a nyɛ un.

² Ba funɛ sɔbiu a li o sɛm tɔn ti ni saha digi di o ŋɔ, “Mu saha werire ma fun kpa wa mu wati di mu nu ma ta. Mu funɛ na nyinbaan di mu yisi ma a li ma tum tagna ni, mu funɛ suŋi mau.” Ma cheŋi ma diŋsa a nu chenani ya kaa sɛm ma. Koosa saha weri ti nyɛnu lalaknɔ. O pɔu di o yisi nara a li ba tum tagna ni ba tiŋ un.

³ Ya wara daŋni nandigi nyini ya tuma a na ya galimsa. Chendaha ya doso di ya ta wa tum wu digi a tɔ nara nyinbaanasa.

⁴ Ya tum maga yaa biksi nara di ya ya Koosa tumtumsiwa. Ba namsi yau kinkan, amaa ya di ya namsiu wa kanyita ni.

⁵ Ba yaa fun tuksi yau a tɔ ya dɛ. Tɔhɔn dami yaa funɛ li ya nɛɛ. Ya yaa funɛ tumu hali a wa gbarigi a gil ya diwe awa ya do.

⁶ Chenani ya ya bambi chaanɛ tima a zim Koosa nɛnɛ a kpak kanyita wa nara ni a ya jɛrgɛ tima, a kpak o siim weri ti a li ya bambe ni a la daŋni ya dɔŋtima wa tu bɛgim ni,

⁷ a la biksi nara wa wuti a li Koosa kpok ti ni, a nama maga biksi nara di ya ya o tumtumsiwa. Ya chi lanjimasiwa. Koosa nyɛ ya tum tum were a nyɛ un, chen ni ya zi koti a yo ya dɔmau a kok ya titi.

⁸ Nara nyɛ ya jirimarɛ aa nyɛ ya na hiisa. Ba pɛgi yau a la pini ya zoma. Ya sɛm sɛm wutɛu, amaa ba ŋɔ di ya ya nusun timwa.

⁹ Ya wa ya nibin zene, amaa nara maga zim ya wɛu. Ya chi nibin sitɛwa, amaa ya ka ha vɛɛn kpak miisau. Ba nyɛ ya na namsiu kinkan, amaa ba ha wa kpu ya.

¹⁰ Ya tusa yaa chɔku a bu sɔɔni kinkan. Ya ya fara timwa, amaa ya suŋi nidamatau kinkan di ba wa zim Koosa. Nibinsa lisi di ya wa kpak kundɔŋ, amaa ya waa ka dɔ kina maga.

¹¹ Ma Kɔrint tima, wu digi wa ka mu vɛ sɔbi a du tɔn nɔ ni. Ya chasi ya tusau a nyɛ ma.

¹² Ma ka wa chasi ma tusa a nyɛ ya.

¹³ Ya daŋni ya ŋɔ mau lalaknɔ a chi ma ya ya bisa. Ma biksi ya di maa daŋni yau a chi chenani yaa daŋni ma. Ma gbanko ka chasi ma tusa a nyɛ ya.

Ma Ta Nyɛ Ma Wa Ba Naa Yaa Jɛɛmi Vursa Lagmi

¹⁴ Ma wa ba naa se vɛ su Koosa, ta lagmi a tum tuma. Tum tagna awa tum were wa kilagmi dɔŋ ni. Dusum wa nha wa kilagmi dɔŋ ni.

¹⁵ Kristo awa sintana kikoti a ya nɔ bɛgimuu? Nara se su Koosa awa nara se vɛ su Koosa kikoti a ya nɔ bɛgimuu?

¹⁶ Ya chi Koosa naa nyɛn, damnɛ. Ya chi chen, yɛrɛ ya wa vursa kaa ya nyɛn? Ba funɛ sɔbiu a li Koosa sɛm tɔn ti ni di o ŋɔ, “Mu wa mu nara zi nyɛnu a lagmi aa val. Min la zi ya ba Koosa.”

¹⁷ O gbanko fun ŋɔ, “Ma waligi ma titi a li ba naa la jɛɛmi vursa ni, chen ni ma wa zi bu gbaŋsi a kina. Ma ya chen, mu titi zi la ma a duu.

¹⁸ Mu zi ya ma nyanau, ka ma kiya mu bisa. Mu waa, Koosa, naa kpak kina maga kpok, ŋɔ nan.”