1 Kɔr. 3 - Tampulma

Apɔlɔs Awa Min Ya Koosa Tumtumsa

¹ Mu niinbisa, mu wa fun koti a biksi ma a chi chenani mu funɛ biksi ba naa tiŋ Koosa siim weri ti nɛnɛ. O chi maa tiŋ tɛɛnɛ nɔ tim maga nyinbaannɛ. Chendaha mu sɛm ma a chi bichɛsa ba naa nyɛ ba se su Yesu.

² O funɛ chi illɛ mu kpa aa dɛɛsi ma domi ma ha wa mak ku diili. Ma ha wa mak ku diili,

³ domi ma ha vɛɛna tiŋu a chi tɛɛnɛ nɔ tim maga. Chenani maa di handɔta awa dɔŋa a la di amɔrɛ wa dɔŋ ni biksi di ma wara tiŋ Koosa siim weri ti nyinbaan. Ma ka tiŋ tɛɛnɛ nɔ tim maga nyinbaannɛ.

⁴ Ma bɔnɛ sɛm di ma tiŋ Pɔɔllɛ, bɔnɛ ka ŋɔ di ma tiŋ Apɔlɔsrɛ. Chenani ma ya chen biksi ma tuma.

⁵ Apɔlɔs wa Pɔɔl ya nibin zenewa maa tiŋ baa? Aai. Ya waa ya Koosa tumtumsa a nyɛ ma nyinbaan di ma se su un. Waa funɛ nyɛ ya nara balɛ na tuma yaa tum.

⁶ O chi mu waa, Pɔɔl, funɛ te wa chɔɔsi bugil. Doone Apɔlɔs ka yaa kpa ni a wa du, amaa Koosa duŋduŋ nyɛ bugil ti nyu a la zini.

⁷ Naa chɔɔsɛ awa naa la du ni, ba wa ya kundɔŋ, amaa Koosa duŋduŋ nyɛ bugil ti zini.

⁸ Naa chɔɔse awa naa la du ni, ba maga ya nibɛgimnɛ. Koosa la zi bɔ ba ba chim.

⁹ Chenani Koosa dɔ ya chen, nyɛ ya wa un tum tuma. Waa dɔ ma gbanko. Ma chi o ŋmaharɛ oo kɔɔri, a chi o dɛ oo sa.

¹⁰ Koosa nyɛ min o kpok ti mu ya tɛsal weri a baŋ o dɛ ti sɛchik a nyɛ un. Nandigi wa wa sa zɔŋ o daha. Ba naa maga sa Koosa dɛɛna, ba doso a ya tɛsal were.

¹¹ Koosa piin nyɛ Yesu Kristo ya o dɛ ti sɛchik. Nandigi wa to a zi koti a ya dɛ ti sɛchik ti see Yesu duŋduŋ.

¹² Bɔnɛ kpa salma awa aniita wa buŋkula were a naa kpak malɛ kinkan, a wa sa zɔŋ dɛ ti sɛchik ti ni. Bɔnɛ ka kpa daasa awa kɔsa awa kɔlɛ a wa sa zɔŋ dɛ ti sɛchik ti ni.

¹³ Saha naa Kristo wa bur wa, o zi wa kpa dinu a zaamsi chenani nara maga tuma duu. Chen la zi wa biksi a kiwere koo a wa wer.

¹⁴ Din ti wa bu kaa vɛ koti a chɔk nar tuma, Koosa zi wa bɔ tum nawara o fun tumu.

¹⁵ Amaa din ti wa di o tum ta, o wa zi na bɔta. Koosa zi wa yisi unu, amaa o zi wa chi nibine naa ba lisi un o dɛ ni ka din di o kina maga chenu.

¹⁶ Ma wa zim di ma tusa ya Koosa bar nyɛnirɛɛ? O siim weri ti nyɛn ma niu.

¹⁷ Nibine naa la chɔk Koosa bar nyɛni ti, Koosa zi chɔk o gbankou, domi o bar nyɛni ti ya bar birigirɛ o wati. Ma titi tusa ya Koosa bar nyɛnirɛ.

¹⁸ Ma ta nyɛ nandigi wa mur o titi. O lisi di o kpak tɛɛnɛ nɔ tim maga zima, o kpa o zima ti a yo ta ka burgi wom, chen ni o zi kpak Koosa zimau.

¹⁹ Tɛɛnɛ nɔ tim maga zima ti ya yɔrirɛ Koosa wati. Ba funɛ sɔbiu a li Koosa sɛm tɔn ti ni a ŋɔ, “O wa nyaŋi ba naa yaa kpa tɛɛnɛ nɔ tim maga zima ti aa tum tum tagna.”

²⁰ Ba funɛ vɛɛn sɔbiu a li Koosa sɛm tɔn ti ni a ŋɔ, “Koosa zim di tɛɛnɛ nɔ tim maga zima ti lisi ya yɔrirɛ.”

²¹ Adaha ma ta daŋni sɔn domi chenani tɛɛnɛ nɔ tim maga zima ti zi koti yau. Ma kpak kina magau.

²² Pɔɔl, Apɔlɔs, Pita, tɛɛnɛ nɔ maga, miisa awa sou, a naa maga nyɛn lalaknɔ awa a naa vɛɛn kaa wa, ma kpak a magau.

²³ Yesu Kristo dɔ ma, ka Koosa ka dɔ Kristo.