1 Kɔr. 5 - Tampulma

Ma Nidigi La Tum Chɔkumsi Kinkan

¹ Mu nuu ka ba ŋɔ min di maa tum chɔkumsi tumiwa. Ma nidigi funɛ kpa o nyan haan a la chɔ. Hali ba naa vɛ zim Koosa chi chenu.

² Baŋnɛ ma zer ma titi nan? O fu lawa ma tusa chɔku kinkan, ka ma lisi baal naa ya chen a li ma lagmi ti ni.

³ Mu wa ma bol dɔŋ niu, amaa mu waa piin di baal ti sɛriau ya kunyan Yesu sɔn daha a chi mu nyɛn ma wati.

⁴ Chendaha mu ŋɔ mau ma yir ma titi a lagmi dɔŋ ni wa ya kunyan Yesu kpok ti ni. Ma wa lagmi, o zi chi mu gbanko nyɛn ma wati.

⁵ Ma kpa un a du sintana nin ni o muksi un a chɔk o bara, chen ni a wuzu naa ya kunyan ti wa bur wa, Koosa zi wa yisi o miisau.

⁶ Ma sɔn daŋni ti wa wer. Ma wa zim di luri tama yaa nyɛn boroboro sau ni, o yaa nyɛ sau ti maga fɔɔsiu chenn?

⁷ Ma lisi nibin tagin nɔ a li ma ni, chen ni o wu tagin wa zi bu ma. Doone ma zi chi boroboro naa vɛ kpak luri a chi a naa Ju tim ta yaa di wuzu zen naa ba yir val la gali. Chen wuzu zen tirɛ ba yaa kpu piisibisau a nyɛ Koosa ni. Ju tim ta funɛ kpak Yesu Kristo a kpu chen, o funɛ chi ya wuzu zen piisibere.

⁸ Yaa tiŋ Yesu, o wa werwa ya bur a tum ya titi tum bunɛ a lisi lise tagna a kitum tum tagna. Ma nyɛ ya kpa a nama maga a ta. A waa chi luri ti. Ma nyɛ ya sɛm wuti duŋduŋ a nyɛ ya tusa chaani nɛnɛ. A waa chi boroboro naa vɛ kpak luri ti.

⁹ Mu funɛ te sɔbi tɔnu a nyɛ ma a ŋɔ di ma ta nyɛ ma wa ba naa la tum chɔkumsa tuma kilagmi.

¹⁰ Mu wa ŋɔ ma di ma wa ba naa vɛ tiŋ Yesu a la tum nan kilagmi dɔŋ ni. Ba naa la daŋni nihaana yɔri yɔri a la daŋni malɛ a burgi ba kina a la ŋmɛ a la jɛɛmi vuga, ba waa nyɛn bawu maga ni.

¹¹ Amaa mu funɛ sɔbiu a nyɛ ma a ŋɔ di nibine daŋni nihaana yɔri yɔri a daŋni malɛ a burgi o kina a jɛɛmi vuga a chɔk nara sɔna a nyɔ sin a dɛɛsi a ŋmɛ a la yir o titi Yesu nitiŋi a la ya nan, ma ta nyɛ ma wa n lagmi hali a di diwe.

¹² Ba naa vɛ ya Yesu nitiŋɛ ta, mu laata kaa wa di ba sɛria. Koosa kaa wa di ba sɛria,

¹³ amaa ba naa ya Yesu nitiŋɛ, ma waa dɔ ba di ma wa di ba sɛria. “Adaha ma yisi chen nibin tagin tiina a li ma ni.”