1 Kɔr. 1 - Tampulma

¹ Mu waa, Pɔɔl, awa ya niinbe Sɔstenis zaami mau. O funɛ sɔɔni Koosa tuhau o fun nyɛ mu ya Yesu Kristo nitumi.

² Min la sɔbi tɔn nɔ, a nyɛ Koosa nitiŋɛ ba naa nyɛn Kɔrint ni. Domi ma wa Yesu Kristo ya nibɛgimnɛ, lalaknɔ Koosa dɔ ma. Koosa titi funɛ yir ma di ma wa o wati a wa burgi o bisa. O gbanko funɛ yir ba naa nyɛn bawu maga ni a sumi un di o yisi ba a li ba tum tagna ni. Yesu ya ya kunyana awa ba kunyana.

³ Ya kunyan Koosa awa ya kunyan Yesu Kristo zi suŋi mau aa nyɛ ma bara sɔɔna.

Koosa Funɛ Kpa O Siim Weri Papaha Maga A Nyɛ Ya

⁴ Mu pɛgi Koosa saha maga ma daha. Waa la suŋi ma di ma tiŋ un Yesu Kristo daha.

⁵ Ma wa un ya nibɛgimnɛ. Chendaha Koosa fun kpa o siim weri papaha a nyɛ ma, chen ni ma koti a sɛm nɛnɛ aa zim nɛnɛ.

⁶ Chenani ma fun nu Yesu Kristo wɛ chen zu ma bambe niu nɛnɛ,

⁷ domi Koosa funɛ kpa o siim weri ti papaha maga a nyɛ ma, a biksi di ma funɛ la unu. Maa pɔ ya kunyan Yesu Kristo bur waali.

⁸ Waa la zi kpa o kpok a nyɛ ma maa tiŋ un nɛnɛ, chen ni o wa bur wa, o wa zi bu na ma galimsa.

⁹ Koosa ya wuti tiina. O funɛ yir ma chen di o nyɛ ma wa o be Yesu Kristo ya chɛnsiwa.

Ma Titi Burgi Aa Di Dɔŋa Wa Amɔrɛ

¹⁰ Mu niinbisa, mu sumi mau ya kunyan Yesu Kristo sɔn daha ma maga kiya nɔ bɛgim. Ma ta waligi ma titi, chen ni ma sɛma awa ma lise ni ma zi kpak nɔ bɛgimu.

¹¹ Mu niinbisa, haan naa ba yir Kloi chen, walɛ wau a wa ŋɔ min di ma titi burgi aa di dɔŋa wa amɔrɛ.

¹² Ma amɔrɛ ti biksi di ma wa tiŋ nyinbaan bɛgim. Ma bɔnɛ ŋɔ di maa tiŋ Pɔɔllɛ, bɔnɛ Apɔlɔs, bɔnɛ Sifas, bɔnɛ ka ŋɔ di maa tiŋ Kristore.

¹³ Ma na, ma purigi Kristo tiu. Minnɛ ba fun kpaasi a mari daakakli ti a nyɛ ma chenn? Ba funɛ chaksi ma wa ni nɛ di ma tiŋ minnɛɛ?

¹⁴ Mu funɛ nyɛn ma wati, mu fun chaksi Krispus awa Gaiyus duŋduŋnɛ,

¹⁵ chen ni ma nidigi wa kiŋɔ di mu chaksi unu ka o tiŋ min.

¹⁶ Mu gbanko funɛ chaksi Stɛfanas awa o dam walɛ magau. Mu wa lisi di mu funɛ chaksi nandigi a gbaariu.

¹⁷ Kristo wa fun tum min di mu wa chaksi narawa. O funɛ tum minu di mu wa biksi Koosa laaboor weri ti a nyɛ nara maga ni. O wara daŋni mu sɛm nibinsa zimarɛ. Mu kpa chen a biksi Yesu daakakli ti siwi wɛ, chen zi tɔ o daakakli siwi ti kpoku.

Yesu Kristo Ya Koosa Kpok Awa O Zima

¹⁸ Ba naa vɛ Koosa laaboor weri ti Yesu daakakli ti siwi ti wɛ, o wa kpak nyuha ba wati. Ba naa la ya chen tiŋ din dam nyinbaannɛ, amaa ya naa vɛ nyuksi aa tiŋ Koosa, Yesu daakakli ti siwi ti ya Koosa kpok naa o kpa nyɛ ya.

¹⁹ Ba funɛ sɔbiu a li Koosa sɛm tɔn ti ni di o ŋɔ, “Mu zi nyɛ nibin nɛɛgɛ zima wa ya yɔriu.”

²⁰ Ba naa la tiŋ tɛɛnɛ nɔ tim maga zima, ba wa zim Koosa. Koosa nyɛ tɛɛnɛ nɔ tim maga zima ti ya yɔriu.

²¹ Ba zima ti wa nyɛ ba zim Koosa. Koosa nyɛ chen ya a li o zimi ni. Amaa o funɛ ŋɔ o zi la ba naa se su o laaboor weri tiu ka ya kpa un a biksi nara chen. Ba naa la tiŋ nibinsa zima ti lisiu di o laaboor weri ti ya yɔrirɛ.

²² Ju tim ta daŋni ya la biksi ba alaazibu wɛ, ka Girik tima daŋni ya la biksi ba zima ti.

²³ Amaa ya wa la biksi ba Yesu daakakli ti siwi ti wɛ duŋduŋ. Chen ya tuzɔgrɛ Ju tim ta wati, a vɛɛn ya yɔri a li ba naa maga vɛ ya Ju tim wati.

²⁴ Amaa Ju tim ta maga awa Girik tima ba naa maga Koosa fun yir di ba wa o wati, Kristo ya Koosa kpok ti awa o zima ti ba wati.

²⁵ Koosa zima naa nibinsa lisi di o ya yɔrirɛ kaali ba zima ti kinkan. Koosa kpok naa nibinsa lisi di o wa kpok kaali ba kpok kinkan.

²⁶ Mu niinbisa, Koosa funɛ yir ma di ma wa o wati, ma lisi chenani ma fun du. Ma nara tama funɛ ya nibin nɛɛgɛ a li tɛɛnɛ nɔ tim maga se ni. Tam ka fun ya nibin zene tɛɛnɛ nɔ tim maga se ni. Tam ka ya nibin zene bisa.

²⁷ Koosa tutɔ nɛɛ o fun lisi ba naa nibinsa yir womna di ba filimi nibin nɛɛgɛ ta, a lisi ba naa nara funɛ ŋɔ di ba wa kpak kpok di ba filimi ba naa kpak kpok.

²⁸ O fun lisi nibinsa ba naa tɛɛnɛ nɔ tim maga zɛɛmi awa ba naa ba ŋɔ di ba ya yɔrirɛ, chen ni o zi wa ta kin nawara tɛɛnɛ nɔ tim maga ŋɔ di a ya kibirigewa yɔri.

²⁹ Chendaha nibine wa to a la zi koti a nyɛ o titi jirima Koosa wati,

³⁰ amaa Koosa funɛ nyɛ ma wa Yesu Kristo ya nibɛgim, a nyɛ o zima ti ya ya zima. Kristo daha, Koosa wa zi bu na ya galimsa o suwachak ni. Waa dɔ ya a fun la ya nyuuna a nyɛ ya.

³¹ Ba funɛ sɔbiu a li Koosa sɛm tɔn ti ni a ŋɔ, “Ma ta nyɛ ma titi jirima. Ma ka nyɛ Koosa jirima.”