1 Kɔr. 9 - Tampulma

Nitumɛ Kpak Nyinbaan A La Zi Tum Tum Damata

¹ Mu wati, mu wa dɔ mu titii? Mu wa ya Yesu Kristo nitumɛ ta digirɛɛ? Mu wa fun na ya kunyan Yesuu? Ma waa tiŋ Yesu domi mu funɛ wa ma wati a biksi ma Koosa laaboor weri ti wɛɛ?

² Bɔnɛ wara la nɔɔni di mu ya Kristo nitumirɛ. Yɛrɛ ma lisi? Chenani maa tiŋ ya kunyan ti biksi nara di mu ya o nitumirɛ.

³ Bɔnɛ beeliu di mu wa ya o nitumi ti, nannɛ mu ya ŋɔ ba.

⁴ Kristo nitumɛ ta kpak nyinbaan di nara nyɛ ba diwe awa kinyɔɔli ba tum daha. Mu wa kpak chen nyinbaan?

⁵ Kristo nitumɛ ta, ya kunyan ti niinbisa awa Pita, ba maga funɛ kpak haanasiwa. Ba wa ba haanasi ta la tiŋ dɔŋa a gba, mu gbanko wa kpak chen nyinbaan?

⁶ Mu wa Barnabas duŋduŋ kaa tum aa di ya bar wilim nii?

⁷ I ya lanjima a li la laal ni, o wa ya i kunyan malɛwa i kaa la dii? I par i ŋmaha, i wa zi di o diwee? I gbaŋ nuhɛ, i wa zi nyɔ nuhɛ ta nuill?

⁸ O wa ya nibinsa duŋ wɛ la biksi chen. Koosa sɛm tɔn ti funɛ biksi chene.

⁹ Mosis funɛ sɔbiu a ŋɔ, “Ma ta vɔu nuha naa la sɔrgi niŋmɛna di o chɛri a, nɔ.” Koosa funɛ daŋni nuhɛ ta duŋduŋ suŋirɛ daha o fun nyɛ Mosis sɔbi nan nii?

¹⁰ Akoo o funɛ kaa suŋi nibinsiwa a fun nyɛ o sɔbi nann? Wuti ni o chi ya daharɛ o fun sɔbi chen, chen ni ya zi zimu di ba naa la par ba ŋmaha ba kipar wa bambi bɛgim, ka ba naa la kum, ba kikum wa bambi bɛgim.

¹¹ Chenani ya fun a biksi ma Koosa wɛ nan, o wa deŋli di ya la diwe ma watii?

¹² Ma nyɛ bɔnɛ ni chene. Ba kpak chen nyinbaan a la diwe ma wati, ya waa wa kpak chen nyinbaan a kaali baa? Ya ha wa ŋɔ ma di ma ya chen a nyɛ ya. Ya kpak kanyitarɛ kina maga ni, chen ni ya wa zi tɔ Kristo laaboor weri ti nyinbaan.

¹³ Ma zimu di ba naa la tum Koosa bar jɛɛmi dam ti ni a li Jɛrusalɛm ni di a li ba tum nɛɛ. Ba naa la kɔɔri kɔɔra, baa di kɔɔri ti bar digirɛ.

¹⁴ Chene ya kunyan ti fun sɛm a nyɛ ba naa la biksi nara Koosa laaboor weri ti wɛ di ba di a li ba tum ta ni.

¹⁵ Mu kpak nyinbaan naa mu zi tum a nama magau, amaa mu wa tiŋ chen. Mu wa sɔbi tɔn nɔ a nyɛ ma di ma ya chen a nyɛ min. Mu daŋni mu te biksi ma Koosa laaboor weri tiu a sou wa lɔsa a zi ŋɔ ma ma nyɛ min diwe.

¹⁶ O wa deŋli wa muu daŋni sɔn domi mu la biksi nara Koosa laaboor weri ti wɛ daha. O funɛ kpak minu a ŋɔ min mu ya chen. Mu vɛ biksi o laaboor weri ti, yɛrɛ o zi du min ni?

¹⁷ O fu ya mu titi tutɔrɛ mu biksi nan, o fu deŋlu wa mu la nyɔɔra a niu. Amaa Koosa funɛ kpa o laaboor weri ti a du mu nin ni a ŋɔ di mu kpa un aa nyɛ nara ni. Adaha mu laata kpa mu titi aa tum nan ni.

¹⁸ Mu tum ta nyɔɔra ya baŋa? Mu nyɔɔra ya mu kpa Koosa laaboor weri ti a nyɛ nara ni a ta la kundɔŋ. Saha maga mu wara tiŋ nyinbaan naa mu kpak, domi mu ya Yesu Kristo nitiŋɛ ta digirɛ.

¹⁹ Nandigi wa dɔ min, amaa mu funɛ kpa mu titirɛ a burgi yoma a tum a nyɛ nara maga ni, chen ni mu zi kotiu a la ba nidamata a nyɛ Koosa ni.

²⁰ Mu wa Ju tim ta lagmi nyɛn, mu yaa kpa mu titiu a burgi ba, chen ni mu zi la ba bɔnɛu a nyɛ Koosa ni. Mu wa ba naa tiŋ Ju tim ta chiksɛ ta wa lagmi, mu gbanko yaa tiŋ ba chiksɛ tawa, chen ni mu zi la ba bɔnɛu a nyɛ Koosa ni.

²¹ Mu wa ba naa vɛ ya Ju tima a vɛ tiŋ Ju tim chiksɛ ta, wa lagmi, mu yaa kpa mu titiu a burgi ba, chen ni mu gbanko zi la ba bɔnɛu a nyɛ Koosa ni. Mu kpa mu titi a burgi nara nama, mu ha vɛɛn tiŋ Koosa nɔrɛ. Muu tiŋ chenani Yesu fun biksi ya di yaa tiŋnɛ.

²² Mu wa ba naa se vɛ su Yesu nɛnɛ, wa lagmi, mu yaa burgi ba warɛ, chen ni mu zi suŋi bau di ba tiŋ un nɛnɛ. Chenani nibinsa du, mu gbanko du chene, chen ni mu zi la ba bɔnɛu a nyɛ Koosa ni.

²³ Mu ya chene o laaboor weri ti daha, chen ni mu zi wa na kiwere a naa Koosa fun vɔu di o nyɛ ya chenu.

²⁴ Ma zim di nara yaa chɔ chɔchɔha di ba la di chen, nara kinkan yaa chɔ a la, amaa nibɛgim yaa la di. Ma Yesu tiŋi chi chɔchɔharɛ. Maa chɔ nɛnɛ, chen ni ma zi wa diu.

²⁵ Nar la buksi chɔchɔha, o yaa kpak o titirɛ a li kina maga ni. O yaa chɔu di o la di nyuchik naa ba yaa kpa a chik o nyuha. Nara yaa chɔu a la di ba la di papaha. Chen papaha ti wara vusi a la chɔk, amaa ya waa chɔu di ya la di papaha naa la zi vɛ wa chɔki.

²⁶ Chendaha mu yaa chɔu a deŋli a la tel o bɔ. Mu gban chi nara nitukirɛ. Mu wa mou a kru.

²⁷ Mu yaa muksi mu barawa aa kpak mu titi nɛnɛ, chen ni mu titi wa zi wa nyuksi laaboor weri ti papaha naa mu kpa biksi nara chen.