Romano 6 - NandevaBiblia

Ñaĩmyngarairã ñañymypente hãndi Cristo

¹ Mbaivara jaipojy? Mbai porãmba vekuaĩrapo jajapojai Tũpa hejavereii ñandyhevi verã?

² Mba'ety, kyrãã rãnga! Ñande rãnga ñamanoma mbai porãmba pevarã, marãĩrapo hykuaĩ jajapojy mbai porãmba vekua?

³ Pikuããra ñande ñaĩmyngaraiva Cristo Jesús heepe, ñañymyngaraiva hai ñymanope?

⁴ Shara ñañymyngarairã ñaniñotyha Cristo hãndi, hareka ñamano jakuerajy hãndi verã, jaikoma verã tykove py'ahuvape, kyrã Cristo kuerajya rãĩmi Tũpa Teru ñymbaikatu hĩmbipevapy.

⁵ Hãrã ñande ñañymypente hãndi Jesucristo ñymanope, kyrãpo ñañymypente jyve hãndikui kuerajyvape.

⁶ Jaikuaa kavi arykai jaiko vekua rãĩmi, mbysavavahava kurusure Jesucristo hãndi, kova porãmba jaiko vekua rãĩmi mby'opaha verã hareka jyve jaikoveama jaijokuekashu verã mbai porãmba.

⁷ Shara manomava, õhẽmashi mbai porãmba.

⁸ Hareka ñamano Cristo hãndirã, jaroja jaikojy hãndi verã.

⁹ Jaikuaa kavi Jesucristo kuerajymarã manovare mbyteivi manoveãmapo. Shara ñymano jepyveãmahe.

¹⁰ Shara Jesucristo mano, mbai porãmba vekuarerã, penteĩ mano hareka opa ara pevarãma; tẽvã ĩmeĩteri'irã, Tũpa pevarã iko.

¹¹ Kyrãipo jyvepe pikopo pymanomava rãĩmi mbai porãmba pevarã, tẽvã pimeĩpirã hai Tũpa pevarã Cristo Jesús piñymypente hãndiva rupii.

Haiveãma ñande mbai porãmba jokuerea, ñande hai hekope kavi'õ jokuerea

¹² Hãme rãnga ỹteñomapo pyma'ẽĩhe pijapokashu porãmbava tyrete potava.

¹³ Avypo pyporyka pyndyrete ryhevare mbai hekopemba'õ pevarã, kyrãte verã, piñiñono Tũpa ipope, ĩmeĩteri'ia rãĩmi manovare mbytepe, hareka pyrete ryhevare pymeẽ mbai mbi'ipuhavare mbaikaviva rãĩmi Tũpa pevarã.

¹⁴ Kyrãrã mbai porãmbava jepyveamapo pyndyrehe, shara pikoveãma Moisés mbypara vekua heiva ipe. Koñeĩ pimepeĩ Tũpa jyhaihukuepe.

¹⁵ Hãmera marããjy? Mbai porãmba vekuaĩrapo jajapojai ñaĩmeveama Moisés mbypara vekuaperã, Tũpa jyhaihukuepe ñaĩmeñaĩrãme? Mba'ety rãnga!

¹⁶ Pee pikuaa kavi ĩme'ẽ ñymeẽva jokuehareii'i verãrã, pente pyrokue'iape ñee pyhendushu verãrã, iko pyndyhevi jokuereirea ñee pyhendushuva. Hãrã kyrãjy, mbai porãmbavaĩ pijapopirã verupope ñymano, tẽvã pijapo Tũpa heivarã verupope hekope kavi'õ.

¹⁷ Tẽvã ã'ẽ ñameẽshu Tũpa ajetekue, ajemaĩ arykai hai pee mbai porãmba jokuerea, ã'ẽ pyndypyaivivema ñee pyhendu pynymbo'eahea ẽvã rãĩmi, pee pymyvãhẽ vekua.

¹⁸ Pijyhekymashi mbai porãmba vekuarã, peĩma pokueharei verã tykove hekope kavi'õ ryhevape.

¹⁹ Aijeta kuaretare ijetava rãĩmi, shara pee kuaretare pevarã javaipe pikuaa verã. Kyrã, aryka'e pymeẽva rãĩmi pyndyrete mbai kya vekuape hareka teko kavimbape pijapo verã porãmbava, ã'ẽ pymeẽ pyndyrete pokueha verã tykove kavivape hareka kyamba.

²⁰ Arykai pikoteri mbai porãmbape pokueharei'irã, pinimiñerãhãhe pymba'apohe verã tykove hekope kavi'õ ryheva.

²¹ Mbaivara pimbijehupy hokava? Ã'ẽ hokava maĩnungare pynoti, shara kova maĩnungare pyryraha ñymanope.

²² Hãma ã'ẽ pymbysyryamashiva mbai porãmba vekua, japoama pyndyhevi Tũpa jokuereva. Kova rãnga mbijehu pee pevarã tykove kyamba, hareka koñemahea pyvaĩposhu tykove opambava.

²³ Mbai porãmba hepykue rãnga hai ñymano, tẽvã Tũpa meẽva hai tykove opambava, Cristo Jesús Ñandeja ñañymypente hãndiape.