1 Kɔr. 2 - Tampulma

Yesu Kristo Fun Sou O Daakakli Ni Ya Daha

¹ Mu niinbisa, mu funɛ wa ma wati a sɛm Koosa sɛma a naa funɛ sogli ma wati, mu wa fun kpak nɔ lɛma awa nibinsa zima ti a biksi ma.

² Mu funɛ daŋni mu sɛm mau a li Yesu Kristo siwi daakakli ti daha ni duŋduŋnɛ.

³ Mu funɛ nyɛn ma wati, mu wa fun kpok. Mu funɛ a ɔmu kinkan, ka mu bara vɛɛn a jigiri.

⁴ Biksi ti maga mu fun biksi ma, o wa fun tiŋ nibinsa zimirɛ di o ya ma lɛmlɛm, amaa Koosa siim weri ti funɛ ya mu sɛm ta sɛhɛra a nyɛ a kpak kpok.

⁵ O wa fun ya nibinsa zimarɛ nyɛ ma se su Yesu. Koosa kpok ti ka funɛ nyɛ ma se su un.

Koosa Siim Weri La Biksi Ya Koosa Zima Wɛ

⁶ Mu yaa vɛɛn a sɛmu zima sɛmau a nyɛ ba naa la tiŋ Koosa ni nɛnɛ. O wa ya tɛɛnɛ nɔ tim maga zimarɛ akoo nibin zene zima mu sɛm a nyɛ ba. A nama ya yɔrirɛ a la zi vɛ vusi.

⁷ Ya ka biksi ma Koosa zima ti wɛwa. O funɛ te lisi unu ya jirima daha a zi naami tɛɛnɛ nɔ maga. Hali saha nɔ Koosa ha vɛɛna sogli unu a li nibinsi ni.

⁸ Ba naa maga dɔ tɛɛnɛ nɔ maga wa fun zim zima nɔ wɛ. Ba fu zimɛɛ, ba fu wa zi kpu ya kunyan ti o daakakli ti ni.

⁹ Ba funɛ sɔbiu a li Koosa sɛm tɔn ti ni a ŋɔ, “Koosa funɛ kpa wu werewa a chiksi ba naa la daŋni un. Nibinsa se ha wa na a, akoo nibinsa diŋsa ha wa nu a wɛ. Nibinsa wa lisi di o zi wa ya chenu.”

¹⁰ Amaa lalaknɔ Koosa funɛ nyɛ o siim weri ti biksi ya kin nama wɛ. O siim weri ti nyini kina maga a zim Koosa wu sogle gbanko.

¹¹ Nibine siima zim o titi tuha lisi. Koosa siim weri ti duŋduŋ zim Koosa tuha lisi gbanko.

¹² Ya wara tiŋ nibinsa zimirɛ. Koosa funɛ zer o siim weri ti a du ya bambe ni, chen ni ya zi kotiu a zim o siim weri papaha naa o fun kpa nyɛ ya.

¹³ Ya wara sɛm sɛma a li nibinsa zima ti ni. Koosa siim weri ti la biksi ya chenani ya zi sɛm. O sɛmwa ya kpa la biksi ma.

¹⁴ Nibine naa vɛ kpak siim weri ti o nyɛn un ni, o vɛ Koosa siim weri ti kinawa. A ya yɔrirɛ o wati ka o vɛ zim a muna.

¹⁵ Koosa siim weri ti nyɛn nibine ni, waa la zi koti a zim kina maga nyinbaan. Koosa siim weri ti ka vɛ nyɛn nibine ni, o wa kikoti a zim naa kpak Koosa siim weri ti.

¹⁶ Ba funɛ sɔbiu a li Koosa sɛm tɔn ti ni a pɛɛsi, “Anti zim chenani Koosa lisi du? Anti fun biksi un kundɔŋ?” Amaa ya kpak Kristo lisiu.