1 Tim. 5 - Tampulma

Chenani Timoti Zi Nyini Yesu Nitiŋɛ

¹ Ta zulimi nihɛɛ, amaa sumi un a chi o ya i nyana. Kisɛm sɛma bunɔɔna wati a chi ba ya i niinbisa,

² awa nihaana a chi ba ya i niina, awa butoosa a chi ba ya i toosa. Kilisi chenani weree aa nyɛ ba.

³ Kinyɛ luhaana ba naa vɛ kpak nara ba nyini ba, wa jirima.

⁴ Amaa luhaan kpak niisisa akoo bisa, ba nyini un a bɔ chenani ba nyana awa ba niina fun ya nyɛ ba. Chene ba zi tiŋ Koosau ba dam ni a sɔɔni o tuha.

⁵ Luhaan vɛ kpak nandigi o nyini un ka o kpak bambi bɛgim Koosa ni a la sumi un di o suŋi un nha awa dusum, o ya luhaan wutirɛ.

⁶ Amaa luhaan naa ka tiŋ o titi daŋni, o nyɛnu a chi o wa zim Koosa.

⁷ Kibiksi kin nama a nyɛ i nara ni, chen ni nandigi wa zi koti a nyɛ ba sɔn tagin.

⁸ Nandigi vɛ nyini o titi walɛ, o wa tiŋ Koosa nɛnɛ. O tum tagna a kaali ba naa vɛ zim Koosa, domi ba waa koti a nyini ba walɛ.

^9-10 Luhaan bunsa kaali bun fumnɔra, ka o fun kpak baal bɛgim duŋduŋ a dɛɛsi o bisa nɛnɛ a la Koosa nara awa hɔɔra a du o dam ni a la suŋi ba naa nyɛn muksi ni a kpak un o bambi ni di o tum tum werewa, Yesu nitiŋɛ ta zi nyini unu.

¹¹ Luhaana vɛ tel bun fumnɔra, ta nyɛ Yesu nitiŋɛ ta kinyini ba. Ba zi daŋni ba yu baal falɛu, ba wa zi bu kpak un ba bambi ni di ba tum Kristo tuma.

¹² Ba ya chen, ba zi chɔk ba vɔwiu di ba zi tum Kristo tumau duŋduŋ. Chendaha Koosa zi wa na ba galimsau.

¹³ Luhaan butoosa gbanko zi kpak zanyɛrkau a gba nara damsa a zu ba wɛ ni aa lɔ nara gantɛl.

¹⁴ Mu daŋni luhaan butoosa kiyu baalasau a lul bisa a kinyini ba dama, chen ni ya dɔma wa zi na nyinbaan a chɔk ya sɔn.

¹⁵ Luhaan butoosi ta bɔnɛ piin bur Koosa nyinbaan tiŋi niu di ba tiŋ sintana.

¹⁶ Nihaan naa tiŋ Kristo a kpak luhaana o walɛ ni, o lawa o nyini bau. Yesu nitiŋɛ ta ka nyini luhaana ba naa vɛ kpak nara.

¹⁷ Yesu nitiŋɛ nihɛɛta ba naa la nyini ba nara nɛnɛ a kpak si sɛm aa biksi nara Koosa wɛ kinkan, o lawa ba na jirima bilɛu.

¹⁸ Ba fun a sɔbi a li Koosa sɛm tɔn ti ni a ŋɔ, “Ma ta vɔu nuha naa la sɔrgi niŋmɛna di o chɛri a, nɔ.” Ba fun bukoo sɔbi, “Tumtumna kila o bɔta.”

¹⁹ Nandigi daŋni o fiksi Yesu nitiŋɛ nihɛɛ, nyɛ o kpa nara balɛ koo nara batora ba wa a ya sɛhɛra tima, chen ni i zi nu ba sɛmau. O vɛ ya chen, ta nu o wati.

²⁰ Ba naa la tum tum tagna, kpaŋi a burgi ba nyuuna nara suwachak ni, chen ni ba naa nuɛɛ zi ɔmu.

²¹ Mu chiŋi Koosa awa Yesu Kristo awa o malaikasa naa o lisi suwachak ni, mu ŋɔ hinu di ii tiŋ mu biksi ŋɔ. Ta nyini digi a kaali digi.

²² Ta kpa i nisa a saksi nara ni lalaga di ba ya ya kunyan ti tumtumsa. Ta lagmi ba naa la tum tum tagna wati, amaa i kpak i titi wa tu chaan ni saha maga.

²³ Ta nyɔ ni duŋduŋ, amaa i yaa kinyɔ sin tama, domi i lo wi yɔri yɔri. O zi suŋi hinu.

²⁴ Bɔnɛ tum ba tum tagna gbampulim nɛɛ, chen ni ya zi zim a wɛu. Bɔnɛ ka tum ba tum tagna a sogli, chen ni ya wa zi zim a wɛ. Amaa wuzu digi Koosa zi wa di ba maga sɛriau.

²⁵ Ya zim tum were naa nibinsa tumu wɛ, hali a naa sogli wɛ, domi a zi wa li gbampulimu.