Romano 3 - NandevaBiblia

¹ Jaheshapo: Haikavira Judiorã jairãme? Haikavirapo ñandipire ñachichĩkarãme?

² Ãñete haikavi rãnga! Tynonde, Tũpa ĩñee Judiore me'ẽãshu.

³ Ĩme'ẽ Judiovare Tũpa ĩñee rojambarã, hãmera haire rojaarã, Tũpa japoãpo jyve hai ĩñee meẽ vekua?

⁴ Kyrãã rãngapo! Ajemaĩpo kuaretare japu, Tũpa añetevañoĩ hei. Shara Mbyparahavape hei: “Opaitevapo kuaa añetevañoĩ rereva. Hãrã rẽhe kavipo nimbivachehaka'ẽrã”.

⁵ Tẽvã katuãpo jai Tũpa hekope kavimba'ia poshyrã hareka ñanunuparã. Mbaivarapo jai? Tũpa hekope kaviãra'i ñanunupa'i verã? (Kuaretare ijetava rãĩmi aijeta).

⁶ Kyrãã rãngapo! Tũpa hekope kavimba'iarã, marãrapo mbivacheka kuaretare?

⁷ Ĩmepo'ẽ heiva: Tẽvã shapukue rupii añeteva Tũpa ryheva ñymbyheta hai õmomba'ea verãrã, marã'ĩrãra ĩmeĩ shimbivachehakapi mbai porãmba japo'ia rãĩmi?

⁸ Kyrãrã, marã'ĩrãra japohãã porãmbava, haikaviva ou verã? Hokava rãnga he'iha she kyrã amboiva, pota porãã ijetaha shyreherã. Kyrã heiva haikavi jaheahe verã.

Mba'ety heko kaviva

⁹ Aipota hai kova, Judio retara haikavive ñaĩ yngava retaivi? Mba'ety rãnga! Hai ãĩva rãĩmi, ajemaĩpo Judio ñande maĩrã ha'ẽã, opaiteva rãnga ñaĩmeñaĩ mbai porãmba ñymbaikatu ipe.

¹⁰ Kyrãã rãngapo! Shara Mbyparahavape hei: “Añete mba'ety heko kaviva.

¹¹ Mba'ety kuaava, mba'ety hekava Tũpa.

¹² Opaiteva hai heja reta, pepenteĩ ikoshi kuareta mba'erãmbava”.

¹³ Koñeĩ porãmbavaĩ hei reta haĩ ta'õve ñotỹhaseape jypea'õ rãĩmi pishe. Koñeĩ pyrỹmbytavy jyre. Ĩñeepy pyrỹmbai jyre mboi ñyveneno rãĩmi.

¹⁴ Ñee porãmba vekuaĩ pory reta hareka jypejuse.

¹⁵ “Arereã jyre puruka verã.

¹⁶ Ohova retaipi, opa pyrỹmambai hareka heja vy'a ãkue.

¹⁷ Katuã pya vapypeñynoĩ.

¹⁸ Kyjeãshi reta Tũpa”.

¹⁹ Jaikua rãnga ñee mbyparahava japoa verã haiva Judiore pevarã, shara haire ĩmere ñee mbyparahava japo verã, mbavamba heijy verã “ha'eã she mbai porãmba japo'ia”, opapaveĩ ñymbeu verãre mbai porãmba japovare Tũpa hỹnonde.

²⁰ Shara ñee mbyparahava japoa verã rupii mba'ety ñymbyheko kavi verã Tũpa hỹnonde, shara ñee mbyparahava japoa verã rupii ñanymbykuahaka mbai porãmbape ñaĩme ñaĩrã.

Jairoja rupii jahajepe

²¹ Tẽvã ã'ẽ, arykai ñee me'ẽã vekua rãĩmi ñee mbyparahava japoa verã hareka Tũpa ĩñee mbeu'iare jy'arape, ã'ẽ Tũpa ñanymbyheko kavi tekotẽvemba jajapova ñee mbyparahava japoa verã.

²² Jyrojakue rupii Tũpa mbyheko kavi opaite Jesucristo rojavare, mba'ẽãshu haira Judio maĩrã ha'ẽãra.

²³ Shara opaiteva mbai porãmbava japo, hãme rãnga katuã japity Tũpa hĩmbipekue,

²⁴ tẽvã Tũpa meẽ jyhaihukuepy mbaimbape ñanymbyheko kavi, mbyhepya ñandyrehe ñanynohẽajy verã Cristo Jesús japova rupii,

²⁵ Tũpa meẽmba ñanyrẽndakuepe mano verã hareka kyrã mbai porãmbava hejahareishu verãre jyrojaheva huvy rupii hareka kyrã Tũpa heshaka hai hekokaviva, shara hai hãrõkuaa rupii jaheãmbahe aryka'e mbai porãmba japovare,

²⁶ hãrã ã'ẽ ara ñaĩmevape, heshaka jyve poimbaa heko kaviva, mbyheko kavi opaite Jesús jyrojahea.

²⁷ Tũpa hỹnonde, mba'etyjare maĩnunga jairoja jai ñandijehe verã, shany Tũpa heima ñande, shara jairojahe Jesucristo, hareka ha'ẽã jajapo Moisés mbypara vekuarã.

²⁸ Hãme rãnga he'iha Tũpa ñanymbyhekokavi jairojaherã, hareka ha'ẽã Moisés mbypara vekuape'õ jajaporã.

²⁹ Tũpa ha'ẽã Judio retaĩ ñu Tũpa, opaiteva ñu Tũpa rãnga, ajemaĩpo haimba judiovare.

³⁰ Koñeĩ penteĩ'ẽ Tũpa, hareka hai Tũpa mbyheko kaviva opaite Jesucristo jyrojaheare, ajemaĩpo haimba Judiovare.

³¹ Tẽvã Jesús jarojarã, hokava he'iseã ñee mbyparahava ikoveãmava, añete hai jairojaherã ñamypyrãtavema ñee mbyparahava.