2 Kɔr. 3 - Tampulma

Koosa Wa Ya Fun Bu Ya Nɔ Bɛgim

¹ Ya bu a zer ya titirɛ ma suwachak nii? Nibiksɛ ba naa na nyɔɔra a li ba biksi ni kpa tɔnawa a nyɛ ma, chen ni ma zi zim chenani ba duu. Ba wa li, ba zi bukoo la tɔnau ma wati a kaali bar digi. Ya chi ba warɛɛ?

² Aai. Ya wara daŋni ya kpa tɔna a nyɛ ma. Chenani maa zim a tiŋ Koosa mu biksi daha biksi nara maga di Koosa sir tum min.

³ Koosa naa nyɛnɛɛ funɛ kpa o siim weri ti a du ma ni. Chendaha ma chi Kristo tɔn naa ya fun sɔbi chene. Chenani Koosa ya nyɛ ma kaali chenani o fun sɔbi o chiksɛ ta a sak buŋkula ni a nyɛ Mosis saha digi chen.

⁴ Ya se su Koosa Kristo daha. Chendaha ya ŋɔ ma nan ni.

⁵ Ya wa kikoti a kpa ya kpok a tum tuma a nyɛ Koosa ni. Waa kpa o kpok ti a nyɛ ya ya tum tuma a nyɛ un.

⁶ Waa la suŋi ya di ya ŋɔ nara ni chenani o wa ba fun bu ya nɔ bɛgim chen a la daŋni o siim weri ti wa nyɛn ba ni. Chenani o ya chen a nyɛ ba ya kibirigi a kaali o chiksɛ naa o fun kpa nyɛ Mosis ni saha digi chen. Nara tiŋ o chiksɛ ta a la tel a bɔ, ba ya sowu. Koosa siim weri ti nyɛn ba bambe ni, ba ka zi kpak miisa naa vɛ kpak bɔu.

⁷ Koosa funɛ kpa o chiksɛ ta a nyɛ Mosis ni saha digi, Koosa fun sɔbi a a sak buŋkula daha ni. Mosis fun na Koosa jirima awa o chaani kinkan, chen ni o gbanko se fun chaani kinkan. Mosis funɛ bur a la chem Ju tim ta, o se ta chaani ti wa fun bu hi, amaa ba wa fun koti a nyini a. Koosa fun kpa o jirima awa o chaani kinkan a du o chiksɛ naa nyɛ nara siti ni,

⁸ amaa o funɛ kpa o jirima awa o chaani kinkan naa kaali chenu a du o siim weri naa nyɛ nara kpak miisa naa vɛ kpak bɔ ni.

⁹ O chiksɛ naa nyɛ Koosa na nara galimsa a ta ba yɔri, dɔ Koosa jirima awa o chaani kinkan. Amaa o siim weri naa nyɛ nibinsa deŋli Koosa suwachak ni, dɔ o jirima awa o chaani kinkan kaali o te tel ti.

¹⁰ Jirima awa o chaani naa Koosa kpa nyɛ o siim weri ti ni nyɛ jirima awa o chaani naa o fun kpa nyɛ o chiksɛ ta ni saha digi chen, chi yɔrirɛ.

¹¹ Koosa chiksɛ naa funɛ dɔ o jirima awa o chaani kinkan wa fun vusi. O siim weri ti ka nyɛnu hali saha naa vɛ kpak bɔ. Chendaha o jirima awa o chaani kaali Koosa chiksɛ ta jirima awa chaani kinkan.

¹² Kin nama daha, ya kpak bambe kpok a biksi nara chenani Koosa fun tum nyɛ ba.

¹³ Ya wa chi Mosis naa funɛ kpa gar a tɔ o se, chen ni Ju tim ta wa zi koti a na Koosa chaani kinkan a li o se ni.

^14-15 Amaa Ju tim ta ka chi un. Chen saha ti hali wa zinan, ba yaa funɛ karimi Koosa chiksɛ ta a li o sɛm tɔn ti ni. A chi gar tɔ ba lise. Ba bambe gbanko chi bambe sitɛwa. Nyinbaan bɛgim duŋduŋ nyɛ ba wa zim Koosa. O lawa ba se su Yesu Kristou.

¹⁶ Nara maga nyɛ ba se su ya kunyan ti, ba bambe sitɛ zi wa zim Koosau.

¹⁷ Ya kunyan ti awa Koosa siim weri naa wa nyɛn ba ni chen ya nibɛgimnɛ. Ba waa lisɛ ba.

¹⁸ Ya naa ya Yesu nitiŋɛ ta, ya se wa tɔ. A chi diga naa la nyiksirɛ ya kunyan ti jirima awa o chaani kinkan. O siim weri ti tum ya bambe nee a chɛrgi ya di ya chi un a gbaari.