1 Kɔr. 4 - Tampulma

Ya Naa Ya Koosa Nitumɛ Tiŋ Gantɛl

¹ O weru di ma la yir ya Yesu tumtumsi chen. Koosa funɛ kpa o wu sogle a du ya nisa ni. Ya ka kpa a aa biksi nara.

² Tumtum naa la tum nɛnɛ a nyɛ o kunyan ni, chen weru. O kunyan ti zi wa ŋɔ di o ya wuti tiinnɛ.

³ Mu bak wa to chenani ma wa nibinsa sɛm mu wɛ a la di min sɛria. Mu gbannɛ wa zi di mu titi sɛria.

⁴ Hali mu ŋɔ di mu tuha chaanu di mu funɛ tum nɛnɛu, chen wa zi biksi di mu zi wa liu. Kristo ya naa la zi wa di min sɛria.

⁵ Ma ta di sɛria ti lalaknɔ. Ma nyɛ Yesu wa bur wa. O wa wa, o zi kpa nibinsa wu sogle a li gbampulimu a biksi ba muna. O wa ya chen, o zi wa nyɛ ba jirimau a li ba tum were ni.

⁶ Mu niinbisa, mu kpa mu tuma awa Apɔlɔs tuma di mu biksi ma ma se lɛli ma tiŋ chenani Koosa sɛm tɔn ti biksi ya chen. Maa tiŋ chen, ma wa zi lisi nibin digi a zer un a kaali digi.

⁷ Anti ŋɔ ma di ma kaali ma dɔŋtima? Koosa funɛ nyɛ ma kin naa maga ma kpak. A maga li Koosa watɛɛ, ka yɛrɛ maa daŋni sɔn di ma titi kpokre ma kpak a nan?

⁸ Ma lisi di ma piin kpak kin naa maga ma daŋniu a ya kin tima a burgi a chi koorsa. Chenani maa lisi, chen wa ya wuti. Ya fu daŋni ya wa ma burgi a chi koorsiwa.

⁹ Mu wati Koosa nyɛ o nitumɛ ta tiŋ gantɛl, a chi ba naa ba funɛ di ba sou sɛria. Tɛɛnɛ nɔ tim maga awa Koosa malaikasa nyini ya a chi ya ya nibin tagniwa.

¹⁰ Ya ya womniwa a li nibinsa wati Kristo daha, amaa ma waa ya o nibin nɛɛgɛwa. Ya waa ya o nibin ba naa vɛ kpak kpok a li nibinsa wati, amaa ma waa ya o nibin kpokwa. Nara la filimi ya, amaa ba waa la nyɛ ma jirima.

¹¹ Lɔsa awa nyɔksa yaa funɛ kpak yau hali wa zinan ni. Ya yaa laari kizɛrgɛwa. Nara yaa funɛ tuk yau. Ya wa fun kpak bar nyɛni a nyɛn aa go.

¹² Ya bara wilim nɛɛ ya funɛ di. Nara yaa pini yau, amaa ya yaa sumi Koosau di o suŋi ba. Ba yaa muksi yau kinkan, amaa ya yaa kpak kanyitau ba wati.

¹³ Ba yaa chɔk ya sɔnau, amaa ya yaa fun sɛm sɛm wereu aa nyɛ ba. Ya yaa fun chi chaasiwa tɛɛnɛ nɔ tim maga wati hali wa zinan.

¹⁴ Mu wa sɔbi nannɛ a nyɛ ma di mu nyɛ hiisa kpak ma, amaa mu daŋni mu dɛɛsi mau a chi mu titi bisa.

¹⁵ Ma kpak nibinsa ba naa la zi biksi ma Kristo wɛ, nidamatau, amaa nibin bɛgim duŋduŋ ya ma nyana. Mu funɛ te biksi ma Koosa laaboor weri ti wɛu ma nu un a nyɛ ma se su Yesu Kristo. Chendaha mu ya ma nyana.

¹⁶ Adaha mu sumi mau, maa tiŋ chenani muu tiŋ.

¹⁷ Mu zi kpa Timotiu a tum ma wati di o wa biksi ma nyinbaan naa ma zi tiŋ wɛ. Waa ya mu bi daŋni a li Kristo ni a ya wuti tiina. Waa la zi wa lisi ma chenani muu tiŋ aa tum tuma Yesu Kristo wati. Chen nyinbaannɛ mu fun kpa biksi Yesu nitiŋɛ ba naa nyɛn bawu maga ni.

¹⁸ Ma bɔnɛ zer ma titi kinkan, domi ma lisi di mu wa zi bur wa ma wati,

¹⁹ amaa mu zi wau. Koosa la nɔɔni, mu zi wau lalaga a zim ba naa la zer ba titi chen. Anti la sɛm nan ni? Ba kpak kpok akoo ba wa kpak kpok, mu daŋni mu zim chen.

²⁰ Koosa koor ti wa ya nɔ sɛmi wɛwa. O ya o kpok ti wɛ wa.

²¹ Ma biksi min chenani mu zi wa ma wati. Mu wa ma wati awa da ni a wa tuk ma akoo mu wa ma wati balimm a wa biksi ma chenani mu daŋni maa?