1 Pita 3 - Tampulma

Chenani Nibaala Awa Ba Haanasa Zi Lagmi Nyɛn

¹ Nihaana, ma gbanko kitiŋ ma baalasa nɔɔna, chen ni ba bɔnɛ se vɛ su Koosa laaboor weri ti, ba zi daŋni ba burgiu a tiŋ un chenani maa tum daha. Ba wa zi burgi a tiŋ un ma sɛm daha,

² amaa ma tu chaana awa chenani ma nyɛ un jirima daha.

³ Ma ta daŋni ma vɔti ma nyuksa a kilaari salma kina awa gar were di ma di tula.

⁴ Chenani ma bambe du kaali kin nama maga. Chendaha maa ya nihaan jɛrgɛ. Wuzu digi ma salma kin ta awa ma gar were ta zi wa chɔku, amaa ma ka ya jɛrgɛ, o wa zi chɔk. Chenani maga ma du Koosa wati kaali kin naa maga ma kpak.

⁵ Nihaana ba naa funɛ nyɛn saha digi chen, bɔnɛ fun tiŋ Koosa nyinbaan a kpak bambi bɛgim un ni a tiŋ ba baalasa nɔɔna. Chendaha ba fun a di tula o suwachak ni.

⁶ Nihaan digi funɛ nyɛn doon. Ba yir un Sara. Waa funɛ di tula chen ni. O fun a tiŋ o baal Abraham nɔ aa yir un o kunyana. Maa tum tum were a vɛ ɔm wu digi, ma waa chi o lul bisa.

⁷ Nibaala, ma wa ma haanasa lagmi nyɛn nɛha ni. Ma kpok kaali ba kpok. Chendaha maa nyɛ ba jirima. Ma wa ba piin la Koosa mi fali ti. Ma vɛ ya chen, ma sumi zi tɔu.

Ma Zi Namsiu Ma Tum Were Daha

⁸ Ma nyɛ mu lagmi a nama a ŋɔ ma. Maa kpak nɔ bɛgim wa dɔŋ ni a li kina maga ni. Ma ya niinbisiwa. Chendaha maa daŋni dɔŋa kinkan a ya jɛrgɛ aa kpak dɔŋa wa siki.

⁹ Nara tum tum tagna a nyɛ ma, ma ta bur tum tum tagna a nyɛ ba. Ba pini ma zoma a vɛ weri, ma ka ta bur pini ba zoma. Ma ŋɔ ba di Koosa la zi suŋi ma. Koosa funɛ lisi ma a nyɛ o titi ni, o fun a vɔu di ma ya chen, o zi suŋi mau.

¹⁰ Ba fun a sɔbi a li Koosa sɛm tɔn ti ni a ŋɔ, “Naa maga la daŋni o nyɛn wa tu sɔɔna, o ta sɛm sɛm tagna a ta suni wɛ a nyɛ nara ni,

¹¹ a gil o tum tagna aa kitum tum were, chen ni o kpak un o bambi ni a kpak nɔ bɛgim awa nara ni saha maga.

¹² Koosa la nyini ba naa la tum tum were a la nu ba sumi, amaa o yaa burgi o gantɛlu a chak ba naa la tum tum tagna.”

¹³ Ma yaa kpak un ma bambe ni a tum tum were kinkan, anti la zi muksi ma?

¹⁴ Hali maa namsɛɛ di ma tum were daha, yɛrɛ ma tusa kaa wa sɔɔni? Chenani nibinsa zi wa ya ma, ma ta nyɛ hansura akoo muksi wa kpak ma.

¹⁵ Ma nyɛ ma kunyan Kristo naa nyɛn ma ni, jirima. Waa ya tu chaan tiina. Nara pɛɛsi ma chenani ma kpak bambi bɛgim un ni, ma saksi a ŋɔ ba saha maga.

¹⁶ Amaa ma doso a nyɛ ba jirima a ya jɛrgɛ ba wati. Ma kpak tuha kibɛgim awa Koosa ni, chen ni nara pini ma tum were a naa maa tum a nyɛ Kristo ni, zoma, hiisa zi kpak ba naa sɛm chenu.

¹⁷ O ya Koosa tutɔrɛ ma namsi ma tum were daha, waa bɔɛɛ wa ma namsi ma tum tagna daha.

¹⁸ Kristo titi funɛ sou bu bɛgimnɛ ma tum tagna daha, chen ni o zi kpa mau a la Koosa wati. Naa funɛ ya tum were nitumi, waa funɛ chiŋi ya naa ya tum tagna nitumɛ bar chiŋi ni. Ba funɛ kpu o barawa, amaa Koosa siim weri ti funɛ lɛli unu a li o sou ni,

¹⁹ a nyɛ o fun sɛm siimsi naa ba fun tɔ dɛ chen.

²⁰ Siimsi nama wa fun tiŋ Koosa nɔ. Ba funɛ nyɛnu saha naa Nowa fun kɔɔri o arŋa saha digi chen. Chen saha ti Koosa kpak ba kanyita, amaa ni funɛ wa su, o fun a yisi nara mɛnasa duŋduŋ ni ti ni.

²¹ Ni naa funɛ wa su Nowa saha ti chen chi chenani nara kpa nire a chaksi ma. Ba wara chaksi ma bara dɔŋwa, amaa maa sumi Koosa wa tu bɛgim, waa la zi yisi ma a li ma tum tagna ni maa tiŋ un. Koosa lɛlɛ Kristo a li o sou ni. Chendaha o koti a ya chen.

²² O fun lɛli Kristo a zini kaali o tɔhɔn ti a nyɛ o kani o nihɛɛ bar kani ni a dɔ o malaikasi ta maga awa o kpok tima.