2 Kɔr. 11 - Tampulma

Chenani Ma Bɔnɛ Vɛ Tiŋ Mu Wuti Biksi Yesu Wɛ

¹ Lalaknɔ mu daŋni mu sɔbi mu wɛwa a li tɔn nɔ ni. Ma bɔnɛ zi lisiu di mu sɛma wa kpak nyuha. Ma ya min kanyita tama.

² Muu daŋni ma kinkannɛ a chi chenani Koosa daŋni ma. Ma chi nihabichɛllɛ mu fun a vɔu di mu nyɛ baal naa sɔn ya Yesu Kristo chen.

³ O muksi minu kinkan ma daha. Ma bɔnɛ nyɛ nara burgi ma bambeu a li chenani ma fun te tiŋ Yesu Kristo a li tu bɛgim ni. Ma burgi nɔ chi chenani sintana fun nɛɛgi a mur Iif saha digi chen.

⁴ Ma bɔnɛ la nu ba naa vɛ tiŋ ya wuti biksi Yesu wɛ. Ba funɛ chɛrgi Koosa laaboor weri tiu a biksi ma siim naa vɛ ya Koosa siim weri ti wɛ. Ma funɛ la nɔɔniu ka o vɛ bɔm ma wati.

⁵ Ma lisu di nibiksɛ nama ya nibirigewa a kaali min. Mu wa la nɔɔni a nyɛ ma.

⁶ O ya wutirɛ mu vɛ koti a sɛm sɛma nɛnɛ nara suwachak ni, amaa mu zima wa pɔɔgi min. Mu yaa biksi mau di nan ya wutirɛ.

⁷ Mu funɛ te nyɛn ma wati a biksi ma Koosa laaboor weri ti wɛ, mu wa funɛ daŋni bɔta. Mu funɛ bur mu titirɛ gantɛl di ma zer ma nyuuna buudaha. Chen wa fun deŋlii?

⁸ Ma nyɛ mu ŋɔ ma chenani o fun du. Mu funɛ nyɛn ma wati, Koosa nitiŋɛ ba naa nyɛn tɔ bar boli ni, bɔnɛ funɛ kpa papaharɛ a nyɛ min, chen ni mu zi kotiu a suŋi ma yɔri.

⁹ Wuzu digi mu malɛ fun wa peti, amaa mu wa fun wa pɛɛsi ma di ma suŋi min. Mu niinbisa ba naa nyɛn Masɛdonia pulum ni, funɛ zer kin naa maga mu daŋniu a wa nyɛ min. Mu yaa fun dosou di mu wa zi nyini ma se ni a li kundɔŋ ni. Chene o kaa nyɛn kpa la saha wa wa.

¹⁰ Mu sɛm ta ya wutirɛ domi Yesu Kristo nyɛn min ni. Ba naa maga nyɛn Girik tim pulum ni zi nuu di mu wara nyini ma se ni a li kundɔŋ ni.

¹¹ Ma lisi di mu la tum nan, mu wara daŋni maa? Koosa zimu di mu daŋni mau kinkan.

¹² Mu wa zi chɛrgi chenani mu tum nan, chen ni nibiksɛ nama wa zi na nyinbaan a ŋɔ di ba tuma awa mu tuma ya kibɛgimnɛ.

¹³ Ba wa ya Koosa wuti nitumɛ. Ba ka ya nusun timwa, domi ba mur mau di ba biksi awa ya biksi ti ya kibɛgimnɛ. Ba fun chɛrgi ba titi di ma lisi di Yesu Kristo funɛ tum ba ma wati.

¹⁴ Hali sintana gbanko koti a chɛrgi o titi, chen ni nara zi lisiu di o ya Koosa malaikasi ta nichaani digirɛ.

¹⁵ Sintana koti a tum chen, o wa bɔm wa o tumtumsa chɛrgi ba titi, chen ni ma zi lisiu di ba ya Koosa tumtumsiwa. Koosa wa di ba sɛria, o zi na ba galimsau a ta ba yɔri.

Chenani Pɔɔl Fun Namsi A Biksi Nara Koosa Wɛ

¹⁶ Mu piin sɔbiu di ma bɔnɛ zi lisiu di mu sɛm ta wa kpak nyuha. Mu bur a sumi mau di ma kpak min kanyita. Lalaknɔ ma nyɛ mu daŋni sɔn tama.

¹⁷ Ya kunyan ti wa fun biksi ya di ya daŋni sɔna. Womna la daŋni chen duŋduŋ.

¹⁸ Nibiksɛ nama la tiŋ ba titi daŋnɛ aa daŋni sɔna a du ba titi ni. Chendaha mu gbanko daŋni sɔn.

¹⁹ Ma lisu di ma kpak zima kinkannɛ, amaa ma wa vusi a nu womsi biksi nɔ.

²⁰ Ba wa kpa tuha sa a du ma ni a dɛɛsi ma a chi bichɛsa, a nyɛ ma chɔk ma malɛ awa diwe kinkan a pini ma aa gbaari. Ma la kin nama maga.

²¹ Ya wa ma funɛ nyɛn, Koosa wa fun nyɛ ya bambi kpoka di ya ya chen a nyɛ ma. Baa daŋni sɔna, mu gbanko zi ya womu a tum chen.

²² Ba ya Ju timwaa? Mu gbanko ya Ju timwa. Ba ya Abraham bi lulɛwaa? Mu gbanko ya ba warɛ.

²³ Ba ŋɔ ma di ba ya Yesu Kristo tumtumsiwaa? Ma zi ŋɔ di mu zu galɛŋwa, amaa mu daŋni mu ŋɔ ma di mu ya o tumtumnɛ a kaali ba kinkan. Mu funɛ tum tumwa kinkan a nyɛ un. Ba fun a tɔ min dɛ bu damata a kpa vurmsa a tuk min. Mu fun wa dugli siwi bu damata. Mu kaali bau a li kina maga ni kinkan.

²⁴ Ju tim ta fun a kpa vurmsa a tuk min fumnaasi di kibɛgim wa to. Ba funɛ ya chene naval bunyuu.

²⁵ Nara fun kpa daasa a tuk min naval butora. Nara fun kpa buŋkula a yaksi min bu bɛgim. Mu funɛ nyɛn arŋ zen nee, peha fun wa mo un a la zini gbɛntɛla o pɛksi. O funɛ ya chene naval butora. Mu funɛ nyɛn teku ni ti nee aa di nha wa dusum maga bu bɛgim.

²⁶ Mu yaa si bar digi niu a gba hali a la li bar tagna ni kinkan. Mu funɛ ji mɔɔga jibaŋ naa ni fun su a pisi chen. Nara funɛ muksi min kinkan a daŋni ba fuksi mu kina. Ju tim ta awa ba naa vɛ ya Ju tima fun nyɛ min na namsi kinkan. Hali ba naa mu fun lisi di ba ya mu chɛnsiwa, ba fun bur a ka min. Mu funɛ gbau a la li tɔsa awa nyabaan wa teku, a maga funɛ ya bar tagniwa.

²⁷ Mu funɛ tumu a la gali a gil mu do bu damata. Nyɔksa awa lɔsa fun a kpak min. Mu kilaarɛ wa fun mak min ka mu vɛ kpak bar chɔɔli wuzu kama.

²⁸ Kin nawara nyɛnɛɛ mu ha vɛ sɛm ma a wɛ. Mu baga nyɛnu kinkan saha maga di Yesu nitiŋɛ ta maga zi tiŋ unu nɛnɛ.

²⁹ Nar vɛ tiŋ un nɛnɛ, o muksi minu. Nar ka tum tum tagna, mu tuha zi chɔku kinkan a daha.

³⁰ Mu funɛ piin ŋɔ mau di mu ya womnɛ a la daŋni sɔn. Kinkin naa mu lisi mu ŋɔ ma biksɛɛ di mu wa kpak kpok kinkan.

³¹ Koosa naa ya ya kunyan Yesu nyana, zimu di mu wa ya nusun tiina. Ma nyɛ ya pɛgi un hali saha naa vɛ kpak bɔ.

³² Mu funɛ nyɛn Damaskus nɛɛ, gɔbnati nyuhu tiina naa ba funɛ yir Aretas, fun tum o lanjimasa di ba la il tɔhɔn ti nɔɔna a kpak min.

³³ Amaa mu chɛnsa funɛ kpa min a du chenchise ni a kpa ŋmɛn a vɔu chenchise ti, a kpa min a dau chechepure ziŋi naa ba fun sa a go tɔhɔn ti chen, mun ni. Mu funɛ wa pu tɛɛnɛ, mu fun chɔ a li o nin ni.