2 Kɔr. 1 - Tampulma

¹ Min waa, Pɔɔl, naa Koosa fun a lisi di mu ya Yesu Kristo nitumi, awa ya niinbe, Timoti, zaami mau. Min, Pɔɔl, la sɔbi tɔn nɔ a nyɛ ma naa Koosa fun lisi di ma tiŋ un a li Kɔrint ni awa ba naa maga ya o nara a nyɛn Girik pulum ni.

² Ya kunyan Koosa awa ya kunyan Yesu Kristo kisuŋi ma a kinyɛ ma bara sɔɔna.

Pɔɔl Fun Zaami Koosa Chenani O Suŋi Ya

³ Ma nyɛ ya pɛgi Koosa naa ya ya kunyan Yesu Kristo nyana. Waa ya siki tiina awa belimi tiina.

⁴ O yaa belimi yau a li ya namsi maga ni. Domi o yaa suŋi ya chene, ya koti a chiŋi ya dɔŋtima gantɛl ni a li ba namsi ni.

⁵ Ya namsi awa Kristo namsi ya kibɛgimnɛ. Ya namsi gbaari, o yaa belimi yau a gbaari.

⁶ Mu wa Timoti funɛ namsi di Koosa koti a suŋi ma a yisi ma a li ma tum tagna ni ma tiŋ un. Ma namsi awa ya namsi ti ya kibɛgimnɛ. Domi Koosa belimi ya, ya gbanko koti a belimi ma a la kpami ma, chen ni ma zi si ma namsiu wa kanyita ni.

⁷ Ya se su di ma zi kpaku a kpok. Ya zimu di ma namsi ti awa ya namsi ya kibɛgimnɛ. Chendaha Koosa belimi ma awa ya.

⁸ Mu niinbisa, mu daŋni maa lisi chenani ba naa nyɛn Azia pulum ni, fun nyɛ ya na namsiu kinkan. Chen saha ti ya namsi funɛ zenu a kaali a maga. Hali ya fun lisi di ya zi sitiu.

⁹ O chi ba funɛ di ya sou sɛriau. Koosa funɛ nyɛ kin nama ya yau, chen ni o zi biksi yau di ya ta nyini ya titi se ni, amaa ya nyini o waa naa lɛlɛ nara a li ba sou ni se ni saha maga.

¹⁰ Chen saha ti, Koosa fun a yisi ya a li sou ni. Ya se su di o zi yisi yau a li wɛ niu.

¹¹ Maa sumi un ya daha. Koosa bu wa yisi ya a li ya namsi ni kinkan, ma wa nidamata kipɛgi un chen daha.

Kin Naa Nyɛ Pɔɔl Vɛ La Zaami Ba

¹² Ya tusa sɔɔniu domi ya zimu di ya ha wa tiŋ tɛɛnɛ nɔ tim maga zima. Koosa ka suŋi ya di ya nyɛn wa tu chaana awa tu bɛgim ni nara maga suwachak ni. Ya wa ma funɛ nyɛn chen, ya fun doso a kaali chenani ya fun nyɛn.

¹³ Chenani mu sɔbi a nyɛ ma, o wa bɔm wa ma zim.

¹⁴ Ma ha wa zim min nɛnɛ, amaa mu daŋni ma zim min nɛnɛ, chen ni mu zi ya ma jirima naru. Ya kunyan Yesu wa bur wa, ma zi kut ya mu jirima narau.

^15-16 Kin nama daha, mu funɛ daŋni mu wa gali ma ni a la Masɛdonia pulum a bur wa na ma, chen ni ma zi suŋi minu a li Judia pulum nyinbaan ni. Mu fu ya chen, mu fu zi suŋi mau bilɛ.

¹⁷ Mu funɛ te daŋni mu wa ma watiu a bu vɛ daŋni, nan nyɛ mu burgi a chi naa chɛrgi o bambi saha magaa? Mu kpak sire a te daŋni mu wa ma wati a bu vɛ daŋnii?

¹⁸ Koosa ya mu sɛhɛra tiina di mu wa ya chen tiina. Mu ya nibine naa ya wuti tiinnɛ.

¹⁹ Min, Sailas awa Timoti funɛ nyɛn ma wati chen, ya fun a biksi ma Yesu Kristo naa ya Koosa be, wɛ. Yesu wara vɔu a nyɛ ma wa o nyina ni. O ka tum o tum magawa wa tu bɛgim ni.

²⁰ Koosa funɛ tum Yesu di o nyɛ vɔwɛ naa maga Koosa fun kpa nyɛ nara ni a li o piili ti ni, chen ya wuti. Ya zaami Koosau a la nyɛ un jirima kinkan kin nama daha.

²¹ Waa nyɛ ya wa ma kpak nɛnɛ di Kristo nyɛn ya nɛɛ. O titi funɛ lisi ya,

²² a zer o dani a du ya ni. O gbanko funɛ kpa o siim weri ti a du ya bambe niu. Waa ya o purigiri bɔɔli kin naa maga o zi kpa a nyɛ ya.

²³ Mu daŋni Koosarɛ ya mu sɛhɛra tiina ma zim di mu sɛm ta ya wutiu. Mu wa fun wa di mu wa na ma, chen ni ma wa zi nu mu sɛm kpoka.

²⁴ Ya wara daŋni ya wa gbaari chenani ma se su Yesu Kristo. Ma se piin su unu nɛnɛ. Ya ka daŋni ya wa suŋi mau ma tum were la suwachak ka ma tusa sɔɔni a gbaari.