2 Kɔr. 10 - Tampulma

Koosa Fun Kpa O Kpok A Nyɛ Pɔɔl Ni

¹ Ma bɔnɛ ŋɔ dɔŋ ni di mu funɛ nyɛn ma wati mu funɛ ya jɛrgɛrɛ, amaa mu funɛ bol, mu funɛ sɔbi sɛm kpokwa a nyɛ ma. Yesu Kristo daŋni mu ya jɛrgirɛ ma wati. Chendaha mu waa, Pɔɔl, sumi ma lalaknɔ,

² mu wa wa ma wati, ma ta wa muksi min mu sɛm sɛm kpoka a nyɛ ma. Mu wa pu ba naa la ŋɔ di yaa tiŋ ya tutɔ daŋnɛrɛ, mu zi sɛm sɛm kpokau a nyɛ ba.

³ O ya wutirɛ di ya nyɛn tɛɛnɛ nɔ maga ni, amaa ya wara tiŋ ya tutɔ daŋnɛ a chi chenani tɛɛnɛ nɔ tim maga tiŋ a.

⁴ Ya wara nyini ya titi kpok se nee, amaa Koosa kpa o kpok ti a nyɛ ya, chen ni ya zi chiŋiu a du nibiksɛ ba naa vɛ nu Koosa laaboor weri ti, biksi ni,

⁵ a lisi chenani nara zer ba titi a vɛ zim Koosa a ta. Ya kpa o kpokre a biksi ba, chen ni ba zi burgi a tiŋ Yesu Kristo nɔu awa ba bambe ni.

⁶ Ya se su di ya wa wa ma wati, ma maga zi tiŋ Yesu Kristou nɛnɛ. Ya ka wa na ka ma bɔnɛ vɛ tiŋ un nɛnɛ, ya zi lɛrgi ba diŋsau.

⁷ Ma bɔnɛ nyini ya se nee, a vɛ nyini ya bambe ni. Ma bɔnɛ lisi di Yesu Kristo dɔ maa? Ma lisi di waa dɔ ya gbanko a chi o dɔ ma chen.

⁸ Ya kunyan ti kpa o kpok ti a nyɛ ya di yaa suŋi ma a ta lɛrgi ma diŋsa. Ya fa sɔbi nan kinkan, hiisa wa zi kpak ya.

⁹ Ya wara daŋni ya tɔn nama kpak ma hansura.

¹⁰ Mu funɛ piin sɔbiu di ma bɔnɛ ŋɔ di mu funɛ nyɛn ma wati, mu funɛ ya jɛrgɛrɛ ka mu sɛma ya yɔri. Mu funɛ bol a sɔbi ma, tɔni ta maga funɛ suu wa sɛm kpoka ni.

¹¹ Nara nama ba naa la sɛm nan, mu daŋni ba zimu di mu wa wa ma wati mu zi kpa mu tɔn ta sɛm kpokau a sɛm ma.

¹² Nara nama ya womniwa kinkan. Ba lisiu di ba ya nibin zenewa. Ba wara daŋni ba kpa ba titi a lagmi ya ni. Ba funɛ naami ba titi chiksɛ a la tiŋ a.

¹³ Ya wara daŋni sɔna a kaali chenani Koosa fun lisi ya di ya tum o tuma. Chenani ya suŋi ma ya tum ta bar digirɛ.

¹⁴ Ya funɛ te wa biksi ma Koosa laaboor weri naa ya Yesu Kristo wɛ chen. Chendaha ya kpak nyinbaan di yaa suŋi ma.

¹⁵ Ya wara daŋni nyɔɔra a li chenani nara biksi ma a li Koosa laaboor weri ti ni. Ya kpak bambi bɛgimu di ma se zi su unu ka ya wa ma tuma pisi a gbaari.

¹⁶ Ma maga tiŋ chen, ya wa ma zi lagmiu a te biksi Koosa laaboor weri ti a nyɛ tɔsi naa go ma ni. Ya ya chen, nandigi wa zi ŋɔ di ya daŋni nyɔɔrrɛ a li nara tum ni.

¹⁷ Ba fun a sɔbi a li Koosa sɛm tɔn ti ni a ŋɔ, “Ma ta daŋni sɔn a li ma titi tum ni. Ma ka daŋni sɔn a li chenani ya kunyan ti tum ni.”

¹⁸ Ma pi ma titi, chen wa deŋli. Ya kunyan ti ka pi ma, chen deŋlee kinkan.