1 Kɔr. 11 - Tampulma

¹ Adaha maa tiŋ min a chi chenani mu ya Yesu nitiŋi a la tiŋ un nan.

O Lawa Nihaana Tɔ Ba Nyuunau A Kijɛɛmi Koosa

² Mu pɛgi mau domi maa tiŋ biksi naa maga Koosa fun biksi min chen ka mu kpa un a biksi ma.

³ Mu daŋni ma zimu di Kristo ya nibaal nyuhu tiina ka nibaal ka ya o haan nyuhu tiina. Koosa gbanko ka ya Kristo nyuhu tiina.

⁴ Ma wa lagmi dɔŋ ni, nibaal naa la sumi Koosa akoo a kpa o siim weri ti kpok a sɛm sɛma a kpa kundɔŋ a tɔ o nyuha, o du Kristo wa hiisau.

⁵ Nihaan naa la sumi Koosa akoo a kpa o siim weri ti kpok ti a sɛm sɛma a ka vɛ kpa kundɔŋ a tɔ o nyuha, o du o baal wa hiisau. O haan ti chi nibine naa yaa funi o nyuhurɛ.

⁶ Nihaan vɛ kpa kundɔŋ a tɔ o nyuha, o vaan funi o nyuksi ta a ta. Chenani o ya hiisa wa nihaan funi o nyuha, o werwa o kpa kundɔŋu aa tɔ o nyuha.

⁷ O wa werwa nibaal tɔ o nyuha, domi o ya Koosa chɛmsarɛ a biksi chenani o kpok ti jirima du. Nihaan ya o baal chɛmsarɛ a biksi chenani o kpok ti jirima du.

⁸ Koosa wa fun naami nibaal a li nihaan wati, amaa o funɛ naami nihaan a li nibaal watɛɛ.

⁹ Koosa wa fun naami nibaal nihaan daharɛ, amaa o funɛ naami nihaan nibaal daharɛ.

¹⁰ Chendaha o lawa nihaan yaa zer kundɔŋu a tɔ o nyuha. Chen la zi biksi di nibaal dɔ un. Koosa malaikasa la nyini ma, adaha maa ya chen.

¹¹ Chenani ya tiŋ ya kunyan ti nan, nibaala awa nihaana ya nibɛgimnɛ o wati.

¹² Saha digi nihaan funɛ li nibaal watɛɛ, amaa lalaknɔ nihaan la lul nibaal. Kina maga li Koosa watɛɛ.

¹³ Maa lisi nɛnɛ a ŋɔ min. O werwa nihaan kisumi Koosa ka kundɔŋ vɛ tɔ o nyuhauu?

¹⁴ Ma nyɛni ni o biksi ma di nibaal nyuksa wa i kinkan, o wa wer. Chen yaa ya un hiisarɛ.

¹⁵ Amaa nihaan nyuksa nyu aa ziŋ, chen weru. Chen la zi nyɛ o wer. Koosa nyɛ un chen di o tɔ o titi.

¹⁶ Amaa nandigi daŋni o di amɔrɛ, chene ya wa Yesu nitiŋɛ ba naa nyɛn bawu maga ni, yaa tiŋ.

Chenani Ma Zi Di Ya Kunyana Diwe Wa Wuti Ni

¹⁷ Kin namawa mu daŋni mu biksi ma maa tiŋ a. Mu wa zi pɛgi ma kin ta daha. Ma wa lagmi dɔŋ ni chen wara suŋi ma, amaa o ya tau barigi mau a kaali kiwere.

¹⁸ Nara funɛ ŋɔ min ma wɛu di ma wa lagmi dɔŋ ni a sumi Koosa, ma wara kpak nɔ bɛgim. Mu lisi di a bɔnɛ ya wutirɛ ba sɛm.

¹⁹ O wa kpak beeli waligi nyɛn ma ni, chen ni ma zi kotiu a na ba naa la tiŋ wuti ti.

²⁰ Ma yaa lagmi di ma di ya kunyana Yesu diwe, ma wara di wa o nyinbaan ni.

²¹ Domi ma bɔnɛ yaa di ma titi diwewa lalaga. Lɔsa yaa kpak bɔnɛ. Bɔnɛ ka yaa nyɔu hali a dɛɛsi.

²² Yɛrɛ? Ma wa kpak damsa doonani ma zi di aa kinyɔɔ? Ma wara zɛɛmi Yesu nitiŋɛ taa? Ma wara du Yesu nitiŋɛ ba naa ya fara tim ta wa hiisarɛɛ? Yɛrɛ ma bur a daŋni mu ŋɔ ma? Mu pɛgi maa? Aai. Mu wara pɛgi ma.

²³ Nannɛ ya kunyan Yesu fun biksi min mu fun kpa un a nyɛ ma. Dusum nɛ Judas fun li ya kunyan Yesu gantɛl, o wa o gantɛl tiŋsi ta fun lagmi a di diwe. O fun kpa boroboro,

²⁴ a sumi Koosa a du a chɔksi a ŋɔ, “Mu bara nɛɛnɛ mu kpa a nyɛ ma. Maa ya chen a kilisi mu wɛ.”

²⁵ Ba funɛ di diwe ta peti, o zer gbakme a ŋɔ, “Kinyɔɔli naa chi mu chɛl nan, biksi ya wu fali bɛgimnɛ di ya wa Koosa ya nɔ bɛgimnɛ. Maa nyɔ un a kilisi mu wɛ.”

²⁶ Saha naa maga ma wa se boroboro ti a la nyɔ kinyɔɔli ti, nara zi lisi chenani ya kunyan ti sowu. Maa ya chen hali a wuzu naa o kaa wa bur wa.

²⁷ Nandigi wa se boroboro naa nyɛ ma lisi chenani o fun sou wɛ a vɛ tiŋ o nyinbaan, o wara nyɛ ya kunyan ti bara wa jirima. Nandigi wa nyɔ kinyɔɔli naa nyɛ ma lisi chenani o fun sou wɛ a vɛ tiŋ o nyinbaan ti, o wara nyɛ ya kunyan ti chɛl ti wa jirima.

²⁸ Adaha o lawa nibine maga te zaamsi o titiu nɛnɛ a zi se boroboro ti aa nyɔ kinyɔɔli ti.

²⁹ O vɛ ya chen ka nibine se a la nyɔ a, o nyɛ Koosarɛ na paan a du un ni, domi o wa te zaamsi o titi nɛnɛ a lisi di o ya ya kunyan ti barawa awa o chɛllɛ.

³⁰ Chendaha ma nidamata wi a vɛ kpak kpok ka ma bɔnɛ fun siti.

³¹ Ya fu te zaamsi ya tusa, Koosa fu wa zi di ya sɛria a kimuksi ya.

³² Wuzu digi ya kunyan ti zi wa bur wau a na tɛɛnɛ nɔ tim maga galimsa a ta ba yɔri. Chendaha o di ya sɛria a lɛrgi ya diŋsa lalaknɔ, chen ni ya wa zi gbaari ba ni.

³³ Mu niinbisa, ma yaa lagmi dɔŋ ni di ma di ya kunyan ti diwe ta, ma yaa kipɔ dɔŋa. Ma ta yaa kitaŋsi a kidiili.

³⁴ Lɔsa kpak ma nidigi, o yaa di o dam ni a zi wa. Ma ta di diwe naa vɛ kpak nyinbaan wa ma diili, chen ni Koosa wa zi na paan a du ma ni. Mu wa bur wa ma wati, mu zi biksi ma wɛ naa kaɛɛ.