Santiago 1 - NandevaBiblia

¹ She Santiago Tũpa hareka Ñandeja Jesucristo jokuereva, amarãndu 12 Israel ñymoñashiare opa mamaipi ohova yvy jerekue.

Ãrãndu Tũpaivi ouva

² Shyryvyre pyvy'aĩpo opaĩ marãrãva pyarãã pyhasapeĩrã.

³ Shara pikuaa kavi porãmba pyhasapeĩ pirojakueperã, ĩmevepopyre ñyhãrõkuaa.

⁴ Piñyhãã katu hokava ñyhãrõkuaa pyndyraha verã hekope kavi'õpe; opakavi pẽĩvape hareka mbaimba pikotẽvẽheape.

⁵ Ĩme'ẽ pynymbytepe mbai kuambavarã, tirureshu Tũpa, haipo meẽshu ãrãndu mba'etyrea, shara Tũpa hetakavi meẽshu mbavapemba rỹrõva.

⁶ Tẽvã tirure jyrojakue ryheve, pyhumba ryheve; shara pyhuva ova yyvasu yvytu kokoty rahava.

⁷ Kyrã'iva avypo hei maĩnunga hipity verã Ñandejaivi,

⁸ shara ã'ẽ pya mbijetahe pente mbairã, paree yngaima heijy, pente hendapeã'ẽ opa mbai japovare.

⁹ Ñandyryvy pavete'ia, jyroja katupo'ẽ ijehe mbaivasuve hai Tũpa hỹnonderã,

¹⁰ hãrã ikokatuva tyvya Tũpa mimishĩshurã. Shara ikokatuva opapo jipi pente yvoty ñuhupi'ova rãĩmi.

¹¹ Kuarasy õhẽmarã hareka hakuma'ẽrã, opa jipi, poty oashi haima mashy'ãkue opareii. Kyraĩ jyve ikokatuva opareiipo jyve mbai hipity vekuare.

¹² Vy'apo kuimbai porãmba vãhẽshurã jepyheva, shara hasakavishirã me'ẽãposhu tykove, hokava hai korona Tũpa hei vekua meẽshu verã haihuvare.

¹³ Ĩme'ẽ pya hã'ãvarã avypo hei Tũpa pyahããshua; shara Tũpa katuã pyryrãã hai porãmbape, hareka hai mbavapeã pyahããshu.

¹⁴ Kyrã rãnga, ĩme'ẽ pya hã'ãhãvarã ha'i potava raha hareka japokashu.

¹⁵ Kova japova rupii rãnga õhẽ mbai porãmbava; hokava hetaitema japoharã, ñymoñashi ñymano.

¹⁶ Shyryvy ahaihuvare, avy peii piñymbytavypi,

¹⁷ opa mbai me'ẽãreiiva hareka mbai jaikatukue hekope kavi'õ rãnga ou vate araivi Tũpaivi, japo vekua arare'õre hareka Hai ñymy'yngaiã.

¹⁸ Hai, kyrãmba pota meẽ ñande tykove ĩñee añeteva rupii, hai ñanymytynondeshi opaite hai japo vekua retaivi.

¹⁹ Shyryvyre ahaihuva, pynymanduahe kova; opaiteva kuimbaire ẽẽñoĩpo hendu verã yngava hapishare, tẽvã ha'ẽã aremba'eite ijeta verã hareka poshy verã.

²⁰ Shara kuareta poshy'iva katuãpo japo mbai haikaviva Tũpa potava.

²¹ Hãrã opa pyheky pindijuhuvi maĩnunga ky'ava hareka heta porãmba vekua, hãma pymyvãhẽ pirojamba pijehevape ñee mbe'uhapeva, hokava hai mondojepe verã pyndyrykove.

²² Tẽvã pijapo ñee heiva rãĩmi, avypo pyhendupeverei, mahẽ piñymbytavykui.

²³ Shara ñee hendupeverei'ia, japombava, hãĩny sypevape ijejeshava,

²⁴ haipe ijesha marãra'ẽ, tẽvã ohomarã sarejyhe marãra'ẽ hova.

²⁵ Tẽvã maĩkaviheva Moisés mbypara vekua hekope kavi'õ, Tũpa ĩñee hai hekope kaviva hareka ñandorava, syryãshirã, ha'ẽã henduĩñoĩteva hareka sareheva, koñeĩ japo, vy'apo opa mba'e japova rehe.

²⁶ Ĩme'ẽ heiva opa kavi japova Tũpa ĩñee, tẽvã juru jokoãrã, ha'i ñymbytavy'i hareka heireii opakavi japova Tũpa ĩñee.

²⁷ Opakavi jajapova Tũpa ĩñee ryheva hai kova: Ñambory reta tuu hareka ishyveamavare hareka ĩme manoshiare opava maĩnunga mba'etyshuape, hareka ñaĩngareko ñandijehe potamba ñaĩmyngyapya mbai porãmba ko yvy'ĩãrẽ'õ.