1 Kɔr. 14 - Tampulma

Koosa Siim Weri Papaha Kinkan Wɛ

¹ Ma nyɛ ma se sɛri awa nara daŋni ni. Ma gbanko nyɛ ma se sɛri wa papaha a naa Koosa siim weri ti kpa nyɛ ma ni. Papaha naa nyɛ yaa sɛm Koosa sɛma a li o kpok ti ni, waa kaali a maga.

² Nibine naa la sɛm sɛm kurgɛ, o wa ya di nar nɛɛ o sɛm aa nyɛ, amaa Koosa nɛɛ o sɛm aa nyɛ. A ya wu soglewa o sɛm a li Koosa siim weri ti kpok ti ni, amaa nara wa zim a muna.

³ Amaa naa la sɛm a nyɛ nara ni a li Koosa kpok ti ni, waa la suŋi ba di ba zim Koosa wɛ a la kpami ba a la belimi ba.

⁴ Nibine naa la sɛm sɛm kurgɛ, o suŋi o titirɛ, amaa naa la sɛm a li Koosa kpok ti ni, waa la suŋi Yesu nitiŋɛ ta maga.

⁵ Ma maga kote aa sɛm sɛm kurgɛ, mu fu daŋni chenu. Amaa ma kote aa sɛm a li Koosa kpok ti ni, chen zi sɔɔni mu tuhau kinkan. Nibine naa la sɛm a li Koosa kpok ti ni, waa bɔ wa naa la sɛm sɛm kurgɛ, see o koti a biksi a muna a suŋi Yesu nitiŋɛ ta.

⁶ Mu niinbisa, mu wa wa ma wati a la sɛm sɛm kurgɛ, yɛrɛ mu kaa ya suŋi ma? Mu ya chen ni, mu wa kikoti a sɛm ma chenani Koosa fun biksi min akoo biksi ma zima koo a sɛm ma a li Koosa kpok ti ni koo a nyɛ ma zim Koosa nyinbaan wɛ.

⁷ Kina nawara vɛ kpak miisa, a waa la biksi ma kin nama. Ba hu lewa akoo ba mo luŋa amaa a kuuli wara li nɛnɛ, yɛrɛ nara tima kaa yaa nu a kuuli ti?

⁸ Ba wa hu laal kaabul nara zi nuu aa saksi a la laal ni, amaa ba vɛ hu un nɛnɛ, anti la zi koti a zim aa saksi?

⁹ Chen ya ma gbanko ma sɛm sɛma a naa ba zi vɛ koti a nuuli, yɛrɛ ba kaa ya zim a muna? O ya di chene, ma chɛɛmi aa du ba nɛɛ.

¹⁰ Tɛɛnɛ nɔ maga sɛma iiu kinkan, amaa a kidigi wa to a vɛ kpak mun.

¹¹ Amaa mu vɛ nu nandigi sɛma, o duuti mu ya womne o wati ka o gbanko duuti o ya womne mu wati.

¹² Chenani ma se sɛri wa ma kpak papaha a naa Koosa siim weri ti nyɛ ma, o lawa ma daŋni a naa la zi suŋi Yesu nitiŋɛ ta ba tum tum were a gbaari.

¹³ Adaha naa la sɛm sɛm kurgɛ, o lawa o sumi Koosau o nyɛ un papaha naa la zi biksi un a muna.

¹⁴ Mu sumi Koosa wa sɛm kurgɛ ni, mu siima ya naa la sumi chen, amaa mu bambi wa zim chenani mu sumi chen.

¹⁵ Yɛrɛ mu kaa ya? Mu zi sumiu awa mu siim ti ni a sumi awa mu bambi gbanko ni. Mu zi lɔ boolau awa mu siim ti ni, a lɔ wa mu bambi gbanko ni.

¹⁶ Ma vɛ ya chen, a la zaami Koosa awa ma siima duŋduŋ ni, yɛrɛ nara kaa ya a la nɔɔni a ŋɔ ami. Ba wa zim chenani maa zaami chen.

¹⁷ Ma zaami nɛnɛ, amaa ba bambe wa to ma wati.

¹⁸ Mu zaami Koosau di o nyɛ mu gbanko sɛm sɛm kurgɛ a kaali chenani ma maga sɛm nan.

¹⁹ Amaa mu wa Yesu nitiŋɛ ta wa lagmi di ya jɛɛmi Koosa, mu yaa daŋni mu sɛm ba sɛm tama naa la zi suŋi bau. Chen bɔ wa mu sɛm ba sɛm damata a naa vɛ kpak suŋi.

²⁰ Mu niinbisa, ma wa lagmi dɔŋ ni, ma ta chi bichɛsa ba naa vɛ kpak nɛsa. Ma ka lisi nihɛɛta lise. Amaa maa daŋni a chi bichɛsa, ba naa vɛ koti a tum tum tagna kinkan.

²¹ Ba funɛ sɔbiu Koosa sɛm tɔn ti ni di o ŋɔ, “Mu zi nyɛ hɔɔra ba naa la sɛm sɛm kurgɛ, sɛm mu tuma wɛu a nyɛ nara nama ni, amaa ba wa zi nu mu wati.”

²² Koosa funɛ nyɛ nara sɛm sɛm kurgɛ di ba biksi ba naa se vɛ su un di o sɛm ta ya wutiu, amaa o funɛ nyɛ nara sɛm a li o kpok ti ni di ba biksi ba naa se su un di o sɛm ta ya wutiu.

²³ Adaha ma Yesu nitiŋɛ ta wa lagmi dɔŋ ni ka ma maga sɛm sɛm kurgɛ, ba naa vɛ nu ba sɛm ta chen awa ba naa se vɛ su Koosa wa zu, ba wa zi ŋɔ di ma zu galɛŋwaa?

²⁴ Amaa ma maga sɛm a li Koosa kpok ti ni, ba naa se vɛ su Koosa awa ba naa maga vɛ zim sɛm kurgɛ ta wa zu, ba zi nuu a la nɔɔni di ba ya tum tagna nitumɛwa. Ma sɛm maga zi zu ba bambeu.

²⁵ Ba tuha maga wu sogle zi liu ka ba zi gbiri Koosa suwachak ni a sumi un aa kiŋɔ nara ni di wuti Koosa nyɛn ma watiu.

O Lawa Ya Lagmi, Yaa Vɛ Kpak Chɛɛmau

²⁶ Mu niinbisa, yɛrɛ mu zi bu a chiksi ma maa zim? Ma wa lagmi dɔŋ ni, ma nibɛgim yaa lisi Koosa pɛgi boola maa lɔ, digi biksi ma, digi ka biksi sɛm sogle naa Koosa biksi un, muna, digi ka sɛm sɛm kurgɛ, ka digi ka biksi a muna. Ma nyɛ a nama maga maa ya chen kisuŋi dɔŋa.

²⁷ Ba naa la sɛm sɛm kurgɛ, ma nyɛ ba ya nara balɛ akoo nara batora duŋduŋ a nyɛ ba nibɛgim bɛgima nyinbaan ba sɛm, aa nyɛ nibɛgim kibiksi a muna.

²⁸ Ma wa lagmi dɔŋ ni, nandigi vɛ nyɛn dooni a la zi koti a biksi a muna, ma nyɛ ba gil, amaa ma nyɛ ba sɛm ba bambe ni a nyɛ Koosa ni.

²⁹ Koosa witinsa ba naa la zi sɛm a li Koosa kpok ti ni, ma nyɛ ba ya nara balɛ akoo nara batora duŋduŋ nyɛ ba dɔŋtima kani a nu ba sɛm tima nɛnɛ aa kilisi a maga wɛ.

³⁰ Nandigi kanɛɛ ka Koosa biksi un kundɔŋ di o wa sɛm, naa la sɛm chen gil a nyɛ nikani ti si sɛm.

³¹ Ma maga kisɛm a li Koosa kpok ti ni bu bɛgim bɛgima, chen ni ma maga zi buksi dɔŋ watiu a na kpami.

³² Ba naa la sɛm a li o kpok ti ni, o lawa ba kpak ba titiu nɛnɛ.

³³ Koosa ha wa yir ya di ya ya diŋ vɛ nuusawa, amaa di ya du balimmnɛ.

³⁴ Doonani maga Yesu nitiŋɛ ta wa lagmi, o lawa nihaana gil sɛmau. O wa deŋli di ba ya kisɛm dooni. Koosa chiksɛ naa o fun kpa nyɛ Ju tim ta ni chen biksi di nihaana tiŋ nibaala nɔɔna.

³⁵ Nihaani ta kpak wu digi di ba pɛɛsi, ba yaa la ba damsa ba pɛɛsi ba baalasa. Yesu nitiŋɛ ta yaa lagmi dɔŋ ni di ba sumi Koosa, nihaana sɛm sɛma dooni, ba zi na hiisau.

³⁶ Ma watɛɛ Koosa wɛ piilii? Ma duŋduŋ daharɛ nara fun wa biksi ma o wɛɛ?

³⁷ Ma naa la sɛm di maa sɛmu a li Koosa kpok ti ni, akoo ma kpak o siim weri ti papaha tirɛ, o lawa ma gbanko zimu di chenani mu sɔbi a nyɛ ma nan ya ya kunyan ti chiksirɛ.

³⁸ Ma bɔnɛ vɛ daŋni ma nu mu sɛm nama, ma naa kaɛɛ ta nu ba sɛma.

³⁹ Mu niinbisa, ma nyɛ ma se sɛri a kisɛm Koosa sɛma a li o kpok ti ni. Amaa ma ta tɔ ba naa la sɛm sɛm kurgɛ chen nyinbaan.

⁴⁰ O lawa ma kiya kin maga balimmnɛ.