Santiago 3 - NandevaBiblia

Jajoko katupo ñandijuru

¹ Shyryvyre, avy pymbytepe hetaite toĩ pyrỹmboi'iva. Pikuaa kavi rãnga pyrỹmboi'iare mbivacheha pohyitevepokuirã.

² Opaiteva hetañoĩ jajavy. Ĩme'ẽ ĩñee rupii javymbaarã hokava hai pente kuimbai hekope kavi'ia, hete katu jokova.

³ Kavaju jurure ñañonoshu joko verãrã, jaishua japopo; hãrã ñande jaipotava rãĩmipo jaryvata hete.

⁴ Pymaĩ jyvehe varko vasure, marẽ'ỹtẽva hareka yvytu vasu mañatevã, mbyvatareva timon mishĩĩvamipy pota rahavaipi, raha.

⁵ Kyrã jyve ñaneku; hai pente ñandyretere'õ ryheva mishĩĩva, tẽvã katu heta mbai jepyhe. Pyhesha marãra tata mishĩtẽvã katu ñana tivisha'õva opaĩ hapy.

⁶ Ñaneku rãnga tata rãĩmi jyve, pente yvy'ĩãrẽ'õ porãmba ñandyretere ẽvã, opa myngya tyrete, hendykue tata vasuivitei ou hareka opa hapy ñandyrykove.

⁷ Kuaretare katuĩ jepyhe opaĩ marãrãngatuva mymba ñarõvare, vyrare, mboi hareka mymba yyhupi'iare.

⁸ Tẽvã mba'ety kuareta katu jepyheva ĩku. Hokava hai pente porãmbava katumba jepyhaheva, tynyhẽva veneno purukava.

⁹ Tẽku rupii omomba'ehashu Teja hareka Teru, hareka hai rupii jypejuajyhe kuaretare Tũpa japo vekua hai rãĩmiva.

¹⁰ Hokava tijuruivi õhẽjy ñee haikaviva hareka jypejuva ryheva. Shyryvyre, kova ha'eã rãngatẽ kyrã verã.

¹¹ Katura õhe pente yvykuaivi yy hẽ'ẽva hareka irova?

¹² Shyryvyre, katura õhe jyve igo hãkaivi aceituna? Maĩrã uva hãkare'iarapo igo? Kyrã jyve katuã pente yvykuaivi õhe yy hẽva hareka irova.

Ãrãndu vate'õ

¹³ Ĩme'ẽ pynypaũpe ĩñarãnduva hareka opa mbai kuaavarã, tyheshaka heko kavikue rupii jyrojamba ijehevape, hai mbai kuaava rãĩmi.

¹⁴ Tẽvã pyndypya poshy ryhevepirã hareka pijeshatããrã, hokava pijaporã pee pevarãĩjy, avy pimoã mbai vasumape, kyrãrã papumapo hareka piñomima añeteva.

¹⁵ Kyrãva mbaikuaa ouã Tũpaivi hokava yvy'ĩãrẽ'õvaĩ, kuaretaivi ouva hareka ãñaivi.

¹⁶ Shara ijeshatamba hareka ñymymorãmba ẽvãpe, ẽẽ jyve ñymomohẽva hareka opaĩ marãrãngãtuva porãmba vekua.

¹⁷ Katynga ãrãndu Tũpaivi ouva tynonde heko ky'ãã, heka pyavapyva ryheva, pya kavi hareka ñee hendu. Kyrãĩjy pyrypareko, ĩñee añete, hova mokueã hareka haikaviva japo.

¹⁸ Hãrã õñehãã japova pyavapy ryheva, pyavapy ryheve ñoty, mynoo verã tykove hekope kavi'õ.