1 Tim. 2 - Tampulma

Chenani Yesu Nitiŋɛ Zi Lagmi A Jɛɛmi Koosa

^1-2 Mu daŋni mu kpami hinu i sumi Koosa a kizaami un ba naa ya koorsa awa ba naa maga dɔ ya daha. Kisumi un di o suŋi ba, chen ni ya maga zi nyɛn wa bara sɔɔnau a tiŋ Koosa nɛnɛ aa nyɛ un jirima.

³ Ya tum chen maga, o zi sɔɔni Koosa tuhau,

⁴ domi o daŋni o yisi nara magwa a li ba tum tagna ni baa tiŋ un a wa zim o wuti ti.

⁵ Koosa ya nibɛgimnɛ. Yesu Kristo gbanko ya nibɛgimnɛ a fun wa tɛɛnɛ nɔ maga a wa ya nibine, chen ni o zi la mo ninu Koosa wati a nyɛ ya.

⁶ Kristo funɛ sou ya daharɛ, chen ni o zi kotiu a la nibinsa nyuuna a nyɛ ba. Saha nɔwa Koosa fun lisi di ya la biksi nara kin nama wɛ.

⁷ Chendaha o fun nyɛ mu ya o nitumi a tum min di mu la biksi ba naa vɛ ya Ju tima di ba se su un ka ba wa zim wuti ti. Mu sɛma ya wutirɛ. Mu wa ya nusun tiina.

⁸ Chendaha mu daŋni nibaala ba naa maga tiŋ Koosa nɛnɛ a nyɛn bawu maga ni ba sumi un. Ba ta na paan a kidi dɔŋ wa amɔrɛ.

⁹ Mu gbanko daŋni nihaana ba ta niŋi gata a chi sakaalsa a kiniŋi wa nɛha ni. Ba ta kpa malɛ damata a vɔti ba nyuksa a ta laari salma kina awa buŋkul were awa gar were.

¹⁰ O ka bɔu di baa tum tum were domi baa tiŋ Koosarɛ.

¹¹ O lawa nihaana ya jɛrgɛu a moori aa kibuksi.

¹² Mu wa la nɔɔni di nihaana kibiksi koo a dɔ nibaala. O lawa ba mooriu.

¹³ Koosa funɛ te naami Adam awa Iif.

¹⁴ Sintana wa fun mur Adam, amaa nihaan tirɛ sintana fun mur o chɔk Koosa chiksɛ ta.

¹⁵ Amaa nihaana ba naa la dɛɛsi bisa, ba kpak nɛnɛ a nyɛ ba se su Koosa kinkan a daŋni dɔŋa aa ya bambi tima, wuzu digi Koosa zi yisi bau a li ba tum tagna ni hali o wa peti.