1 Kɔr. 13 - Tampulma

Chenani Ya Daŋni Dɔŋa Ya Kibirigi A Kaali A Maga

¹ Mu koti a sɛm sɛm kurgɛ hali awa malaikasa sɛma a vɛ daŋni nara, mu chɛɛmiu a chi nibine naa ba yaa mo luŋa ka o vɛ zim o mun.

² Mu koti a biksi nara Koosa wɛ nɛnɛ o kpok ti ni, a nɛɛgi kinkan a zim Koosa kisogle a kpak kpok a zi koti a ŋɔ bi ni di o si o bar chiŋi ti ni aa la bar digi. Mu koti aa tum nan maga a vɛ daŋni nara, o ya yɔrirɛ.

³ Mu kpa mu kina maga a nyɛ fara tim ni a kpa mu titi a la du din ni a sou Koosa daha a vɛ daŋni nara, o nyɔɔra ya baŋa?

⁴ Nibine naa la daŋni nara, o yaa kpak kanyitarɛ wa nara maga ni aa la ɔm ba siki saha maga. O wa zi kpak handɔta akoo a zer o titi a daŋni sɔn.

⁵ O wa zi sɛm wu yɔrisa a nyɛ nara ni. O wa zi ya si tiina koo paan tiina. O wa zi lisi wu tagna naa nara tum a nyɛ un.

⁶ Nara tum tum tagna, nibine naa la daŋni ba, tuha wa zi sɔɔni. Nara ka tum tum were, o tuha zi sɔɔniu.

⁷ Nibine naa la daŋni nara wa na namsi, o wa zi gil nara daŋni a vɛɛn tiŋ Koosa. Kina maga yɛɛ, o yaa lisi wu werewa a nyɛ ba, a kpak bambi bɛgim wa ba ni.

⁸ Sɛm naa ba yaa sɛm a li Koosa kpok ti ni a nyɛ nara ni, a zi wa kpak bɔu wuzu digi. Sɛm kurgɛ ta ba yaa sɛm a li Koosa kpok ti ni, a zi wa gilu wuzu digi. Zima naa nara kpak, o gbanko zi wa gilu wuzu digi. Amaa daŋni wa kpak peti.

⁹ Lalaknɔ ya wa zim kina maga a vɛ koti a sɛm sɛma a li Koosa kpok ti ni nɛnɛ.

¹⁰ Yesu wa bur wa, ya zi wa ya kina maga petiu.

¹¹ Mu funɛ ya bichɛla, mu funɛ sɛmu aa la lisi bichɛl lise. Amaa mu funɛ wa bi a burgi nihɛɛ, mu funɛ gil bichɛsi yaaliu.

¹² Kin nawara ya yaa na nan, a chi chenani ya yaa nyini diga buni ni chene. Amaa wuzu digi ya zi wa na kina magau nɛnɛ. Zima zen naa ha nyɛn gantɛl ni aa wa nan, kaali zima naa maga ya kpak nanu. Saha wa tel, mu zi wa zim kina magau nɛnɛ a chi chenani Koosa zim min nan.

¹³ Adaha kina tora nyɛnɛɛ a ya wu birige. A waanɛ, si suuli, bambi bɛgim kpaki, awa daŋni. Amaa daŋni kaali a maga.