Romano 13 - NandevaBiblia

¹ Opaitevapo ñaĩñyñono mburuvishare ñonohavare ipope. Shara mba'ety mburuvisharã'õre oumbaa Tũpaivi, hai rupii rãnga ñonoha reta.

² Hãme rãnga, huvishare ñymbyvaishohevare, pũãhe Tũpa ñonova hareka kyrã'iva jaheapohe retakui.

³ Shara huvishare ñonohãã myngyje verã haikaviva japo'iare, koñeĩ porãmba japo'iare. Nykyrẽyra huvishare rykyjembashiape riko? Akuarã japo haikaviva hareka ryheshapokui haire ijeta kavi ndyreherã.

⁴ Shara haire ẽẽ jyve Tũpa heiva japo verã haikavinde verã. Tẽvã mbai porãmba rijaporã rykyjepo, shara kyse pukuva rahareiãã reta, koñeĩ Tũpa ipope ẽẽ jyve hai rupii jahehe verã porãmba japo'ia.

⁵ Hãrã, haikavipo opaiteva ñaĩñyñono mburuvisha ipoperã; ha'ẽã potãã jahe ñandyreherã, shara jaikuaa haikavirã.

⁶ Mburuvishare Tũpa ipope ẽẽ jyve reta hareka japo ñynoĩ japo verã. Hãme rãnga pee pymbyhepy jyve tenta jurureva.

⁷ Hãme rãnga pymbyhepyñoĩposhu ẽẽva rãĩmi pymbyhepyshu verã, tenta jurureva maĩrã mburuvisha jurureva, pymbyvete maĩrã pymytynonde jyveshu.

⁸ Avy jipiashu mbava. Koñeĩ jaipiahe verã hai jaijyhaihu opaiteva; shara hapisha haihuva, opa kavima japo ñee mbyparahavape heiva rãĩmi.

⁹ Shara ñee mbyparahavape hei: “Avy jyrekomatẽã ynga typokojyhe, avy puruka, avy manarõ, avy potarai ndapisha ña'ãpova”; tẽvã kovare hareka opaite ñeẽ japoa verãivi penteapeĩ ñonoha: “Haihu ndapisha nde rijyhaihuva rãĩmi”.

¹⁰ Jyhaihukue ĩmereva mba'ety porãmba japohe verã hapisha; hãrã jyhaihukuepe hekope kavi japoha ñee mbyparahava.

¹¹ Pijapo kova pynymanduahe jaikovape vãhẽma ara jasareko verã typehykueivi. Shara ã'ẽ jahajepe verãpe kõõĩtevema ou jypyite ñee kavi jarojarã vekuaivi.

¹² Pyntukue ouve'i hareka vãhẽmapo ara kõĩva; hãrã japoi jajapo mbai pyntuaipi'õvare hareka ñaĩmimondepy ijochahapya hendyva syndaro rãĩmi haikaviva jajapo verã.

¹³ Hekope kavi jaiko, arapeva rãĩmi hareka japoipo jajapo mbai porãmba, karuraivambape, jakaumbape, yngangavamba iko'i handia hareka kyrãrãĩmba'ia, avy jaiko jaijeshashatãã hareka ñaĩmymorãmbape.

¹⁴ Haikavive, pimimondepy Ñandeja Jesucristo hareka avy pijapo kyavare pyndyretere potava.