Santiago 2 - NandevaBiblia

Marãndu pirĩmbivavyva rehe

¹ Shyryvyre, pirojava Ñandeja Jesucristo ñymbai katui'ivare, porããpo kuaretare pimbivavy pingarekoherã.

² Ñañonoshu pimbatypeĩvape iche ou pente kuimbai ñykuairũ orova hareka kapyry ñimimonde'iarã; hareka iche ou jyve pente pavete'ia mondeva kyava hareka tuja vekua ryheve.

³ Haivi ñymonde kavi'ivaĩ pereshu: “Kope vapy nde haikavive'õpe”, tẽvã pavete'ia pereshu: “Hokapeĩ ñymbou'ẽ nde, maĩrã vapy nde yvype”;

⁴ kyrãrã peii piñimbivavypi, hareka hekope kaviã pijapo.

⁵ Pyhendu, shyryvyre ahaihuva: Tũpa rãnga pyhyrõ pavetevare ko yvy'ĩãrẽ, ikokatu verã jyrojakuepy hareka me'ẽhashu verã tenta vasu mbeushuva haihuvare.

⁶ Pee rãnga pijapo mbaimbava rãĩmi pavete'iare. Ha'eãra iko katuvare pynymymba'apokarei'iva hareka pyndyraha'ia huvishare hỹnonde?

⁷ Ha'ẽara kuepi ijeta porãmba jyrehevare tyree kaviva Jesucristo pirojaheva?

⁸ Añeteĩte pijapo Moisés mbypara vekuarã, pijapokavipo Ñandeja ĩñee heiva rãĩmi: “Haihu ndapisha nde rijyhaihuva rãĩmi”.

⁹ Tẽvã pimbivavy papisharã, mbai porãmba pijapo hareka porãmba ĩmemapyre Moisés mbypara vekua hỹnonde.

¹⁰ Shara Moisés mbypara vekua ajemaĩpo pente jajapoã, japytama jajapombava rãĩmi.

¹¹ Shara Tũpa teivamba kyrã hei: “Avy jyrekomateã ynga typokojyhe”, heivejy: “Avy puruka”. Yngava ripotamba tẽrijya, tẽvã rupurukarã, rijapoã Moisés mbypara vekua.

¹² Kyrã pijeta hareka kyrã piko pimbivacheha'ẽ verã rãĩmi ñee mbyparahava japoha verã ñandorava ryheva.

¹³ Pyryparekombavare, mbivachehakapo parekohambape, tẽvã pyryparekova hasa kaviposhi ara pirĩmbivacheha verãĩvi.

Jairojakue jaheshaka jajapova rupii

¹⁴ Shyryvyre, mbaivapera haikaviposhu ĩme'ẽ heiva jyrojakaviva tẽvã mbai haikavivaimbatẽ japova? Katura hokava jyrojakue mondojepe?

¹⁵ Ĩme'ẽ pente ñandyryvy maĩrã ñaniindy monde verã hareka hou verã mba'etyreva,

¹⁶ haivi penteva pynymbytepe'õ heishu: “Ekuajy pyavapy ryheve, jykasoishi ro'y hareka karu nyvãtapeve”, tẽvã me'ẽãshu ikotẽvevarã, mbaivapera haikavishu hokava?

¹⁷ Kyrã jyve jyrojapeverei'ia, mba'ẽã japorã, mano vekua rãĩmi.

¹⁸ Katu ĩme'ẽ heiva: “Nde ĩmeryre jyrojakue, tẽvã ajapo she mbai haikaviva”. Shymbyheshaka rirojakue mbaimbaa japova, hãrã she aheshakapo jyve nde jyrojakue ĩme'areva mbaikavi ajapova ryheve.

¹⁹ Nde ryroja Tũpa penteĩ'õ; rijapokavi! Mbaiposhyre rojaĩ jyve kova hareka opa ryry reta kyjeiterã.

²⁰ Avy mbaimba kuaava rãĩmi'i, rikuããra jyrojakue ohoã hãndi jajapovarã, mbaivapeã haikavirãme?

²¹ Tũpa heimbashu heko kaviva ñanytynondeva Abraham japo vekua rehe, tay Isaac raha juka verãrã.

²² Ryheshara, Abraham heshakamba jyrojakue japova rupii, hareka japova rupii mbyhaikavimba jyrojakue hai ĩmereva.

²³ Kyrãmba iko arykai Mbyparahava heiva rãĩmi: “Abraham roja Tũpa, hareka Tũpa heimbashu heko kaviva”. Abraham he'iambashu Tũpa ñi'ĩrũ.

²⁴ Pyheshama, kuareta japo vekua rupii he'ia jyvehe heko kaviva; ha'ẽã jyrojakue rupiiñoĩteva.

²⁵ Kyrãmimba jehu jyve Rahab, taupe kyrãrãi'ia, Tũpa myvãhẽshu heko kaviva rãĩmi hai japova rupii, shara ñonoshu jokuehavare pyta verãpe hareka mboryshu õhẽjy verãre tape yngavaipi.

²⁶ Shara ñandyrete putũhẽãrã mano, kyrã jyve jyrojakuepe mbaimba japova, manoma.