1 Kɔr. 12 - Tampulma

Koosa Siim Weri Papaha Wɛ

¹ Mu niinbisa, ma gbanko funɛ sɔbi tɔnnɛ a pɛɛsi min papaha a naa Koosa funɛ nyɛ ma a li o siim weri ti ni chen wɛ. Mu daŋni ma zim a wutirɛ.

² Ma zimu di saha naa ma ha fun vɛ zim Koosa chen, vursa a naa vɛ kpak miisa chen, funɛ dɔ ma a nyɛ ma nyuksi.

³ Adaha mu daŋni ma zimu di nibine naa Koosa siim weri ti nyɛn, o wa zi koti a ŋɔ nɔ a nyɛ Yesu ni. Nibine wa to a la zi koti a sɛm nara ni di Yesu ya o kunyannɛ, see Koosa siim weri ti nyɛn un ni.

⁴ Koosa siim weri papaha a naa o kpa nyɛ ya chen, kurgu. Amaa siim weri bɛgim ti, waa nyɛ a.

⁵ Tum ta ya kunyan ti bɔni ya chen kurgu. Amaa ya maga tum ya kunyan bɛgim ti watɛɛ.

⁶ Kpok naa maga Koosa bɔni ya chen, a maga kurgu, amaa Koosa bɛgim ti waa nyɛ ya kpok ti maga.

⁷ Koosa siim weri ti funɛ kpa o papaha a nyɛ ma nibɛgim bɛgim ni di maa suŋi dɔŋa.

⁸ Koosa bɛgim siim weri ti funɛ nyɛ bɔnɛ wa nɛha sɛma a nyɛ bɔnɛ kpak zima.

⁹ Waa nyɛ bɔnɛ se suuli a nyɛ bɔnɛ kpak kpok a koti a tiibi nara,

¹⁰ a nyɛ bɔnɛ kpok di baa tum alaazibu tuma. Bɔnɛ koti aa sɛm Koosa wɛ a li o kpok ti ni, ka bɔnɛ koti aa zim papaha a naa li Koosa wati awa papaha a naa vɛ li o wati. Bɔnɛ sɛm sɛm kurgɛ, ka bɔnɛ koti a biksi a muna aa nyɛ nara ni.

¹¹ Amaa Koosa bɛgim siim weri ti kpa papaha nama maga a nyɛ ya. O tutɔ nɛɛ, o nyɛ ya papaha a kurgi.

Ya Bara Luk Pɛksa Iiu

¹² Ma nyini chenani ya bara du. O ya kibɛgimnɛ amaa o luk pɛksa iiu. Amaa o luk pɛksa kurgɛ ta lagmi dɔŋ ni a burgi bara bɛgim. Chene Kristo du.

¹³ Ya bɔnɛ ya Ju timwa. Ya bɔnɛ ka wa ya Ju tima. Ya bɔnɛ ya yosa ka ya bɔnɛ ka dɔ ya titi. Amaa Koosa funɛ kpa o siim weri tiu a du ya maga ni ya burgi nibɛgim.

¹⁴ Nibine bara luk pɛkha duŋduŋ laata ya bara, amaa a iiu.

¹⁵ Nibine naŋgeri ŋɔɛɛ di o wa ya nin, chendaha o wa to o bara ni, o sunu. O wa ya nin, amaa o gbanko nyɛn a bara nɛɛ.

¹⁶ Nibine diŋna gban ŋɔɛɛ di o wa ya si, chendaha o wa to o bara ni, o sunu. O wa ya si, amaa o gbanko nyɛn o bara nɛɛ.

¹⁷ Bara fu kpak se duŋduŋ a vɛ kpak diŋsa, yɛrɛ o fu kaa ya aa nu? Bara fu kpak diŋ duŋduŋ a vɛ kpak misa, yɛrɛ o fu kaa ya aa nu sɔɔra?

¹⁸ Amaa chen laata Koosa fun naami ya. O funɛ kpa ya bara luk pɛksiwa a lagmi a chi chenani o daŋni.

¹⁹ Bara fu ya luk pɛk bɛgim duŋduŋ, bara fu wa zi nyɛn.

²⁰ Amaa bara luk pɛksa iiu. A maga ka ya kibɛgimnɛ.

²¹ Se wa kikoti a ŋɔ nin ni di o wara daŋni un. Nyuha gbanko wa kikoti a ŋɔ naŋgere ni di o wara daŋni un.

²² Aai. Bara luk pɛksa a naa vɛ kpoki, a ya kibirige kinkan.

²³ A naa vɛ kpak jirima, a waa ya a naa ya daŋni aa la nyɛ jirima kinkan. Bara luk pɛksa a naa vɛ weri nan, ya waa la nyini a.

²⁴ Amaa a naa weree, ya ta bu nyini a kinkan. Chendaha Koosa fun kpa ya bara luk pɛksa a lagmi dɔŋ ni, chen ni ya zi nyɛ a naa vɛ kpak jirima chen, wa jirimau.

²⁵ Adaha waligi wa to bara titi ni, amaa o luk pɛksa a naa kurgɛ chen, a maga baga nyɛn dɔŋ niu.

²⁶ Bara luk pɛkha vɛ kpak alaafɛ, o bara maga la wi chen. Nara pɛgi bara luk pɛkha digi, ba pɛgi bara magawa.

²⁷ Ma maga ya Kristo barawa. Ma maga nibɛgim bɛgim ya o bara luk pɛksiwa.

²⁸ Koosa nyɛ ma nibɛgim bɛgim tum naa ma zi tum. Koosa nitumɛ ta ya ba naa funɛ te ma suwachak. O witinsa ba naa la mɔɔli o laaboor weri ti, tiŋ o nitumɛ tawa. Koosa nibiksɛ ta gbanko tiŋ ba warɛ. Ba naa la tum alaazibu tuma gbanko tiŋ Koosa nibiksɛ tawa. Ba naa la tiibi nara awa ba naa la suŋi nara, ba gbanko tiŋ ba warɛ. Ba naa ya ba nihɛɛta aa kpami nara ka ba naa la sɛm sɛm kurgɛ gbanko tiŋ ba warɛ.

²⁹ Ma maga wa ya Koosa nitumɛ ta. Ma maga wa ya o witinsi ta. Ma maga wa ya o nibiksɛ ta. Ma maga wara tum alaazibu tum ta.

³⁰ Ma maga wara tiibi nara akoo a sɛm sɛm kurgɛ, koo a biksi sɛm kurgɛ ta muna,

³¹ amaa ma nyɛ ma se sɛri Koosa papaha birige ta ni. Ma nyɛ mu biksi ma kinkin naa kaali a nama maga.