1 Pita 4 - Tampulma

Ma Funɛ Bur Tum Tagna Nyinbaan Niu Di Ma Tiŋ Koosa

¹ Kristo funɛ nyɛn tɛɛnɛ nɔ maga ni, o funɛ namsiu kinkan. Chendaha ma gbanko kisaksi ma lise ma zi namsiu. Chenani ma namsi zi suŋi mau ma gil ma tum tagna awa ma titi daŋnɛ,

² a kitiŋ Koosa tutɔ wuzuna naa kaɛɛ ni.

³ Saha digi ma wa ba naa funɛ vɛ zim Koosa, funɛ lagmi dɔŋ ni. Chenani ma funɛ tum tuma a chi ba, chen saha ti funɛ magu. Ma funɛ tum chɔkumsi tuma a la daŋni ma titi daŋnɛ ka ma wa ma chɛnsa lagmi a di diwe a la nyɔ sin di ma dɛɛsi aa la nyɛ vursa wa jirima yɔri yɔri.

⁴ O jɛri ba naa vɛ zim Koosau lalaknɔ di ma wa ba wa lagmi a tum ba tum tagna kinkan. Chendaha baa pini ma zoma.

⁵ Koosa wa wa di o wa di ba naa kpak miisa awa ba naa sitɛɛ sɛria, o zi pɛɛsi ba chenani ba tumu.

⁶ Chendaha Koosa fun nyɛ nara kpa o laaboor weri ti a nyɛ ma ni. Waa la di nara maga sɛria. Chendaha ba siti. Ma bɔnɛ fun siti, amaa ba siimsa kpak miisau a chi Koosa.

Ma Kpak Un Ma Bambe Ni Di Ma Tiŋ Koosa Nɛnɛ

⁷ Tɛɛnɛ nɔ maga siili saha duglɛu. O lawa ma ya bambe timau, chen ni ma zi koti a sumi Koosa wa nɛha niu.

⁸ O ya wu birigirɛ di ma kpak si sɛm a daŋni dɔŋa kinkan. Yaa daŋni dɔŋa kinkan ka ya dɔŋtima tum tum tagna a du ya ni, o wa zi muksi ya.

⁹ Ma la dɔŋa aa du dɔŋ damsi ni a ta zulimi.

¹⁰ Koosa funɛ kpa o papaha kurgɛu a nyɛ ba naa la tiŋ un ni. Ma dɛu kinkin naa o fun nyɛ ma chen a kpa un aa suŋi ma dɔŋtima. Ma maga ya chen, Koosa zi suŋi mau wu damata ni.

¹¹ Naa kpak Koosa papaha ti a kaa ŋɔ nara ni o wɛ, ma nyɛ o sɛm sɛm ta wa si sɛm ni. Naa kpak Koosa papaha ti a kaa tum a nyɛ o dɔŋtima ni, ma nyɛ o kpa Koosa kpok ti a tum nɛnɛ a nyɛ ba. Ya ya chen, Koosa zi na pɛgiu a li ya tum maga ni Yesu Kristo sɔn daha. Koosa zi kpak kpoku awa jirima kinkan hali saha naa vɛ kpak bɔu. Ami.

Chenani Nibinsa Zi Namsi Ma Yesu Daha

¹² Mu bi daŋnɛ, ma ta nyɛ o jɛri ma di ma namsi kinkannɛ lalaknɔ.

¹³ Ma waa la namsi a chi Kristo funɛ namsi. Chendaha ma nyɛ ma tusa sɔɔni. O wa bur wa, ka nara na o jirima awa o chaani kinkan, ma tusa zi wa sɔɔniu hali a la gali.

¹⁴ Nara pini ma zoma maa tiŋ Kristo daha, ma gbanko nyɛ ma tusa sɔɔni. Nan biksi ma di Koosa funɛ kpa o siim weri naa kpak o jirima kinkan a du ma bambe ni.

¹⁵ Ma zimu di ma ta kpu nara a ta ŋmɛɛli a ta tum tum tagna a ta zu nara wɛ ni. O wa ya Koosa tutɔrɛ maa namsi kin nama daha.

¹⁶ Amaa ma ya Yesu Kristo nitiŋɛ. Maa ka saksi ma namsi o daha a ta nyɛ hiisa kpak ma. Maa zaami Koosa di maa tiŋ Kristore.

¹⁷ Koosa saksi di o di tɛɛnɛ nɔ tim maga sɛriau lalaknɔ. O wa wa, o zi te di ba naa o dɔ chen sɛriau a zi di ba naa se vɛ su o laaboor weri ti chen. O piili ya ni, yɛrɛ o kaa du ba ni?

¹⁸ Ba fun a sɔbi a li Koosa sɛm tɔn ti ni, “O bɔmɛɛ di Koosa yisi nibin were, yɛrɛ o zi du tum tagna nitumɛ ba naa vɛ zim un?”

¹⁹ Chendaha ba naa tiŋ Koosa tutɔ a la na namsi lalaknɔ, o lawa baa tum tum were a kpa ba titi a du Koosa naa funɛ naami kina maga, nin niu. Waa ya wuti tiina.