Santiago 5 - NandevaBiblia

Ñymbarakuaa ikokatuva retape

¹ Pyhendu, opaite pee pikokatuvare! Pijaheo hareka pysapukehe ko jyhasa'asy ojaimbava oupe verã.

² Mbai hetapyre vekua opa ndeshi, hareka pymondeva kupiire opama hou.

³ Ita verava ijuva hareka ita vera tĩĩva ĩmepyreva opa jai hareka jaiikue haipo jere pyndyrehe hareka tata rãĩmipo pyndyroo karuhe. Mbai hehepy vekua pymbatypi ara opamapo'ia.

⁴ Pymaĩhe, koohupi mba'apo'iare mbyhepyambashuvare, pymbytavy pyrerã pymbyhepyãshu hareka haire jurure'asyvare vãhẽ Teja Ñymbaikatuva japysape.

⁵ Piko pente tykove ikokavivape ko yvy'ĩãrẽ, tykove pota pikova rãĩmi ryheve, pee rãnga vakare rãĩmi pimyngyra vãhẽserimatẽva ara jukaha verãpe.

⁶ Pee rãnga pijahehe hareka pijukareii kuareta heko kavivare, katumba haire ñykatẽỹva.

Pyhãrõ kavi hareka pimbo'e

⁷ Katynga shyryvyre, pyhãrõ kavi Ñandeja oujypeve. Pymaĩhe marãra ma'ẽty'ia hãrõ ñotyva ia mynoo verã, hãrõ kavi vãhẽshupeve aremba haiviva hareka arẽãmba haiviva.

⁸ Kyrãpo pyhãrõ kavi jyve hareka piñono kavi pyndypya; shara Ñandeja oujy verãpe vãhẽserima.

⁹ Shyryvyre, avy pypya jyrova ijuhuvi, pinimbijicheamba verã. Pymaĩ, pirĩmbijiche'ia õchepema'ẽ.

¹⁰ Shyryvyre, pyraha pindijehe marãra hasa'asy hareka hãrõ kavi Tũpa ĩñee mbeu'iare arykaivare Ñandeja hee ijeta'ihe vekuare.

¹¹ Ĩmejare vy'avare hasa'asyvape, pyhendu jyveshi Job hãrõ kaviva hareka pyhesha koñyma Ñandeja meẽshua, hareka kova heshaka Ñandeja hai pyryparekovarã.

¹² Tẽvã kova ĩãrẽ, shyryvyre avy pymeẽ piniñee vate arare, yvype maĩrã yngava maĩnungare; hãrã “ẽẽ” pererã haimaĩpo; hareka “mba'ety” pererã mba'etymaĩpo, potãã pinimbivachearã.

¹³ Ĩme'ẽ pynymbytepe vyamba'õvarã, timbo'e. Ĩme'ẽ vya'õvarã, typyraheshu Ñandeja.

¹⁴ Ĩmera'ẽ ñymbairasyva pynymbytepe? Pyhẽnoka Tũpa hoope miñaka'ia, jurure'ĩãrẽ verã hareka asaite kytyhe verã Ñandeja heepe.

¹⁵ Hãrã ñymboi jyrojakue ryheve japoava mynguerapo ñymbairasyva, hareka Ñandeja mupuãjypo; ĩme mbai porãmba japorã, hejahareiiposhu.

¹⁶ Hãme pymbeupo ijupe mbai porãmbare pijapova hareka pirure ijehe pykuera verã. Heko kaviva japova ñymboi heta ĩmere mbaikatu hareka pyrãtakue.

¹⁷ Tũpa ĩñee mbeu'ia Elías haimba pente kuimbai ñande rãĩmiva; jurure jyrojakue ryheve potaveãma haivirã, haivi jyvyãmba yvy'iãrẽ mbahapy ãño hareka ova jasy.

¹⁸ Hãrã jururemajyrãmeĩ, haivijy; yvy mbi'iajy yvyrare hareka ñotyãvare.

¹⁹ Shyryvyre, ĩme'ẽ pynymbytepe añeteva ryheva hejarã hareka ĩme'ẽ añetevape verujyvarã,

²⁰ pynymanduahe kova: Ĩme'ẽ mbai porãmba japo'ia poi mbijapokavarã, mondojepepokui ñymanoivi hareka hetapo hejahareiishi mbai porãmba vekua.