1 Kɔr. 15 - Tampulma

Yesu Kristo Sou Siili Wɛ

¹ Mu niinbisa, ma nyɛ mu lisi ma Koosa laaboor weri naa mu fun kpa nyɛ ma chen wɛ. Ma funɛ la nɔɔniu ka ma ha vɛɛn kpak un nɛnɛ.

² Ma nu laaboor weri ti, Koosa zi wa yisi mau a li ma tum tagna ni hali o wa peti. Ma se vɛ su un wuti, o wa zi wa ya chen a nyɛ ma.

³ Wu birigi zen naa mu fun la Koosa wati chen, mu funɛ kpa biksi mau. Waa nɛɛnɛ. Yesu funɛ sou ya tum tagna daharɛ a chi chenani Koosa sɛm tɔn ti fun sɛm di o zi wa tumu saha digi chen.

⁴ Ba funɛ sogli unu, amaa o funɛ si o sou niu wuzu butora wuzu a chi chenani Koosa sɛm tɔn ti fun sɛm saha digi chen.

⁵ Pita fun bu te na un. Doone o nitumɛ fidalɛ ta fun bu na un.

⁶ Chen saha ti o nitiŋɛ tusugsa nyuu gbanko funɛ lagmi a na un. Ba nidamata ha vɛɛn nyɛn dooni, amaa bɔnɛ situ.

⁷ Jems gbanko fun bu na un. Doone o nitumɛ ta maga gbanko fun bukoo na un.

⁸ Min tiŋ gantɛl a na un. O funɛ duuti ba tiŋ gantɛllɛ a lul min mu na un.

⁹ Min tiŋ gantɛl a li Yesu nitumɛ ta ni. O wa deŋli di ba yir min o nitumi, domi min funɛ muksi Yesu nitiŋɛ ta kinkan chen.

¹⁰ Amaa Koosa funɛ ɔm min sikiu a suŋi min. O funɛ suŋi min chen daha, mu koti a du chenani mu du nan. Amaa chenani o fun suŋi min, mu wa kpa a a ta. Mu funɛ siu aa tum o tuma kinkan hali a kaali ba maga. Mu wara tum o tuma a li mu titi kpok ni, amaa Koosa la suŋi min.

¹¹ Chenani mu biksi awa chenani ba biksi, a maga ya kibɛgimnɛ. Chendaha ma se fun su un.

Chenani Yesu Zi Wa Lɛli Ya A Li Ya Sou Ni

¹² Ya funɛ biksi ma Kristo wɛ di Koosa funɛ lɛli unu a li o sou ni, yɛrɛ ma bɔnɛ sɛm di Koosa wa kilɛli nara a li ba sou ni?

¹³ Koosa vɛ wa koti a lɛli nara a li ba sou ni, o wa fun lɛli Kristo a li o sou ni.

¹⁴ Koosa vɛ lɛli Kristo a li o sou ni, ya biksi ti ya yɔrirɛ awa ma Yesu se suuli ti gban ya yɔri.

¹⁵ Chen sir ya wuti, ya suni Koosa nɔ nɛɛ. Nibinsa vɛ wa si ba sou ni, Koosa wa fun lɛli Yesu a li o sou ni. Ya fun ŋɔ ma di Koosa funɛ lɛli unu a li o sou ni.

¹⁶ Nara vɛ wa si ba sou ni, Koosa wa fun lɛli un a li o sou ni.

¹⁷ Koosa vɛ lɛli Kristo o sou ni, ma Yesu se suuli ti ya yɔrirɛ, ka ma tum tagna ha vɛɛn nyɛn ma ni.

¹⁸ Ba naa se funɛ su Kristo gbanko ka ba siti chen, ta yɔriu.

¹⁹ Ya nyɛni nɔ duŋduŋ ya kpak bambi bɛgim wa Kristo niu, o lawa nara kiɔm ya sikiu kinkan a kaali tɛɛnɛ nɔ tim maga.

²⁰ Amaa wuti Koosa funɛ te lɛli Kristo a li o sou ni. Chendaha Koosa zi wa lɛli ba naa funɛ siti chen gbankou a li ba sou ni.

²¹ Nibin bɛgim daha sou wa. Nibin bɛgim daha sou siili nyɛn.

²² Domi ya wa Adam ya nibɛgimnɛ, chendaha yaa siti. Ya naa wa Kristo ya nibɛgim nan, ya ka zi wa si ya sou niu a kpak miisa.

²³ Amaa ya kaa wa si ya sou ni nibɛgim bɛgimwa. Yesu funɛ ya naa funɛ te si. O wa bur wa, ba naa o dɔ chen gbanko zi wa siu.

²⁴ Tɛɛnɛ nɔ maga siili saha zi wa tel, Kristo zi wa nyaŋi o dɔma ba naa maga dɔ ba nara kpok. O ya chen, o zi kpa o koor tiu a nyɛ o kunyana Koosa ni.

²⁵ Kristo zi dɔ kina magau, hali Koosa wa nyaŋi o dɔma maga.

²⁶ O gantɛl dɔm naa o zi nyaŋi ya sou.

²⁷ Ba funɛ sɔbiu a li Koosa sɛm tɔn ti ni a ŋɔ, “Koosa zi wa nyɛ Kristo dɔ kina magau.” Chen wa ya di o zi dɔ Koosau.

²⁸ Koosa wa nyɛ Kristo naa ya o be, wa dɔ kina maga a peti, o gbanko zi la nɔɔniu di Koosa dɔ un, chen ni Koosa duŋduŋ la zi dɔ Kristo awa kina maga.

²⁹ Nibin bɔnɛ yaa chiŋi siwɛ bar chiŋi nɛɛ aa ŋɔ di nara kichaksi ba wa ni ni ba daha. Yɛrɛ ba yaa ya chen? Nara nama ŋɔɛɛ di nisitɛ vɛ si ba sou ni, yɛrɛ ba yaa ya chen a nyɛ ba?

³⁰ Nisitɛ ta vɛ si ba sou ni, yɛrɛ ya gbanko nyɛn bar tagna ni saha maga?

³¹ Mu niinbisa, mu hɛɛsɛ ma naa la tiŋ ya kunyan Yesu Kristo a ya mu jirima nara, muu zu sou bar nyɛni nɛɛ wuzu kam.

³² O duuti mu wa sel zene funɛ yo dɔŋa a li Ɛfɛsus ni. O ya di tɛɛnɛ nɔ maga kina duŋduŋ daha mu wa a funɛ yo dɔŋa, baŋ nyɔɔra mu na? Nisitɛ vɛ si ba sou ni, ma nyɛ yaa di diwe aa kinyɔ kinyɔɔlɛ domi ya wa zim chɛ.

³³ Ma ta mur ma titi. Ma lagmi nibin tagna ni, ba zi chɛrgi ma bambe were tau a tagini.

³⁴ Ma bur wa ma nɛha ni a gil ma tum tagna. Ma bɔnɛ wa fun zim Koosa nɛnɛ. O wa kpak ma hiisaa?

Yesu Zi Kpa Bara Falɛu A Nyɛ Ya

³⁵ Ma nidigi zi wa pɛɛsi minu, “Yɛrɛ nisitɛ ta kaa ya si ba sou ni? Baŋ barawa ba kpak?”

³⁶ Ma ya womniwa kinkan. Kiduha naa ma du chen yaa nyu tɛɛnɛ niu a zini, ka kibuni ti pɔ.

³⁷ Ma kpa mɛ a du chen, kiduhu titi wara zini. Kiduha naa ma du chen laata ma kum a di.

³⁸ Koosa kpa kiduha a nyɛ a be chi chenani o daŋni, ka o nyɛ a maga kurgɛ dɔŋ ni.

³⁹ Bara maga wa ya kibɛgim. A maga kurgu. Nibinsa bara nyɛn doon a kurgi sela bara ni. Nyinsa gbanko bara kurgu zimebisa bara niu.

⁴⁰ Buudaha kina nyɛn doon ka tɛɛnɛ nɔ maga kina gbanko nyɛn. Buudaha kina bunɔɔta kurgi tɛɛnɛ nɔ maga kina bunɔɔta niu.

⁴¹ Nha bunɔɔta kur pɛna bunɔɔta niu. Wula bunɔɔta kurgi nha awa pɛna bunɔɔta niu. Wula gbanko chaaniu a kaali dɔŋa.

⁴² Chene nara zi si ba sou ni. Ba wa siti, bara naa ba kpak chen zi wa pɔu. Ba wa si ba sou ni, ba bara falɛ ta wa zi kut pɔ.

⁴³ Ba kpa siwi a sogli, o wa kpak jirima koo kpok. Siwi ti wa si o sou ni, o bara falɛ ta zi kpak jirima awa kpoku.

⁴⁴ Bara naa ba sogli, o ya bara titirɛ, amaa bara fali ti ya siim barawa. Bara titi nyɛnu ka siim bara ka nyɛn.

⁴⁵ Ba funɛ sɔbiu a li Koosa sɛm tɔn ti ni a ŋɔ, “Koosa funɛ te naami nibine naa ba funɛ yir Adam ka o kpak miisa.” Amaa Adam naa funɛ tiŋ gantɛl chen, waa ya siim naa la nyɛ nara miisa. Waa ya Kristo.

⁴⁶ Ma zimu di ya wa fun te kpak siim bara. Ya funɛ te kpak bara titirɛ a zi wa kpak siim bara.

⁴⁷ Koosa funɛ te kpa hɛɛra a naami Adam, amaa Adam naa tiŋ gantɛl chen, Koosa funɛ tum un a li o tɔhɔn ti nɛɛ.

⁴⁸ Ba naa nyɛn tɛɛnɛ nɔ maga ni, ba chi Adam naa Koosa fun kpa hɛɛra a naamirɛ. Ba naa nyɛn Koosa tɔhɔn ti ni, ba chi Adam naa funɛ li Koosa tɔhɔn ti ni chene.

⁴⁹ Lalaknɔ ya chi Adam naa Koosa fun kpa hɛɛra a naamirɛ, amaa ya zi wa chi Kristo naa funɛ li Koosa tɔhɔn ti ni chenu.

⁵⁰ Mu niinbisa, ma nyɛ mu ŋɔ ma nan. Ya bara titi wa kikoti a zu Koosa koor ti ni. Kinkin naa la zi wa pɔ wa kikoti a wa nyɛn doonani kin naa vɛ pɔɔli ni.

⁵¹ Maa nu. Mu zi biksi ma Koosa wu bɛgim sogli wɛu. Ya maga laata kaa sou. Amaa ya sitɛɛ akoo ya wa siti, wuzu digi Koosa zi wa chɛrgi ya maga barau bu bɛgim.

⁵² Saha naa Koosa kaabul naa wa tiŋ gantɛl, wa hu, o zi lɛli nisitɛ tau a li ba sou ni. Lalaga a chi se kamsɛɛ, o zi wa chɛrgi ya bara titiu a nyɛ ya bara falɛ a naa vɛ pɔɔli.

⁵³ O deŋlu di bara a naa la zi wa pɔ chɛrgi bara a naa la zi wa vɛ pɔɔliu. Bara a naa la zi wa sou zi chɛrgi bara a naa la zi vɛ sitiu.

⁵⁴ Koosa wa chɛrgi bara a burgi a naa la zi vɛ pɔɔli awa a naa la zi vɛ wa siti, kin naa ba fun sɔbi a li Koosa sɛm tɔn ti ni zi wa ya wutiu. Ba funɛ sɔbiu a ŋɔ, “Koosa fun kpa o kpok ti a nyaŋi sou.”

⁵⁵ Ba fun bu sɔbi a li o sɛm tɔn ti ni a ŋɔ, “Sou, leene i kpok ti ka? Yɛrɛ i kaa bu ya a muksi ya?”

⁵⁶ Tum tagna daharɛ sou koti aa muksi ya. Koosa chiksɛ daha, ya daŋni ya tum tum tagna kinkan.

⁵⁷ Ya kunyana Yesu Kristo funɛ nyaŋi sou. Chendaha ya zaami Koosa.

⁵⁸ Mu bi daŋnɛ, ma kpak nɛnɛ aa tum ya kunyan ti tuma kinkan. Ma zim di chenani maa tum tuma a nyɛ un, a wa zi wa ya yɔri.