1 Tim. 4 - Tampulma

Chenani Nara Bɔnɛ Daŋni Ba Mur Nara

¹ Koosa siim weri ti biksi nyɛn gbampulim ni di saha kurgɛ wau, nibin bɔnɛ zi wa buru a tiŋ Koosa. Ba ka zi wa nu alizin tagna biksiu a kitiŋ ba naa la mur ba nɔ.

² Biksi nɔ li nusun tima ba naa la daŋni ba mur nara nɛɛ. O bak ka wu bu to wu were koo wa tagna ni.

³ Nara nama la biksi di nara kichi diwe bɔnɛ ka nibaala ta kpa haanasa. Amaa Koosa daŋni ba naa se su un a zim wuti ti di ba kpa diwe naa maga o fun naami chen a sumi un aa di.

⁴ Kin nawara maga Koosa fun naami weru. O wara daŋni ya chi diwe bɔnɛ, amaa o daŋni ya kpa diwe magwa a sumi un aa kidi.

⁵ Ya ya chen, Koosa zi kpa o ninu a sak diwe ta ni ka ya di.

Pɔɔl Daŋni Timotiu O Ya Yesu Tumtum Weri

⁶ I yaa lisi Koosa wuti biksi naa i fun la aa tiŋ, a kpa a biksi Yesu nitiŋɛ ta, i ya Yesu Kristo tumtum werire.

⁷ Ta lagmi ba naa la biksi mura a naa vɛ ya Koosa wɛ, a nyɛ nara ni. Ba mur ta ya yɔrirɛ. Kpaŋi i titi kinkan Koosa wuti biksi ti nyɛn i bambi ni.

⁸ I kpa i bara a tum di o kpok, chen weru, amaa ii tiŋ Koosa nɛnɛ, waa bɔɛɛ kinkan, chen ni i zi tum o tumau lalaknɔ awa saha naa wa wa.

⁹ A waa ya wuti sɛma a naa ya maga zi la nɔɔni kinkan.

¹⁰ Chendaha yaa tum ya tuma kinkan a nyɛ Koosa ni, domi ya kpak bambi bɛgimu un ni. O nyɛnu a daŋni o yisi nara maga a li ba tum tagna ni baa tiŋ un. O piin ya chenu a nyɛ ya naa se su un ni.

¹¹ Kiŋɔ a kibiksi kin nama a nyɛ nara ni.

¹² Nyɛ i sɛma awa i nyɛni wa chenani i daŋni nara wa chenani i si su wa i tum were, biksi Yesu nitiŋɛ ta chenani ba zi tiŋ Koosa. I ya chen, nandigi wa zi ŋɔ di i ya bichɛllɛ.

¹³ Hali mu wa wa i wati, kpak si sɛm a karimi Koosa sɛm tɔn ti nara suwachak ni a kibiksi ba Koosa wɛ.

¹⁴ Ta suglɛ papaha naa Koosa fun nyɛ hin saha naa o wa yir hin di i ya o tumtumna a nyɛ o witiina sɛm a li o kpok ni ka Yesu nitiŋɛ nihɛɛti ta kpa ba nisa a sak hin ni.

¹⁵ Nyɛ kin nama nyɛn i bambi ni i tiŋ a, chen ni nara maga zi na chenani i tum tum were a gbaariu.

¹⁶ Kidoso i nyɛni ni awa chenani i biksi nara. I kpak kin nama nɛnɛ, wuzu digi Koosa zi wa yisi i wa ba naa la nu i nɔu a li ma tum tagna ni hali a wa peti.