1 Kɔr. 8 - Tampulma

Ma Ta Di Vursa Diwe

¹ Ma funɛ sɔbi tɔnnɛ a pɛɛsi min sela a naa ba yaa kɔrigi a nyɛ vursi ni chen wɛ. Mu zim di ya maga kpak Koosa zima ti a chi chenani ma sɛm, amaa zima nyɛ nara zer ba titi. Amaa yaa daŋni dɔŋa, chen la zi suŋi ya.

² Nar lisi di o nɛɛgɛu, o wa zim kundɔŋ a chi chenani o fu zi zim,

³ amaa nar la daŋni Koosa, warɛ Koosa zim.

⁴ Ma nyɛ ya bur gantɛl a la sela a naa ba yaa kɔrigi a nyɛ vursi ni. Ya zimu di vursa wa to tɛɛnɛ nɔ maga ni a kpak miisa. Ya zimu di Koosa bɛgim duŋduŋ nyɛnɛɛ.

⁵ Kin nawara nibinsa yir ba vursa awa ba kunyama, a iiu kinkan. Ba sɛm di a nyɛn buudaha ni awa tɛɛnɛ nɔ maga ni.

⁶ Amaa ya wati, Koosa bɛgim nyɛnɛɛ. Waa ya ya kunyan ti a fun naami kina maga. Ya ya o bisiwa. Ya kunyana Yesu Kristo gban ya nibɛgimnɛ. Koosa funɛ nyɛ o naami kina maga a nyɛ ya miisa.

⁷ Amaa nara nidamata laata zim di nan ya wutiu. Nibinsa ba naa funɛ nyɛ vursa jirima kinkan, bɔnɛ wa se vursa nɛmɛ, ba yaa lisi di ba jɛɛmi vursi tawa. O fun muksi ba di nɛmɛ naa ba se chen, zi nyɛ ba doŋu.

⁸ Diwe wa kikoti a kpa ya la Koosa wati. Ya di a koo ya chi, a mak ya kibɛgimnɛ.

⁹ Amaa ma doso. Ma vɛ chi a a la se vursa namsa, ma ta nyɛ ma yaali ti mur ba naa ŋɔ di namsi ta zi nyɛ ma dɔŋu, a wa chel.

¹⁰ Ma nibɛgim zim wuti nɔ a la doonani ba kɔɔri vursa a la se namsa ka i dɔŋtiina naa vɛ zim wuti nɔ nɛnɛ, na hin dooni, o gbanko zi kpak bambiu a la zu dooni a se namsi ta. O wa se peti, o tuha zi chɔku kinkan namsi ta daha.

¹¹ Kristo funɛ wa sou i dɔŋtiin ti daharɛ, amaa ma chɔk unu ma zima ti daha.

¹² I ya i dɔŋtima nan ni, ba tusa zi chɔku, domi ba wa fun zim wuti nɔ nɛnɛ. Chenani ma tum tum tagna a du ba ni nyɛ ma tum chen a du Kristo gbanko ni.

¹³ Adaha nɛmɛ mu zi se bur mu dɔŋtima gantɛl, mu wa zi bu se un, chen ni mu dɔŋtim ta wa zi wa chel.