1 Kɔr. 16 - Tampulma

Malɛ Naa Ma Daŋni Ma La Nyɛ Ma Dɔŋtima Wɛ

¹ Ma funɛ sɔbi tɔnnɛ a pɛɛsi min malɛ naa mu daŋni ma la a nyɛ Koosa nara ba naa nyɛn Judia pulum ni chen wɛ. Maa tum chenani mu fun ŋɔ Yesu nitiŋɛ ba naa nyɛn Galesia pulum ni, di baa tum chen.

² Aleedi wuzu kam, ma maga yaa zer kinkin naa maa daŋni ma la a li kinkin naa Koosa nyɛ ma chen aa dau. Maa ya chen, mu wa wa ma zi la petiu.

³ Mu wa wa, mu zi sɔbi tɔnau a nyɛ ba naa ma se su a li ma wati ba kpa a awa ma papaha a la Jɛrusalɛm.

⁴ O deŋlu wa mu la dooni, mu wa ba zi lagmi dɔŋ ni a lau.

Chenani Pɔɔl Funɛ Lisi Doonani O Zi La

⁵ Mu daŋni mu la Masɛdonia pulumnɛ. Mu wa li dooni, mu zi wa nyɛn ma watiu wuzu bilɛ.

⁶ Ami mu zi nyɛn ma watiu hali wa saha wa gali. Mu saha wa tel di mu la, ma zi kotiu a suŋi min mu la doonani maga mu kaa la.

⁷ Mu wara daŋni mu wa gali ma wati lalaga. Mu kunyan ti fu la nɔɔni, mu fu zi daŋni mu nyɛn ma watiu a vusi.

⁸ Amaa mu zi nyɛn Ɛfɛsus niu hali Ju tim ta wuzu zen naa ba yir Pɛntɛkɔst chen wa tel.

⁹ Mu kpak nyinbaanu bar nɔ a zi koti a tum Koosa tuma kinkan a na nyɔɔra. Amaa ba naa la daŋni ba tɔ mu tum nyinbaan, ba iiu.

¹⁰ Timoti wa wa ma wati, ma la un a du nɛnɛ, chen ni o wa zi ɔm, domi o gbanko tum Koosa tumwa a chi min.

¹¹ Ma ta lisi di o ya bichɛllɛ, amaa ma suŋi un o koti a li nyinbaan ti awa bar sɔɔni ni a bur wa mu wati. Mu nyini o wa Yesu nitiŋɛ ta nyinbaan niu.

¹² Mu funɛ sumi Apɔlɔs kinkan di o tiŋ ya dɔŋtim ta a la ma wati, amaa o wara daŋni o la doon ni lalaknɔ. O wa na nyinbaan, o zi wau.

Pɔɔl Mak O Tɔn Nɔ Bar Nɔwa

¹³ Ma se su Yesu. Chendaha ma il a kpak ma titi nɛnɛ awa bambi kpok ni.

¹⁴ Maa tum ma tum maga aa nyɛ nara ni awa daŋni ni.

¹⁵ Ma zimu di Stɛfanas awa o dam walɛ funɛ te nyɛ ba se su Yesu a li Girik tim pulum ni a fun piinsa tum si sɛm tuma a nyɛ Koosa nara ni.

¹⁶ Mu niinbisa, mu sumi mau maa tiŋ ba naa maga wa un la tum nɔ.

¹⁷ Stɛfanas, Fortunatus awa Akaikus funɛ wa sɔɔni mu tuhau kinkan, domi ba waa funɛ wa chiŋi ma bar chiŋi ni.

¹⁸ Ba waa kpami min kinkan a chi chenani ba fun kpami ma chen. Maa nyɛ nara nama wa jirima.

¹⁹ Yesu nitiŋɛ ba naa nyɛn Azia pulum ni zaami mau. Akwila, Prisila awa Yesu nitiŋɛ ba naa yaa lagmi ba dam ni, ba gbanko zaami mau kinkan ya kunyan Yesu daha.

²⁰ Ya niinbisa maga zaami mau. Ma zaami dɔŋa nɛnɛ.

²¹ Mu kpa mu ninne a sɔbi a zaami ma gbanko nan.

²² Nibine naa vɛ daŋni ya kunyan ti, Koosa zi ŋɔ nɔu a nyɛ un. Ya kunyana, kuwa.

²³ Ya kunyana Yesu la zi suŋi ma.

²⁴ Mu kpa mu daŋniu a nyɛ ma maga Yesu Kristo sɔn daha.