1 Pita 2 - Tampulma

Yesu Kristo Chi Koosa Buŋkullɛ

¹ Kin nama daha, ma kpa ma tum tagna maga a ta. Ma ta suni wɛ a nyɛ dɔŋ ni a ta kpak handɔta a du dɔŋ ni a ta pini dɔŋ zoma.

² O lawa ma chi bichɛl pilimsa ba naa la daŋni ba numa ilwa. Saha maga o lawa maa daŋni Koosa biksiu, chen ni o zi kotiu a suŋi ma ma bi. O lawa ma biu, chen ni wuzu digi Koosa zi wa yisi mau a li ma tum tagna ni hali a wa peti.

³ Ma zimu di Koosa funɛ suŋi ma.

⁴ Ma wa dugli ya kunyan ti wati. O chi buŋkul naa Koosa fun lisi di o ya kizen a li o dam ni, amaa nisalɛ funɛ vɛ unu a ta. O kpa o mi fali ti a nyɛ ma.

⁵ Ma naa kpak o mi fali ti, chi buŋkula a naa Koosa kpa sa o dam ti, chen ni o zi kotiu a nyɛn dooni. Ma chi ba naa funɛ ya o kɔkɔɔrsa saha digi, a kpa ma titi a nyɛ Koosa ni Yesu Kristo daha.

⁶ Ba fun a sɔbi a li Koosa sɛm tɔn ti ni di o ŋɔ, “Mu funɛ lisi buŋkul zenu naa mu kpa sa dɛ koŋa ni a li Jɛrusalɛm ni. Ba naa maga se su Kristo, o wa zi buti ba.”

⁷ Waa ya nizen kinkan a li ba naa se su un ni. Amaa ba funɛ sɔbi ba naa vɛ un chen wɛu a li Koosa sɛm tɔn ti ni a ŋɔ, “Buŋkul naa nisalɛ vɛ a ŋɔ di o ya yɔrirɛ, waa ya buŋkul zen a kaali a maga.

⁸ Buŋkul nɔ la zi mo nibinsi naŋgere ba chel,” domi ba vɛu di ba wa zi nu Koosa laaboor weri ti. Koosa tutɔ funɛ ya chen.

⁹ Amaa Koosa funɛ lisi mau a li birsi ni a wa di o titi bar chaani kinkan ni. Ma chi o koorsiwa awa o kɔkɔɔrsi tawa. O funɛ lisi mau a nyɛ o titi ni di ma ŋɔ nara ni o alaazibu tuma wɛ.

¹⁰ Saha digi o wa fun dɔ ma, amaa lalaknɔ o dɔ mau. O wa fun a ɔm ma siki saha digi, amaa ma la unu lalaknɔ.

Ma Nyɛ Koosa Awa Kaŋkoorsa Awa Nara Maga Jirima

¹¹ Mu bi daŋnɛ, ma naa ya hɔɔra a li tɛɛnɛ nɔ maga ni, mu sumi mau di ma kpa ma tutɔ daŋnɛ a ta. Ya tutɔ daŋnɛ awa chenani Koosa daŋni yaa tiŋ, a chɔ aa du dɔŋ nɛɛ.

¹² O lawa ma kpak sɔn were ba naa vɛ zim Koosa watiu, chen ni ba wa fiksi ma di ma tum tum tagna, ba zi wa na ma tum were duŋduŋu. Koosa wa wa di o wa di tɛɛnɛ nɔ tim maga sɛria, nifiksi nama zi pɛgi unu ma daha.

^13-14 Ma kpak ya kunyan ti sɔn. Chendaha maa tiŋ kaŋkoorsa awa koorsa ba naa maga tiŋ ba gantɛl, nɔ. O vɔti bau di ba lɛrgi ba naa la tum tum tagna diŋsa a kipɛgi ba naa la tum tum were.

¹⁵ O ya Koosa tutɔrɛ ma kpa ma tum were aa tɔ womna ba naa vɛ zim chenani ma tiŋi nɔ sɛma.

¹⁶ Ma ya nibin hiisewa, amaa ma gbanko ya Koosa yosiwa. Ma ta tum tum tagna aa sogli domi ma ya nihiise daha.

¹⁷ Maa daŋni ma dɔŋtima ba naa se su Yesu, a kinyɛ Koosa awa koorsi ta nyuhu tiina Siiza awa nara maga jirima.

Chenani Kristo Fun Namsi Ma Daha

¹⁸ Ma tumtumsa, ma nyɛ ma kunyama wa jirima kinkan aa tiŋ ba nɔɔna. Ma kunyama ya jɛrgɛ akoo ba ya tu haasa timwa, ma nyɛ ba jirima aa kitiŋ ba chen ni.

¹⁹ Ba kpak tu haasa a nyɛ ma na namsi, ma di un ka Koosa sɔɔni ma tusa.

²⁰ Ma tum galimsa awa tum tagna ka nara wa tuksi ma a daha ka ma di a, ba zi pɛgi mauu? Ma ka na namsi ma tum were daha ka ma di a, Koosa zi sɔɔni ma tusau.

²¹ Koosa funɛ yir mau di ma ya chen. Kristo titi funɛ namsiu ma daha a biksi ma chenani ma zi tum a chi o funɛ tum chen.

²² O wa fun kut a tum tum tagin. O wa fun suni wɛ a nyɛ nara ni.

²³ Ba funɛ pini o zoma a vɛ weri, o wa fun bur a pini ba zoma. Ba funɛ nyɛ o namsi, o wa fun a hɔɔsi ba, amaa o funɛ kpa o titu a du Koosa naa la di nara maga sɛria wa wuti ni nin ni.

²⁴ Kristo funɛ sou a li o daakakli ti ni, o fun kpa ya tum tagna a du o titi ni, chen ni ya wa zi bu tum tum tagna, amaa ya zi tum tum wereu. O chɔɔra funɛ nyɛ ma na alaafɛu.

²⁵ Ma funɛ chi piisi nyuksɛwa. Lalaknɔ ma funɛ burgiu a wa Kristo naa chi ma nigbaŋi, wati. Waa la nyini ma siimsa.