2 Kɔr. 12 - Tampulma

Pɔɔl Fun Na Ya Kunyana A Chi O Deesi

¹ Ma nyɛ mu ŋɔ ma tama a gbaari mu titi wɛ ni. Chenani mu zi ŋɔ ma wa zi suŋi ma kinkan, amaa nyinbaan wa to mu zi vɛ sɛm ma. Wuzu digirɛ Koosa fun suŋi min di mu na ya kunyan ti.

² Bun fidanaasi gantɛl ni, Koosa fun lisi min a zini a zu o tɔhɔn ti. Mu wa zim di o funɛ ya nan koo o chi mu funɛ deesiu. O duŋduŋ zim chen.

³ Ma nyɛ mu bukoo ŋɔ ma. Koosa funɛ lisi min a zini a zu bar weri kinkan. O duŋduŋ zim di o funɛ ya nan koo o chi mu funɛ deesiu.

⁴ Mu funɛ zu dooni, mu funɛ nu sɛmau a naa mu vɛ koti a sɛm ma.

⁵ Mu fu zi daŋni sɔnu a daha, amaa mu wa zi bu daŋni sɔn. Mu ka daŋni mu biksi mau di mu titi kpok ti ya yɔrirɛ.

⁶ Mu fu ŋɔ ma chenani mu du, ma fu wa zi ŋɔ di mu sɛma wa kpak nyuha. Mu fu zi ŋɔ ma wutiu. Mu wara daŋni nara zim di mu ya nibin zenne a kaali ba, domi chenani Koosa fun ya a nyɛ min daha. Mu daŋni ba ka di min sɛriarɛ mu tuma awa mu sɛma daha.

⁷ Koosa wa funɛ daŋni mu zer mu titi, domi o funɛ nyɛ mu nu alaazibu sɛmau. Chendaha o fun kpa wichɔɔrta a nyɛ min o wi mu bara ni saha maga. O chi Koosa nyɛ sintana tuksi minu saha maga.

⁸ Mu funɛ sumi ya kunyan ti kin nɔ wɛ butora a ŋɔ un di o kpa un a ta.

⁹ O fun vɛ la nɔɔni a ŋɔ min, “Mu zi nyɛ hin mu kpok tiu i di un. Nibine kpok bur gantɛlu, kpok naa mu kpa du un ni chen la gbaari.” Chendaha mu tuha sɔɔni ka mu daŋni sɔn di mu titi kpok ti ya yɔrirɛ, chen ni Yesu Kristo kpok ti zi nyɛn min niu kinkan.

¹⁰ Nara pini min a nyɛ mu na namsi a la muksi min kinkan Yesu Kristo daha ka mu vɛ koti a nyini mu titi kpok se ni, mu tuha sɔɔnɛu.

Pɔɔl Baga Funɛ Nyɛn Ba Ni

¹¹ Ma muksi minu di mu sɔbi a nyɛ ma a chi mu ya wom. Yɛrɛ ma bɔnɛ vɛ nyɛ min jirima? Mu titi kpok ti ya yɔrirɛ, amaa mu wara tiŋ nusun nibiksɛ ba naa ma lisi di ba wa ya nibirige, gantɛl.

¹² Mu funɛ nyɛn ma wati, ma wa funɛ beeli di mu ya Koosa nitumirɛ wuti. Waa funɛ suŋi min di mu tum tum zene a kitum alaazibu tuma awa kanyita kinkan ni a nyɛ ma.

¹³ Chenani mu fun a biksi ma awa chenani mu fun a biksi Koosa nitiŋɛ ba naa nyɛn bar kurgɛ ni, ya kibɛgimnɛ, amaa kibɛgim funɛ ka. Mu wa fun pɛɛsi ma di ma suŋi min wa diwe ni. Mu vɛ nyɛ ma tusa sɔɔni diwe na daha, ma gil nyɛ min.

¹⁴ Mu funɛ piin a wa ma watiu bilɛ. Lalaknɔ mu bur a saksiu di mu wa. Mu wa pu ma, mu wara daŋni ma wa lisi kundɔŋ a li ma kin ni a nyɛ min. Mu daŋni ma kpa ma titirɛ a ka nyɛ min. Ma chi mu bisiwa. Bichɛsa wara dɛɛsi ba nyama awa ba numa, amaa ba nyama awa ba numa ka la dɛɛsi ba.

¹⁵ Mu daŋni mu kpu mu titirɛ a nyɛ ma, chen ni mu zi suŋi mau. Chenani mu daŋni ma la suwachak, ma daŋni zi bur gantɛluu?

¹⁶ Ma zimu nɛnɛ di mu funɛ nyɛn ma wati, mu wa funɛ nyini ma diwe se ni. Ma bɔnɛ zi buru a ŋɔ dɔŋ ni di mu sɛm ta ya wutirɛ amaa mu nɛɛgiu a mur ma.

¹⁷ Yɛrɛ mu nɛɛgi a la mur ma? Ba naa mu fun tum ma wati chen, ba funɛ di mauu?

¹⁸ Mu funɛ sumi Taitusu di o la ma wati. O fun la nɔɔni, mu fun tum o wa ya niinbe digi ma wati. Taitus funɛ di mauu? Ma wa zim di chenani mu wa Taitus bambe lisi awa chenani yaa tum, ya kibɛgimnɛɛ?

¹⁹ Ma lisi di ya kɔɔri ya sɔniwa ma wati a li tɔn nɔ nii? Chen wa ya wuti. Koosa dɔ ya ya sɔbi sɛm naa Yesu Kristo fun kpa nyɛ ya. Mu bi daŋnɛ, ya tum tagna la zi suŋi ma.

²⁰ O muksi minu mu wa wa ma wati, ma bɔnɛ wa zi tiŋ chenani mu daŋni maa tiŋ. Ma zi wa di dɔŋa wa amɔrɛu a kpak dɔŋa handɔta a na paan a du dɔŋ ni a ya se tima a kichɔk dɔŋ sɔna a kilɔ dɔŋ gantɛla a zer ma titi a vɛ tiŋ ma nihɛɛta nɔɔna. O du chen, ma wa zi daŋni chenani mu wa ma zi nyɛn.

²¹ O muksi minu mu wa wa ma wati, Koosa zi nyɛ mu na hiisau ma daha. Mu tuha zi chɔku kinkan domi ma nidamata wa zi gil ma chɔkumsa tuma awa ma sakaal tuma awa ma tum doŋa kinkan a bur wa tiŋ Koosa.