Santiago 4 - NandevaBiblia

Piñyñonohe Tũpa

¹ Maivira ou ñyrãrõ hareka ikoraiva pynymbytepe? Pyndyhevi rãnga ou, mbai potakue pypyaivi ouva, ñyrãrõñoĩ pyndyretepy.

² Pee rãnga pipota maĩnunga katumba ĩmepyreva. Pynytynyhẽ mbai potakue pipitymbava maĩnunga hãrã pupuruka, hokava rehe piñyhãã hareka pirãrõ. Pyvaheãshu pipotava shara pirureãshu Tũpa.

³ Hãrã pirurerã me'ẽhãpe, shara hekopẽã pirure, vyareiivape pipory verãĩ pipota.

⁴ Tykove Tũpa haihumba hareka ñee hendumbare! Pikuããra piñimi'ĩrũhe yvy'ĩãrẽ'õrã, peima pimbyvaishoheva Tũpa? Ĩme'ẽ pota yvy'ĩãrẽ'õ ñimi'ĩrũhearã, ñymbyvaishomahe Tũpa.

⁵ Pyrojããra Mbyparahavape heiva? “Tũpa haihu Espiritu ñandypyape ñonova”.

⁶ Tẽvã Tũpa hetave ñanymbory pya kavikue ryheve. Hãme hei: Tũpa ñymytãtãshi jyroja ijehevare, tẽvã pyakavishu oñemomishĩvare.

⁷ Piñyñono Tũpa ipope, tanta piñyñonoshi Ãña, hãrã hai ñyvãhẽpo pyndyhevi.

⁸ Piñymbojahe Tũpa hãrã hai ñymbojapo jyve pyndyrehe. Mbai porãmba japo'iare pijohe pepo; hareka pee Tũpa pota pyhaihuva hareka jichepeĩ pyhaihuvajy yvy'ĩãrẽ'õ, opa pijohe pyndypya.

⁹ Piñymbasy, piñymbypavete hareka pijaheo! Pupukatẽ verã pijaheo, hareka pyvyatẽ verã piñymbasy.

¹⁰ Piñesu Ñandeja hỹnonde, hãrã hai vatepo piniñono.

¹¹ Shyryvyre avy pijeta porãã ijehe. Pyndyryvyhea ĩñeepe ñymbyvaisho'ihea maĩrã mbivache'ia, porãã ijeta hareka mbijiche Moisés mbypara vekua japoa verã. Hãrã rĩpirĩmbijicherã, rĩñyñonoma pirĩmbijiche'ia rãĩmi rijapoĩtẽ verã.

¹² Penteĩ rãnga'ẽ meẽva mbyparahava japoa verã hareka haijy pirĩmbivache'ia maĩrã katu pyrỹmondojepeva; tẽvã mbavara nde, rĩmbivacheri verã ndapisha?

Jaikuãã pare verã

¹³ Pyhendu pe perepiva: “Ã'ẽ maĩrã pare jahapokui hokava tentape pente ãño kavi. Ñamba'ova hareka ñamavendepo kyrãrãpo ñambatykui kyrypoti”.

¹⁴ Marã'ĩrãra kyrã pijeta pikuaambatẽva mbaivara ikopo pare? Pyndyrykove rãnga ova vĩti sapy'aiteĩ jykuava, haivi opa kañyjy.

¹⁵ Haikavivepo kyrã peveĩ pererã: “Ñandeja potarã, ĩmehaĩteripo'ikoakui hareka japohapo kova, maĩrã hoka'õ”.

¹⁶ Katynga, pypya'ohe piroja pindijeheva ryheve pijetarã. Opaite kyrã jyroja'ijeheva porãã.

¹⁷ Ĩme'ẽ mbai haikaviva katutẽ japova, japoarã, mbai porãmbama japo'ẽ.