Romano 14 - NandevaBiblia

Jyrojakuepe pyrãntambaterivare

¹ Pymyvãhẽ kavishu jyrojakuepe pyrãntambaterivare, tẽvã avy pijakapi handi reta.

² Ñañonoshu, ĩme'ẽ pya mbijetava hou verã opaĩ marãrãngatuva ho'uavare, katynga jyrojakuepe pyrãntambaterivare, koñeĩ hou reta ñotỹhavare ia.

³ Haikavi opava mbai houva, ha'eã mymorãmba verã kyrãva maĩnunga houmbaa hareka houmbavare ha'eãjy ijetareiihe verã opa mbai houva, shara Tũpa jyvacheĩ myvãhẽshu.

⁴ Hãma nde yngava jokue'õ rỹmaĩrihea, mbavara nde kyrãri verã? Jokue'õ rãngapo kuaa mba'apokavira jokuerea. Hai pyrãtapo'ẽ shara Teja mypyrãta ñonoshu.

⁵ Ĩme'ẽkuei pente ara mbivavyva, tẽvã ĩme'ẽjykuei heiva ara jyvacheĩva. Hãme rãnga pypyape pyrojava pymypyrãnta jyvyĩpo.

⁶ Hãrã pente ara mbyveteveva ĩrũ araivi, kyrã japo Ñandeja pevarã. Hãma opava hou'iare japo jyve Ñandeja pevarã, shara meẽ jyveshu Tũpa jy'ajetekue; kyraĩ jyve maĩnunga houmbare japo Ñandeja pevarã shara meẽ jyveshu Tũpa jy'ajetekue.

⁷ Mba'ety ñanymbytepe ijupii pevarã hykove'ia, kyrãĩjy mba'ety ijupii pevarã manova.

⁸ Ñaĩmeterijairã, jaiko Ñandeja pevarã, hãrã ñamanomarã, ñamano Ñandeja pevarã. Kyrã ñamano maĩra ñaĩmeteri jairã, Ñandeja ña'ãpova ñande.

⁹ Ha'erã rãnga Jesucristo mano hareka kuerajy manovare mbyteivi, ikoshi verã manova hareka hykove teri'iare Ija.

¹⁰ Mbaiva rehera rijetarihe ndyryvy jyrojava? Marã'irãra ryheshatãã? Opaiteva rãngapo ñande jahakui Tũpa vapy'õ hỹnonde maĩhe verã marãra jaiko.

¹¹ Mbyparahavape heiva rãĩmi: “Shiñee ameẽ hei Ñandeja, opaitevapo ĩñesu shynondekui hareka heipo reta she haiva Teja”.

¹² Kyrãrã pepenteĩpo ñaĩkui Tũpa hỹnonde ñanimbivache verã.

¹³ Hãrã avypo jaijetajai ijehe, avy ñañonoshu ñandyryvy jyrojava ity verã mbai porãmbape.

¹⁴ She aikuaa, aroja Ñandeja Jesús rupii mba'ety ijuhuvii mbai kyavarã, ĩme'ẽ pya mbijetavarã pente mbai hai pevarã kyarã, ha'ei pevarãĩ kya.

¹⁵ Tẽvã reuva rehe vy'ã i ndapisharã, rikoveãma jyhaihukuepe. Avy heja reuva rehe tata vasupe opakui Cristo manohe vekua.

¹⁶ Avy pyheja ijetaha porããhe mbai kavi ĩmepyrea.

¹⁷ Shara Tũpa vapy'õpe ryheva ha'ẽã karu maĩra ñymbyuva, koñeĩ hekope kavi, pya vapy hareka vy'a Espiritu Santope.

¹⁸ Kyrã japova Cristo pevarã hai, pya ohohe Tũpa hareka kuaretare mymorãshu.

¹⁹ Kyrãpo ñañehãã jaiko verã vy'ape, ñañymboryñoĩ verã hareka pepenteĩ ñañymykyrẽỹ jaraha verã tynonde pya vapy.

²⁰ Avy mbaishi Tũpa japova ho'uava rehe. Ãñete opa mbai ky'ã, porãmba rãnga hai jaityjy pente kuareta jauva reherã.

²¹ Haikavive ja'ũã soo hareka ñambusururuã vino, avy mbaiva japo rity verã ndyryvy jyrojava.

²² Hokava jyrojakue ĩmeryreva, natu nde pevarãĩ Tũpa hỹnonde. Vy'apo hokava mbai haikavi japova mbaivamba jochavape hareka japova rehe porãmba'ẽ verã.

²³ Tẽvã pyhuva ho'uava rehe, ha'ei jyvare ijehe; shara japoã jyrojakue ryheve hareka opaite jyrojakue ryhevamba japoava, hai mbai porãmba.