1 Kɔr. 7 - Tampulma

Chenani Nihaana Awa Ba Baalasa Nyɛn

¹ Ma funɛ sɔbi tɔnnɛ a pɛɛsi min di nibaal vɛ kpa haan, chen weruu?

² O weru. Amaa chɔkumsi kinkan daha, o deŋlu di nibaal kpak o titi haanu. Nihaan gbanko kpak o titi baal.

³ O wa lawa nibaal ŋɔ di o wa o haan wa zi lagmi chɔ. Nihaan gbanko ta ŋɔ di o wa o baal wa zi lagmi chɔ.

⁴ Nihaan wa dɔ o bara. O baal ti dɔ o bara. Chen vɛɛna, o baal ti wa dɔ o titi bara. O haan ti dɔ o bara.

⁵ Adaha ma ta vɛ dɔŋa. Nibaal awa o haan vɔwɛɛ a ŋɔ di ba ha gil dɔŋa wuzu bilɛ, chen ni ba zi sumi Koosau awa tu kibɛgim ni a bu wa lagmi dɔŋ ni, chen weree. Amaa o vɛ ya chene, ma ta waligi dɔŋ ni, chen ni sintana wa zi koti a zaamsi ma, domi ma wa kikoti a kpak ma titi nɛnɛ.

⁶ O wa ya Koosa chiksi kpokre di nibaal kpa haan,

⁷ amaa mu wati, nibaala maga fun ya bazooma a chi mu ya bazoom nan, chen fu zi bɔ wa ba kpak nihaana. Amaa o wa ya di nara maga nɛɛ Koosa nyɛ ba chen papaha ti di o nyɛn a ta kpak haan. Koosa papaha naa o kpa nyɛ nara ni, a kuurgu.

⁸ Mu daŋni mu ŋɔ bazooma, luhaana awa butoosa watɛɛ. Ma fu tiŋ min a vɛ deu haanasa awa baalasa yuuli, chen bɔɛɛ.

⁹ Amaa ma vɛ koti a kpak ma titi, ma kpa haanasa aa yu baalasa. Chen bɔɛɛ ma vɛ koti a kpak ma titi.

¹⁰ Mu daŋni mu ŋɔ nihaana ba naa piin kpak baalasa ba ta vɛ ba baalasi ta. A wa ya mu titi sɛmwa. A ya Koosa sɛmwa.

¹¹ Amaa o vɛ o baal, o ta bu yu baal digi. O zim di o zi bur wa o baal buni ti watiu ba bu ya nɔ bɛgim, o bur kila o wati. Nibaal gbanko ta wa duŋni o haan.

¹² Mu ŋɔ nannɛ a nyɛ mu dɔŋtim ta ni. Nibaal naa ya Yesu nitiŋi aa kpak haan naa vɛ ya Yesu nitiŋi, ka ba lagmi nyɛn wa dɔŋ ni ka chen wer wa haan ti ni, o baal ti ta duŋni un taali. Mu titi zima nɛɛ mu ŋɔ nan. Ya kunyan ti laata ŋɔ.

¹³ Nihaan gbanko ya Yesu nitiŋi ka o baal vɛ ya Yesu nitiŋi, ka ba lagmi nyɛn wa dɔŋ ni ka chen wer wa baal ti, o haan ti ta wa vɛ un.

¹⁴ Nibaal naa vɛ ya Yesu nitiŋi a kpak haan naa la tiŋ Yesu, Koosa zi suŋi unu, domi o wa o haan ti ya nibɛgimnɛ. Nihaan naa gbanko vɛ tiŋ Yesu ka o baal ya Yesu nitiŋi, Koosa zi suŋi o haan tiu domi o wa o baal ti ya nibɛgimnɛ. O fu vɛ ya chen, Koosa fu wa zi suŋi ba bisa. Amaa ba nibɛgim ya Yesu nitiŋi daha, Koosa zi suŋi ba bisau.

¹⁵ Amaa nibaal koo nihaan ba naa vɛ ya Yesu nitiŋɛ, daŋni o vɛ nihaan koo nibaal ba naa ya Yesu nitiŋɛ, ma ta tɔ ba nyinbaan. Naa vɛ ya Yesu nitiŋɛ daŋni o ya chen, Yesu nitiŋɛ ta la nɔɔni a nyɛ un. Koosa funɛ yir ma di ma wa o wati a wa kpak bara sɔɔna.

¹⁶ Ma nihaana, ma wa zim di Koosa zi kotiu a yisi ma baalasa a li ba tum tagna ni ma dahaa? Ma nibaala, ma wa zim di Koosa zi kotiu a yisi ma haanasa a li ba tum tagna ni ma dahaa?

Ma Ta Chɛrgi A Li Ma Nyɛni Ni

¹⁷ Adaha nara maga kitum aa di a chi chenani o fun piinsa tum aa di hali Koosa fun yir un. Chene Koosa daŋni nara maga kitum aa di. Mu biksi Koosa nitiŋɛ ta bawu maga ni a chi chen.

¹⁸ Ba te teŋ nar ka Koosa zi yir un, o ta kpak o bara kiyaali a duuti ba wa teŋ un. Ba vɛ te teŋ nar ka Koosa zi yir un, o ta bu nyɛ ba teŋ un.

¹⁹ Ba teŋ un o ya yɔrirɛ. Ba vɛ teŋ un, chen gbanko ya yɔrirɛ. Amaa Koosa nɔ tiŋi ya wu birigi.

²⁰ Adaha ma tum aa di a chi chenani ma fun piinsa tum aa di hali Koosa fun yir ma.

²¹ I funɛ ya yoma ka Koosa yir hin, ta nyɛ chen muksi hin. Amaa ba daŋni ba lisi hinu a chausi, i la nɔɔni.

²² Domi nibine naa ya yoma ka ya kunyan ti yir un, o ya nibine naa dɔ o titirɛ o wati. Nibine naa dɔ o titi ka ya kunyan ti yir un, o ya Kristo yomne.

²³ Waa funɛ yau ma. Ma yawi funɛ iiu kinkan. Adaha ma ta lisi di maa tum a nyɛ nibinsi nee.

²⁴ Mu niinbisa, chenani ma fun nyɛn ka Koosa yir ma chen, ma vɛɛn nyɛn chen o wati.

Chenani Hazoma, Baalzoma Awa Luhaana Nyɛn

²⁵ Ma funɛ sɔbi tɔnnɛ a pɛɛsi min ba naa vɛ kpak baalasa awa ba naa vɛ kpak haanasa wɛ. Ya kunyan ti wa nyɛ min chen chiksi, amaa mu zi sɛm ma chenani mu yaa funɛ lisiu. Waa funɛ ɔm min siki, chen ni mu ya o wuti tiina.

²⁶ Wu namsɛ zi wa pu yau lalaga. Chendaha o weru mu wati chenani nibine nyɛn nan, o kut kpak chen.

²⁷ I kpak haan, ta vɛ un. I ka vɛ kpak haan, ta dɛu haan.

²⁸ I kaa kpa haan, o wa ya di i tum galimsau. I kaa yu baal, o wa ya di i tum galimsau. Ba naa kpak baalasa awa haanasa, ba waa la na namsi a kaali ba naa vɛ kpak baalasa awa haanasa. Mu wara daŋni ma namsi a chi ba.

²⁹ Mu niinbisa, wu namsɛ saha duglɛu. Nan daha ma naa kpak haanasa, ma nyɛn a chi ba wa kpak haanasa.

³⁰ Ma naa la wi nan, ma nyɛn a chi ma tusa sɔɔnɛu. Ma naa kpak tu sɔɔna, ma nyɛn a chi ma tusa wa sɔɔni. Ma naa la yausi kina gbanko, ma nyɛn a chi kin ta wa ya ma kina.

³¹ Ma naa kpa ma bambe maga a du tɛɛnɛ nɔ maga kina ni, ma nyɛn a chi ma se wa sɛri a ni, domi o wa zi vusi ka tɛɛnɛ nɔ maga wa chɔk.

³² Mu wara daŋni tɛɛnɛ nɔ maga kina kimuksi ma tusa kinkan. Nibaal naa vɛ kpak haan, o nyɛ o si sɛri a du ya kunyan ti tum ni, chen ni o tuha zi sɔɔniu.

³³ Amaa nibaal naa kpak haan, o si yaa sɛri a du tɛɛnɛ nɔ maga kina ni, chen ni o zi sɔɔni o haan ti tuhau. O yaa vɛɛn a daŋni di o si sɛri a du ya kunyan ti tum ni, chen ni o tuha zi sɔɔniu.

³⁴ Nihaan naa vɛ yu baal, o si yaa sɛri a li ya kunyan ti tum ni, chen ni o zi dɔ o bara awa o siimau. Nihaan naa yu baal, o si yaa sɛri a li tɛɛnɛ nɔ maga kina ni, chen ni o zi sɔɔni o baal ti tuhau.

³⁵ Mu la sɛm ma nan, mu daŋni mu suŋi mau. Mu wara daŋni mu tɔ ma nyinbaan. Mu daŋni ma ya wi naa deŋlee ka nyɛ ma si sɛri aa kitum ya kunyan ti tuma duŋduŋ.

³⁶ Nibaal naa kpak butowe a vɔu di o wa kpa un ka o bambi chɛrgi di chen wa deŋli wa o kpa un, amaa o bambi nyɛn un ni kinkan, o kpa un. Chen wa ya wu tagin,

³⁷ amaa o lisee nɛnɛ di chen wa deŋli wa o kpa un, kundɔŋ wara muksi un. O kpak o titi nɛnɛ. O bambi nyɛn un ni di o ta kpa un, o ya nɛnɛu.

³⁸ Adaha nibaal kpa butowe naa o vɔu di o kpa, o ya nɛnɛu. Amaa o vɛ kpa un, chen bɔɛɛ.

³⁹ Nihaan naa kpak baal, o wa bu kpak nyinbaan wa o gil o baal ti a la yu baal digi. Amaa o baal ti sowɛɛ, o kpak nyinbaanu wa o yu baal naa o daŋniu. Chen tiina lawa o ya Yesu nitiŋirɛ.

⁴⁰ Mu wati, o gil baal yuuli, o tuha zi sɔɔniu a kaali o yu baal. Mu la sɛm nan, mu lisu di Koosa siim weri ti biksi min.