Romano 5 - NandevaBiblia

Jyrojakue japoka pya vapy hareka vy'a

¹ Hãrã Tũpa ñanymbyheko kavima shara jairoja, jareko pya vapy Tũpa handi Ñandeja Jesucristo rupii.

² Hai jairojaherã, ã'ẽ katuma jaiko Tũpa jyhaihupy, tanta ñaĩhe hareka vy'ape ñahãrõkuaa ñaĩmeñaĩ verã jyve Tũpa hĩmbipekuepy.

³ Ha'ẽã kovaĩ, javya jyve jyhasa'asype, shara jaikua kova verupo ñande ñyhãrokuaa,

⁴ hareka ñyharõkuaa rupiipo ñanymbyhaikaviha hareka ñahekavirã hokava meẽ ñande ñyhãrõkaviva.

⁵ Hareka hokava ñyhãrõkuaa ñanymbytavyãpo, shara Tũpa jyhaihukue mynyhẽ ñandypya Espiritu Santo rupii me'ẽha ñandeva.

⁶ Shara katumba jahajepevape, jy'arape kavi Cristo manomba ñandyre ñandyreko porãmbava.

⁷ Ãñeteite ha'ẽã javaimbava penteva hykove meẽ manohe verã kuareta heko kaviva, ajemaĩpo ĩme'ẽ kyrẽỹ mano'ia heko kavi'iare rehe.

⁸ Tẽvã kovape Tũpa heshaka ñande jyhaihukue, mbai porãmbapeteri jairã, Cristo mano ñandyrehe.

⁹ Hãme rãnga ñanymbyhekoa kavimava huvype, hai rupii jahajepeiteveposhi Tũpa jahepyryreheaivi.

¹⁰ Ajemaĩ ñaĩñymbyvaishotẽhe Tũpa, Tay ñymano rupii ñaniñonoãjykavi hãndi, hareka hai ñaniñonojy kaviteve hãrã jahajepepo Tay hykove rupii.

¹¹ Hãrã Tũpa ñanymbyvy'ama jyve, katy ã'ẽ me'ẽã ñande ñaĩkavijy hãndiva Ñandeja Jesucristo rupii.

Adán hareka Cristo

¹² Kyrã, pente kuimbai rupii mbai porãmba ichemba yvy'ĩãrẽ, hareka mbai porãmba rehe ou ñymano; hareka opaiteva kuaretare manotẽ verã, shara opaiteva mbai porãmbavẽĩ japo.

¹³ Ndeiteri Moisés mbypara vekua japoa verã ẽrãvãĩmba õĩ arykai mbai porãmba ko yvy'ĩãrẽ, tẽvã Moisés mbypara vekua mba'etyvape, mbai porãmba ma'ẽhãhe.

¹⁴ Tẽvã, hykovevare Adánvive Moisés peve ikojyre ñymano ñymbaikatu ipe, mbai porãmba japomba retave, a'ãmo maĩnungape, Adán oova Cristo.

¹⁵ Hãrã mba'ety, ñamyhã'ãngahe verã ñymbai porãmba vekuare hareka Tũpa mbai meẽreii ñande vekuare. Adán ñymbai porãmba vekua rehe, hetamba manova; tẽvã Jesucristo rupii Tũpa meẽreii ñande mbai vasuiteveva hareka mbai kavi hetavare pevarã.

¹⁶ Mbai porãmba Adán japo vekua katuã ñambivajehe Tũpa meẽreivare. Penteva mbai porãmba japova rehe ou ñunupa pyryrahava jaheapyryrehevape. Mbai porãmba hetava japova rehe ou Tũpa meẽreiiva pyrỹmbyheko kavi verã.

¹⁷ Kyrã pente kuimbai ñymbai porãmba rehe ñymano ẽẽ kuareta retare, tẽvã pente kuareta rupii, Jesucristo ẽẽpohe tykove myvãhẽvare Tũpa mbai meẽreiiva hareka mbai kavi me'ẽãreiva ñanymbyheko kaviva.

¹⁸ Adán ñymbai porãmba vekua rupii, Tũpa heimbahe opaiteva ñamano verã, tẽvã Jesucristo heko kavikue rehe, mano ñandyrehe vekua, Tũpa heima ñandyrehe ñandyreko kaviva hareka meẽ ñande tykove opamba.

¹⁹ Shara kyrã pente kuimbai ĩñee rẽndumbaa rehe hetava he'iahe heko porãmbare, pente kuimbai ĩñee rẽnduva rehe hetava he'iapohe heko kaviva.

²⁰ Moisés mbypara vekua japoa verã me'ẽãmba opaiteva kuaretare kuaa mondo'ijehe verãre mbai porãmba ĩmereare, tẽvã kuaretare japoiteve raha porãmbarã, haipe Tũpa jyhaihukue ñymbyhetavee.

²¹ Shara kyrã mbai porãmbava ouma ñymano ĩãrẽrã, me'ẽãreiiva ouma ĩãrẽ mbai kavi tykove opamba verã Ñandeja Jesucristo rupii.