1 Kɔr. 10 - Tampulma

O Wa Lawa Ma Jɛɛmi Vursa

¹ Mu niinbisa, mu daŋni ma lisiu di Koosa dobaal funɛ kok Ju tim nawaalsa ba naa maga funɛ tiŋ Mosis saha digi. Ba maga funɛ val a gali ni sɛm ti niu a kaali.

² O chi ba funɛ chaksi bau a li dobaal ti ni awa ni ti ni ka ba fun a tiŋ Mosis.

³ Koosa funɛ tum alaazibu tuma a kpa diwe a nyɛ ba di ba di,

⁴ a kpa ni a nyɛ ba di ba nyɔ. Ba fun na ka Mosis nyɛ ni li gbɛntɛl ni. Kristo chi gbɛntɛl tirɛ a tiŋ ba aa la,

⁵ amaa Koosa tuha wa fun sɔɔni a li ba nidamata ni, ka o fun chɔk ba nyabaan ni di ba siti.

⁶ Chenani ba funɛ siti chen biksi ya di ya doso a ta tum tum tagna a chi ba.

⁷ Ya ta nyɛ vursa wa jirima a chi chenani ba bɔnɛ ya. Ba funɛ sɔbiu a li Koosa sɛm tɔn ti ni a ŋɔ, “Nara kanɛɛ a di kikɔrigɛ ta a nyɔ sin kpoka a si a gɔ.”

⁸ Ya ta tum chɔkumsa tuma a chi chenani ba bɔnɛ funɛ tum chɔkumsa tum chen. Koosa fun kpu ba nara tusugsa fumlɛ datura wuzu bɛgim.

⁹ Ya ta zaamsɛ ya kunyan ti a chi chenani ba bɔnɛ funɛ zaamsi un chen. O fun nyɛ duma dusi ba ba siti.

¹⁰ Ya ta zulimi a du Koosa ni a chi chenani ba bɔnɛ funɛ zulimi a du un ni chen. O fun nyɛ malaika naa funɛ kpu nara chen, wa kpu ba.

¹¹ Kin na funɛ ya bau di a biksi ya. Ba fun sɔbi chenani funɛ ya di o biksi ya naa nyɛn tɛɛnɛ nɔ maga peti saha, di ya fiɛŋ ya wa tiŋ a chi chenani ba funɛ tiŋ.

¹² Chendaha naa lisɛɛ di o chiŋɛ nɛnɛu, o doso a ta wa cheli a chi ba.

¹³ Sintana zaamsi nibine magau di ba tum tum tagna. Chenani o zaamsi ba, o zaamsi ma gbankou. Amaa Koosa ya wuti tiina. O wa zi nyɛ wu zaamsɛ a naa kaali ma kpok, wa pu ma, chen ni ma wa zi wa chel. O zi nyɛ ma kpoku ma kpak kanyita wa wu zaamsɛ ni a yisi ma a li a ni.

¹⁴ Mu bi daŋnɛ, ma gil vursa jirima nyɛɛli.

¹⁵ Ma ya nibin nɛɛgɛwa. Adaha ma nu chenani mu ŋɔ ma nan nɛnɛ.

¹⁶ Ya wa lagmi di ya lisi ya kunyan ti siwi we, kinyɔɔli naa ya sumi Koosa a du a kpa nyɔ chen, ya wa yaa lisi o chɛl naa funɛ li a suŋi ya chenee? Boroboro naa ya yaa kpa se chen, ya wa yaa lisi o bara naa funɛ sou a suŋi ya chenee?

¹⁷ Ya maga ya nibɛgim boroboro bɛgim ti daha.

¹⁸ Ma lisi Ju tim wɛ. Ba naa la di kikɔɔrɛ a naa ba kɔɔri a nyɛ Koosa ni chen, bɔnɛ ba wa a ya kibɛgimnɛɛ?

¹⁹ Chenani mu daŋni mu ŋɔ ma ya di vursi ta kidigi wa ya kundɔŋ, akoo kikɔɔrɛ ta ba kɔɔri aa nyɛ a chen, a wa ya kundɔŋ.

²⁰ Mu ŋɔ mau di ba naa vɛ ya Ju tima, ba yaa kɔɔri kɔɔrɛ a nyɛ alizin tagna nɛɛ. O wa ya Koosarɛ ba kɔɔri aa nyɛ. Mu wara daŋni ma wa alizin tagni ta ya kibɛgim.

²¹ Ma wa kilagmi a nyɔ ya kunyan kinyɔɔli ti a bu la nyɔ alizin tagna kinyɔɔlɛ. Ma wa kilagmi a se ya kunyan boroboro ti a bu la se alizin tagna namsa.

²² Ya daŋni ya kunyan ti na paannɛ a du ya nii? Ya waa kpok a kaali unn?

²³ Ma bɔnɛ yaa ŋɔ dɔŋ ni, “Ya kpak nyinbaanu wa yaa ya kina maga ya daŋniu.” Amaa kina maga laata la suŋi ya di ya tiŋ Koosa aa gbaari.

²⁴ O wa werwa nibine kidaŋni o duŋduŋ suŋi, amaa o lawa o daŋni o dɔŋtima suŋi gbankou.

²⁵ Ma kpak nyinbaan wa ma se nɛmɛ a naa maga ba yogli a li yau ni, a ta beeli a pɛɛsi doonani o liili.

²⁶ Ba funɛ sɔbiu a li Koosa sɛm tɔn ti ni a ŋɔ, “Ya kunyan ti dɔ tɛɛnɛ nɔ maga awa kin naa maga nyɛn un ni.”

²⁷ Ba naa se vɛ su Koosa digi yir ma di ma wa un lagmi dɔŋ ni a di ka ma vɔu di ma la, ma di diwe naa o kpa nyɛ ma chen, a ta beeli a pɛɛsi doonani o liili.

²⁸ Amaa nandigi ŋɔ ma di ba kɔɔri vurrɛ, ma ta diili, domi ma daŋni ma suŋi ma dɔŋtimwa.

²⁹ O wa ya ma lisi daharɛ, amaa ma dɔŋtim ta lise daha. Chendaha mu ŋɔ ma di ma ta diili. Ma nidigi zi ŋɔ minu, “Mu vɛ chi chen, baŋnɛ mu kaa kpak mu titi mu dɔŋtim ta lisi daha?

³⁰ Mu zaami Koosa a la di, yɛrɛ nandigi kaa galimi min diwe naa mu sumi Koosa a du a la di ni?”

³¹ Amaa kina maga maa ya a la di koo a nyɔ, maa ya a maga a kinyɛ Koosa wa jirima.

³² Ma doso ma ta wa ya wu digi naa la zi chɔk ma dɔŋtim ta lisi aa muksi ba. Ju tim ta akoo ba naa vɛ ya Ju tima koo ba naa ya Yesu nitiŋɛ, ma ta wa ya chen a nyɛ nandigi ni.

³³ Maa tiŋ chenani muu tiŋ chen. Kina maga mu ya, mu yaa kpaŋiu di mu sɔɔni nara maga tusa. Mu wara lisi mu duŋduŋ nyɔɔra naali, amaa nidamata nyɔɔra naalirɛ muu lisi, chen ni mu zi kotiu a la ba a nyɛ Koosa ni.