2 Kɔr. 5 - Tampulma

¹ Ya bara chi lɛwa naa nibinsa kɔɔrirɛ. A wa chɔk, Koosa zi kpa ya kaali o tɔhɔn tiu a la nyɛ ya bara falɛ naa o titi naami chenu. Ya zi kpak au hali saha naa vɛ kpak bɔ.

² Lalaknɔ ya wiu a la daŋni Koosa zer ya kinkan a la o tɔhɔn ti a la nyɛ ya o bar falɛ ta dooni.

³ O wa ya chen, ya siimsa wa zi pɔɔgi bara.

⁴ Ya lalaknɔ bara naa chi lɛwa chen, a nyɛ ya na namsirɛ. Ya wara daŋni ya ta ya lalaknɔ bara lalaga, amaa ya kpak unu ya bambe ni di Koosa zi kpa o bara falɛ tau a nyɛ ya a chiŋi a bar chiŋɛ ni. O ya chen, ya lalaknɔ bara a naa sitɛɛ, zi burgi o bara falɛu. A waa kpak miisa naa vɛ kpak bɔ.

⁵ Koosa fun naami ya di ya la o bara falɛ na. O funɛ kpa o siim weri ti a nyɛ ya di o ya o purigiri bɔɔli di o sir zi ya chenu.

⁶ Chendaha ya kpak tu sɔɔna saha maga. Ya zimu di ya nyɛn lalaknɔ nan, ya ha wa kikoti a chiŋi ya kunyan ti suwachak ni.

⁷ Ya wa na ya se ni chenani Koosa zi tum, amaa ya se su di chenani o ŋɔ chen, zi wa ya wutiu.

⁸ Ya tusa sɔɔnɛu kinkan. Ya wa kpak hansura di ya sou. Chen yɛɛ, ya zi la dugli ya kunyan tiu.

⁹ Ya nyɛn bar nɔ koo ya duglɛ un a li Koosa tɔhɔn ti ni, o lawa ya kpak unu ya bambe ni o ya Koosa wa tu sɔɔna.

¹⁰ Ya wa siti, ya maga zi la Kristo suwachaku di o di ya sɛria. Chenani ya fun a tum tum were koo tum tagna a li ya lalaknɔ bara ni, chene o zi wa bɔ ya chim.

Koosa Daŋni O Wa Nara Maga Bu Ya Nɔ Bɛgim

¹¹ Domi ya ɔm ya kunyan tiu, chendaha muu daŋni mu biksi ma di yaa tum Koosa tuma wa wutirɛ. Waa zim di ya tum o tuma wutirɛ. Mu si su di ma gbanko zi tum chenu.

¹² Ya wa bur a daŋni sɔna a nyɛ ya titi ni. Ya waa ka la nyɛ ma nyinbaan di ya ya ma jirima tima, chen ni ma zi kotiu a sɛm ba naa la nyini nibinsa se ni a vɛ nyini ba bambe ni.

¹³ Ya la sɛm nan, ma bɔnɛ baa di yaa zu galɛŋwaa? Ya zuɛɛ, ya daŋni ya nyɛ Koosa wa jirimarɛ daha. Ma bɔnɛ baa di ya kpak alaafɛuu? Ya kpakɛɛ, o ya ma daharɛ.

¹⁴ Yesu Kristo daŋni yau kinkan. Ya zimu di waa chiŋɛ nara maga bar chiŋɛ ni a sou ba daha. O la daŋni ya chen daha, ya se sɛrɛu di ya tum o tuma.

¹⁵ O funɛ sou chene, chen ni ba naa la o mi fali ti wa zi bu tiŋ ba titi tutɔ, amaa ba zi tiŋ unu naa funɛ sou a si o sou ni ba daha.

¹⁶ Chendaha ya wara bur a di nibinsa sɛria a chi tɛɛnɛ nɔ tim maga. Ya funɛ di Kristo sɛria chene, amaa lalaknɔ ya wa bur a di un.

¹⁷ Nara burgi tiŋ Yesu Kristo, Koosa ya chɛrgi ba bambe a ya kifalɛ. Ba gantɛl tu kina wɛ wa bu toli.

¹⁸ Kin nama magawa Koosa fun ya nyɛ ya. Yesu Kristo siwi daha, Koosa wa ya fun bu ya nɔ bɛgim a daŋni ya la ŋɔ nara ni o wɛ, chen ni o wa ba gbanko zi bu ya nɔ bɛgimu.

¹⁹ Kristo siwi ti daha, Koosa fun na nyinbaan a nyɛ o wa nara maga bu ya nɔ bɛgim, chen ni o wa zi bu lisi ba tum tagna wɛ. Laaboor weri nɔwa o fun kpa du ya nisa ni di ya biksi nara.

²⁰ Yesu Kristo funɛ tum ya ma wati, chen ni Koosa zi kotiu a sɛm sɛma a nyɛ ma. Ya sumi mau Yesu Kristo daha di ma wa Koosa ya nɔ bɛgim a peti.

²¹ Yesu Kristo funɛ nyɛn tɛɛnɛ nɔ maga ni, o wa fun tum tum tagna hali tama, amaa Koosa funɛ kpa ya tum tagnau a du o nin ni. Domi ya wa Yesu Kristo ya nibɛgimnɛ lalaknɔ, Koosa wa zi bu na ya galimsa o wati.