1 Tim. 3 - Tampulma

Ba Naa I Zi Lisi Ba Ya Yesu Nitiŋɛ Nihɛɛta Wɛ

¹ Mu sɛm wutirɛ. Nar kpak un o bambi ni di o ya Yesu nitiŋɛ nyuhu tiina, o daŋni kiwerere.

² O lawa o kpak sɔn weriu nara wati a kpak nihaan bɛgim duŋduŋ a kpak o titi nɛnɛ a ya bambi tiina a tiŋ nɛnɛ a la hɔɔra a du o dam ni a koti aa biksi nara.

³ O wa lawa o nyɔ sin a dɛɛsi a kpak nara wa tuha sa a kidaŋni o ya malɛ tiina. O lawa o ka ya jɛrgiu a kpak bara sɔɔna saha maga,

⁴ a koti a nyini o walɛ nɛnɛ a nyɛ o bisa tiŋ o nɔ aa nyɛ un jirima.

⁵ Nar vɛ koti a nyini o walɛ nɛnɛ, yɛrɛ o kaa ya a koti a nyini ba naa tiŋ Koosa?

⁶ O si su Koosa tama, o wa kiya Yesu nitiŋɛ nyuhu tiina. O ya nyuhu tiina lalaga, o zi zer o titiu ka Koosa zi na o galimsa a chi o funɛ na sintana galimsa chen.

⁷ O lawa ba naa vɛ zim Koosa, kinyɛ un jirimau, chen ni sintana wa zi wa mo o lo o di hiisa.

Ba Naa I Zi Lisi Ba Ya Yesu Nitiŋɛ Nisuŋɛ

⁸ O lawa Yesu nitiŋɛ nisuŋɛ kpak nara jirimau a tum ba tuma a li ba bambe ni. Ba gbanko ta nyɔ sin a dɛɛsi a kidaŋni ba ya malɛ tima.

⁹ Amaa o lawa ba kpak wuti naa funɛ sogli ka Koosa kpa un li gbampulim chenu a kpak tu bɛgim wa Koosa ni.

¹⁰ O lawa Yesu nitiŋɛ ta te a zaamsi ba, chen ni ka ba di, ba zi ya ba nisuŋɛu.

¹¹ Nisuŋi naa ya nihaan, o lawa o kpak nara jirimau a kpak o titi nɛnɛ a ya wuti tiina a li kina maga ni. O ta lɔ nara gantɛl.

¹² Nisuŋi lawa o kpak nihaan bɛgim duŋduŋnɛ a kinyini o bisa awa o walɛ nɛnɛ.

¹³ Ba naa la suŋi nɛnɛ, zi na jirimau a koti a kpak bambi aa ŋɔ nara ni chenani ya se su Yesu Kristo domi ya wa un ya nibɛgimnɛ.

Yɛrɛ Yesu Kristo Zen Mak

¹⁴ Mu lisu di o wa zi vusi ka mu wa i wati.

¹⁵ Mu vusɛɛ, tɔn nɔ zi biksi hinu chenani ya zi nyɛn wa dɔŋ niu. Ya naa la tiŋ Koosa naa nyɛnɛɛ, ya waa ya o wuti niilɛ.

¹⁶ Wuti naa funɛ sogli ka Koosa lisi un a li gbampulim, yɛrɛ o zen mak. Yesu Kristo fun wa burgi nibine, ka Koosa siim weri ti fun biksi nara tima di chenani o ŋɔ o titi wɛ chen ya wutirɛ. Koosa malaikasa funɛ nyini un ka Koosa wa lɛli un a li o sou ni a zini o tɔhɔn ti. O nitiŋɛ ta fun a mɔɔli o laaboor weri ti bar damata ni ka nara se su un.