2 Kɔr. 2 - Tampulma

¹ Mu wara daŋni di mu sɛm kpok ta nyɛ ma tusa bu wa chɔk. Chendaha mu vɛ wa ma wati.

² Mu fu wa ma wati ka mu sɛma nyɛ ma tusa wa chɔk, anti fu zi nyɛn a kpami min? Ma nawara tusa chɔk chen fu wa zi ya chen.

³ Chendaha mu fun te sɔbi tɔn a nyɛ ma. Chen saha ti mu wa fun wa di mu wa na ma, domi ma naa fu zi nyɛ mu tuha sɔɔni, ma waa nyɛ o chɔk. Mu zim mu bambi niu di kinkin naa la sɔɔni mu tuha, waa la sɔɔni ma gbanko tusa.

⁴ Mu funɛ sɔbi a nyɛ ma, o funɛ muksi minu kinkan ma daha. Mu tuha funɛ chɔku kinkan mu wi. Amaa mu wa funɛ daŋni mu tɔn ti sɛma chɔk ma tusa. Mu funɛ daŋni mu biksi mau chenani muu daŋni mau.

Ma Ta Bu Lɛrgi Tum Tagna Nitumɛ Diŋsa

^5-6 Ma lisi baal naa wɛ mu sɔbi a du mu tɔn ti ni, awa chenani o funɛ burgi ma. Waa funɛ nyɛ ma tusa chɔk a kaali chenani o chɔk min. Chenani ma tusa fun chɔk chen wa li o duŋduŋ ni. Mu tɔn ti sɛm ta funɛ gbaari ma tu chɔk ti ni. Chen saha tirɛ ma nidamata fun lɛrgi chen tiina diŋna. Ma petiu lalaknɔ.

⁷ Ma gil a nyɛ un a la kpami un, chen ni o tu chɔk ti wa zi nyɛ un gbaŋchɛlyɛla.

⁸ Mu sumi mau di ma ŋɔ un di maa daŋni unu kinkan.

⁹ Chendaha mu fun sɔbi tɔn ti a nyɛ ma. Mu funɛ daŋni mu zimu di ma zi tiŋ mu nɔu a li kina maga ni. Mu daŋni mu zaamsi mau.

¹⁰ Ma gil a nyɛ nar ni, mu zi chiŋi ma gantɛl niu. Mu daŋni mu suŋi mau. Chendaha ma ya chen. O chi Kristo nyini chenani mu yarɛ.

¹¹ Ya zim chenani sintana tumu saha maga. Chendaha ma zer chen nyinbaan o wa kikoti a nyaŋi ma.

Kin Naa Muksi Pɔɔl Bambi Troas Ni

¹² Mu funɛ wa tel Troas, ya kunyan ti fun a nyɛ min nyinbaan kinkan di mu biksi nara Yesu Kristo laaboor weri ti wɛ.

¹³ Amaa o funɛ muksi minu kinkan mu vɛ koti a dɛu Taitus dooni. Chendaha mu vɛ nyɛn Troas tima wati a vusi a kaali Masɛdonia pulum.

Koosa Funɛ Nyɛ Pɔɔl Biksi Nara Ba Zim Kristo

¹⁴ Ma nyɛ ya pɛgi Koosa kinkan. Waa funɛ nyɛ ya wa Kristo ya nibɛgim. Lalaknɔ waa dɔ ya. Saha maga waa nyɛ ya gba a biksi nara, chen ni ba zi na nyinbaanu a zim un.

¹⁵ Ya nara biksi nɔ sɔɔni Koosa tuha kinkan. Ba naa nu o laaboor weri ti Kristo wɛ, Koosa la yisi ba a li ba tum tagna ni ba tiŋ un. Ba naa vɛ nu un, Koosa zi na ba galimsau a ta ba yɔri.

¹⁶ Doon naa maga ya wa tel, ya chi sɔɔr taginnɛ a li ba naa Koosa zi wa ta yɔri wati. Ya ka chi sɔɔr lɛmnɛ a li ba naa wa zim Kristo. Anti ya nikpok a la zi tum tum na a nyɛ Koosa ni?

¹⁷ Nidamata biksi nara Koosa laaboor weri ti wɛ wa ba nyina nɛɛ, chen ni ba zi na nyɔɔrau a nyɛ ba titi ni. Ya waa wa chi chen tima. Koosa funɛ tum ya di ya wa biksi nara o wɛ wa tu bɛgim ni. O chi Koosa la nyini ya. Ya chiŋɛ o bar chiŋi nɛɛ a biksi nara a li kpok naa Kristo kpa nyɛ ya chen.