2 Kɔr. 13 - Tampulma

Pɔɔl Mak O Tɔn Nɔ Bar Nɔwa

¹ Mu funɛ piin wa ma watiu bilɛ. Lalaknɔ mu bur a saksiu di mu wa. Maa lisi chenani ba fun sɔbi a li Koosa sɛm tɔn ti ni. Ba funɛ ŋɔ, “Ma daŋni ma fiksi nandigi, ma kpak nara alɛ akoo nara batora ba ya ma sɛhɛra tima.”

² Mu funɛ nyɛn ma wati bilɛ tiin chen, mu funɛ tɛ ma naa la tum tum tagna chen ninu. Lalaknɔ mu bol ma niu, mu ha vɛɛn a tɛ ma awa ba naa ka, ninu. Mu saksiu di mu wa lɛrgi ma diŋsa kinkan.

³ Yesu Kristo kpak kpok kinkan. Mu wa pu ma, ma zi zim di o kpok ti nyɛn min niu.

⁴ Ba funɛ wa kpa un a la kpaasi a mari o daakakli ti ni o sou, o wa fun kpak kpok. Amaa lalaknɔ o bu nyɛn Koosa kpok naa funɛ lɛli un a li o sou ni, daharɛ. Chen vɛɛna, mu funɛ nyɛn ma wati saha digi, mu funɛ ya jɛrgirɛ ma wati. Mu wa kaa bur wa, mu wa Koosa kpok kinkan zi bur wau.

⁵ Maa zaamsi ma titi di ma se su Yesu Kristo nɛnɛ. Ma zim di o nyɛn ma bambe niu akoo ma higliu di ma tiŋ unuu?

⁶ Ma zimu di ya wara higli. Ya kpak unu nɛnɛ.

⁷ Yaa sumi Koosau di ma bur a li ma tum tagna ni, chen ni mu wa zi wa lɛrgi ma diŋsa. Ma bur a tum tum were, chen bɔɛɛ di mu biksi ma chenani Yesu Kristo kpok ti nyɛn min ni.

⁸ Ya yaa kpami mau di ma tum were a nyɛ Koosa ni a tiŋ o wuti nyinbaan.

⁹ Ya vɛ kpak kpok ka ma wa kpak kpok, ya tusa zi sɔɔniu. Chendaha ya yaa sumi Koosau di kin naa nyɛn ma wati maga kɔɔri.

¹⁰ Mu sɔbi tɔn nɔwa a te nyɛ ma di ma kɔɔri kin nama, chen ni ka mu wa wa ma wati, mu wa zi bu kpa kpok naa ya kunyan ti fun kpa nyɛ min chen a lɛrgi ma diŋsa. O funɛ kpa unu a nyɛ min di mu suŋi ma ma zim un a gbaari.

¹¹ Ya niinbisa, lalaknɔ ya daŋni ya mak tɔn nɔ sɔbi bar nɔwa. Ma nu chenani mu sɛm ma chen a kɔɔri kin nawara vɛ deŋli maga. Ma kpak nɔ bɛgim wa dɔŋ ni a kpak bara sɔɔna awa dɔŋ ni. Koosa naa la daŋni ma a la nyɛ ma bara sɔɔna, o zi suŋi mau a chi nan.

¹² Ma zaami dɔŋa nɛnɛ.

¹³ Koosa nara maga zaami mau.

¹⁴ Koosa naa la daŋni ma, awa ya kunyan Yesu Kristo naa la suŋi ma, awa Koosa siim weri naa nyɛ ma ya nɔ bɛgim wa dɔŋ ni, ba maga zi nyɛn ma niu.