Tito 3 - NandevaBiblia

Jesús jyrojaheva japo verã

¹ Opaiteva mymandu'akahe tiñiñono jyve huvisharã'õre ipope, ñee tyhendu hareka õĩñoĩpo japo verã haikaviva.

² Avypo mbava ijeta porããhe yngavare hareka avypo potaĩ ñyrãrõjyre, pyryraihupo, heshakapo heko kavikue opaite kuareta retape.

³ Ore mba'eã kuaaha jyve arykai, ñee henduhãã, kuahãã ikohavaipi, mbai porãmbape yrokueha'i hareka mbai potakuepe. Ikoha'i porãmbavape hareka ijeshatambavape, yryreshatãã reta hareka oreĩ opa jyhaihuhaveã.

⁴ Tẽvã Tũpa Pyrỹmondojepeva heshakama pya kavikue hareka jyhaihu opaite kuaretaperã,

⁵ ñanymondojepe haimbatẽ mbai haikaviva jajapo jairã, shara ñandypareko. Ñandohe mbai porãmbavaivi, ñanymby'oa py'ahujy hareka Espiritu Santo rupii meẽ ñande tykove py'ahuva.

⁶ Jesucristo Ñanymondojepeva rupii, hetakavi ñohẽ ñandyrehe kova Espiritu,

⁷ Hai, ñanymbyheko kavi verã jyhaihukue tivishava rupii, japity verã tykove opambava ñahãrõva.

⁸ Kova rãnga hai ñee añeteva hareka aipota hykuaĩ rerejykui kova mbaire, õñehã japo verãre Tũpare jyrojavare haikaviva. Kova mbaire haikavi hareka opava pevarã poryha verã.

⁹ Tẽvã ijijokoshi ñeereii vekuare, ñee aryka'evare mbeu vekua hareka Moisés mbypara vekua japoa verã rehe ijakava. Kova mbai reta rãnga mbaivapeã haikavi hareka mbavapeã mboryshu.

¹⁰ Ĩme'ẽ potaĩ pirĩmbijao'iarã, ñimiñeeshu pente maĩrã mokuejy; hãrã potãã nyrẽndurã rỹmohẽpo tũpaovi.

¹¹ Rikuamapo hokava kuareta javyva hareka mbai porãmba japoma hareka hai pyape mbijetavaĩ jyvarehe.

Marãndu opahea

¹² Arỹmondoma Artemas maĩrã Tiquicoperã, narẽãmite ei maĩ shyrehekui Nicópolispe, shara haimaje haipe ro'ykue ahasa verã.

¹³ Mborykatu jyveshu pyryrepy'ia Zenape hareka Apolope, meẽshu maĩnunga ikotẽvehe verã ohomarã.

¹⁴ Ñandyryhevare tikuaa jyve haikaviva japo verãre hareka mborypo reta ikotẽvevare hareka kyrãrã hetapo japo reta mbai haikaviva.

¹⁵ Opaiteva ẽẽ shendievare nymarãndu. Mymarãnduka jyve ore yryraihuvare jyrojakuepe. Tũpa tymaĩkavi pyndyrehe. Amén.