Romano 16 - NandevaBiblia

Ñymarãndu haiteivare

¹ Hai pee ñaniindy Febepe, hai tũpaope mba'apo'ia Puerto Cencreape.

² Airurepe Ñandeja heepe pymyvãhẽ kavishu verã, tyryvy heko kyambare jajapose hãndia rãĩmi jyrojakuepe; hareka pymboryhe maĩnunga mba'etyreva ikotẽvehea, shara hai hetavape mbory hareka she shymbory jyve.

³ Pymarãndushu Priscila hareka Aquilape, shymbory'iare Jesucristope amba'aporã.

⁴ Haire ijehuãhe reta shykove, mondojepe verãre hareka ha'eã sheĩ shy ajetekue ameẽshuare, katy opaite tũpaore haimba Judio reta jyve.

⁵ Kyrãmi jyve, pymarãndu jyve she ñandyryvyre ñymbatyva Priscila hareka Áquila hentape. Pymarãndu shi'ĩrũ ahaihuva Epéneto, hai jyve tynondeite Cristore jyrojava Asiape.

⁶ Pymarãndushu María, heta mba'apova jyve pynymbytepe.

⁷ Pymarãndu Andrónico hareka Junías, sherẽntarãre hareka shi'ĩrũ shymbyperesoa hãndi vekua, hai reta haihuhava Apostolre hareka haire tynondeve jyroja shyhevi Cristore.

⁸ Pymarãndushu Ampliato, shi'ĩrũ ahaihuva Ñandeja rehe.

⁹ Pymarãndushu Urbano, ĩrĩ'ĩrũ Cristo ryheva hareka ahaihuva Estaquis.

¹⁰ Marãndushu Apeles, Cristo rehe heta heshaka jyrojakue Cristo rehe, hareka jyve Aristóbulo ñymoña hãndiare.

¹¹ Pymarãndushu sherẽntarã Herodión hareka opaite Narciso ñymoña hãndiare Ñandejare jyrojavare.

¹² Pymarãndushu ñaniindyre Trifena hareka Trifosa, Ñandeja ryhevape mba'apovare hareka haihuhava Pérsida, heta mba'apova jyve Ñandeja pevarã.

¹³ Pymarãndushu Rufo, Ñandeja pyhyrõ vekua hareka ishype, hai jyve shesy rãĩmi areva.

¹⁴ Pymarãndushu Asincrito, Flegonte, Hermes, Patrobas, Hermas hareka ñandyrvyre õĩ hãndivare.

¹⁵ Pymarãndu jyve Filólogo hareka Julia, Nereo hareka hiindy, Olimpas hareka tyryvy heko kyambare õĩ hãndiare.

¹⁶ Piñymarãndu opaiteva pente jypyte kyambape, jyrojavare jypykuava rãĩmi. Opaite ñandyryvyre jyrojava mondope ñymarãndu.

¹⁷ Shyryvyre, airure pee pingarekoshi verã ñimbijao ryheva veruva hareka pyrỹmbyvapiva ñono'iare, hai hokava ñymbyvaishoheva pynymbo'eaheva pymyvãheva. Hokava kuaretare avy pihia,

¹⁸ shara jyrojãhe Ñandeja Jesucristo, koñeĩ ha'eire hete potavape ijokueka'iare hareka ñee mbevepeĩ hareka añeteva nungape mbytavyshu pya poshymbape.

¹⁹ Oparupi mbe'uha piniñeẽ rẽndurã, hokava shymbyvy'a. Aipota pyny'arãndu haikaviva pijapo verã, hareka pikuaãpopi porãmba pevarã,

²⁰ kyrãrã Tũpa pyakaviva areãpo pyrõ ñonohekui Satanás pepy ipe. Ñandeja Jesús jy'ajetekue toĩ penendie.

²¹ Pymyvãhẽ jyve Timoteo ñymarãndu, shymba'apo ĩrũ hareka jyve Lucio, Jasón hareka Sosípatro, shyrẽtarãre.

²² She, Tercio, ambypara ãĩ kova kuatia, amondo pee marãndu Ñandeja heepe.

²³ Pynymarãndu Gayo, shymyhendava hareka opaite tũpaore. Erasto mymarãndu, hokava tentape kyrypoti ñyngareko'ihea hareka ñadyryvy Cuarto.

²⁴ Ñandeja Jesucristo jyhovasakue tõĩ penendie opaiteva. Amén.

Mbyrahe Tũpa pevarã opahea

²⁵ Japyraheshu Ñandeja, hareka katu mypyrãtava shi Ñee Kavi hareka Jesucristo mbe'uhava kuaahambava heshahakava rãĩmi arykai ñomihareva,

²⁶ Tẽvã ã'ẽ ñanymbykuaaka hokava japoa verã Tũpa ĩñeẽ mbeu'iare mbyparava rupii. Tũpa opa ara ikova ñono tenta vasure kuaa verã japoa verã roja verãre hareka ñeẽ hendushu verãre Tũpa.

²⁷ Tũpa penteĩ'õ, koñeĩ iñarãnduva, hĩmbipe opa arape Jesucristo rupii! Amén.