Romano 2 - NandevaBiblia

Tũpa pirĩmbivache hekope kavi

¹ Hãme rãnga mba'etyma rere ndijehe verã, jaishu ĩmerãẽva nde rĩmbivachekariva. Kyrã rijaporã ndeiima rĩñimbijichekari, shara haire rãĩmi rijapo jyve maĩnunga.

² Jaikua rãnga Tũpa mbivacheka mbai porãmba japo'ia retaperã, hekope kavi mbivacheka.

³ Nde rĩmbivachekariva yngare, kyrãmi rãnga rijapori jyve, mbyryny rijavy. Rĩmoãra katu rỹkañyshi Tũpa ñunupa?

⁴ Rĩmbijiche, opambava Tũpa ñymbai kavi, pyakavikue, hareka ñyhãrõkuaa, rikuamba rỹmondova hokava ñymbai kavikue katu ndyverujyva Tũpa kyty.

⁵ Tẽvã ndypya tantaivi rĩmbeujyvyãhe porãmba vekuarã, rỹmbatypo ryraha ñunupa ndeii pevarã ara poshy pevarã, Tũpa heshakapokui ñimbivache hekope kaviva.

⁶ Shara Tũpa pepenteĩpo meẽshukui japo vekuare rupii.

⁷ Tũpa meẽposhukui tykove opambava, opaite haikavivaĩ japo'iare, haikavivaĩ Tũpaivi hekavare, mandu'akavihea hareka pente tykove katumba mambaihava.

⁸ Tẽvã pota ha'epaite'iare, poshypepo jahehekui, he'iseva opaite añeteva ñymbyvaisho'iheare, hekopemba'õvaĩ haihuva.

⁹ Opaite heko poshyvare jahehapohekui hasyshurã jyvarehea; tynondepo'ẽ, Judiore hareka jyve haimba Judiore.

¹⁰ Hãma haikaviva japoñoĩ'iare, Tũpa meẽposhukui tenda haikaviva, mbyvetehapo hareka pyavapy, tynondepo Judiore hareka jyve haimba Judiore.

¹¹ Shara Tũpa hỹnonde kuaretare opaĩ jyvache!

Judiore hareka mbyparahava japoa verã

¹² Opaiteva porãmba japo'iare kuambava Moisés mbypara vekua japoha verã, jyvarehapohekui mbyparahava japoa verãmbape; hãrã opaite mbai porãmba japova Moisés mbypara vekua kuaatẽvã, mbyparahava japoa verãpypo mbivachehaka.

¹³ Shara Tũpa mbyheko kaviã Moisés mbypara vekua hẽndupeveĩ'ia, koñeĩ hendurã japovaĩ.

¹⁴ Shara haimba Judiovare japo jyve ñee mbyparahava japoha verã Tũpa ryheva, ajemaĩ kuambatẽva, shara haire kyrã potarã, kuaa reta mbaivara haikaviva hareka mbaivara porãmba.

¹⁵ Kyrã heshaka reta haire ĩmereare pyape, ñee mbyparahava Tũpa ña'ãpova. Haire pyape'õtei my'añeteshu reta, hareka pya mbijetaheape heiposhu reta haikavivara maĩrã porãmbara.

¹⁶ Opaitepo ikokui kova vãhẽma ara Tũpa mbivacheka verã Cristo Jesús rupii opaite kuaretare ñomire vekuarã, kova Ñee Kaviva ambeuva heiva rãĩmi.

¹⁷ Nde rĩmbyheeriva Judio, rirojahe Moisés mbypara vekua hareka nu Tũpa rehe rirojajy ndijehe.

¹⁸ Rikuakavi Tũpa potava, hareka rikatu ryhekapy, haikaviva hareka porãmba. Shara kyrã nymboi ñee mbyparahava japoha verã,

¹⁹ rirojajy ndijehe moa rikatu ryrahava heshamba kũvaĩpiare hareka rysapeshu verã pyntuaipi'iare.

²⁰ Shara ĩmeryre ndepope Moisés mbypara vekua japoha verã, rerema ndijehe nde haiva ñymboimbare mboirea hareka ãrandu ija hareka añeteva.

²¹ Tẽvã, marãĩrapo rỹmboijy yngare, nderãnia tynonde rikuarã? Marãrapo rỹmboijyhe manarõmba verã, ndeteiva rỹmanarõrirã?

²² Nde rereva yngangava pota'ijya japohamba verã, marã'ĩrãra rijapo? Rỹmymorãã ta'ãngare, tẽvã marã'ĩrãra rỹmanarõjy jytũpao retape?

²³ Rirojahe ĩmeryre Moisés mbypara vekuarã, tẽvã rijapoã, kyrã remomba'ẽãshu Tũpa.

²⁴ Añetei rãnga Mbyparahava heiva rãĩmi: “Kuareta haimba Judiovare ijeta porããhe Tũpa, pyndyrehe rupii”.

²⁵ Mba'ẽã rãngaposhu mbava pire chĩchĩka'i Moisés mbypara vekua japoãrã, mbijicheĩrã, hãĩny haimbatẽã pire chĩchĩkava.

²⁶ Ajemaĩ haimbatẽ hai pire chĩchĩavare, tẽvã japo hai reta Moisés mbypara vekuarã, Tũpa ryheva retama jyve, ajemaĩ pire chĩchĩkambatẽãre.

²⁷ Hãme rãnga Moisés mbypara vekua japovare nimbivachekapo, ajemaĩ pire chĩchĩhãmbatẽ haivare. Shara nde ndipire chĩchĩhãmatẽvã hareka ĩmematẽ ryreva Moisés mbypara vekua, mapemba pijapotẽã.

²⁸ Shara añeteĩte Judiova ha'ẽã Judio ikova rãĩmi ikova, hareka heshahahe verã rãĩmi hetere chĩchĩkava.

²⁹ Judiore añeteĩteva hai ñee mbyparahava Tũpa ña'ãpova pyaivive japova, Espiritu Santo rupii, hareka ha'ẽã mbyparava rupii. Kyrãva kuaretare Tũpa pysyĩma hai, ajema kuaretare mbijichetẽvã.