Romano 11 - NandevaBiblia

Tũpa mbijicheãshu hai ryheva reta

¹ Hãme rãnga apyrãndu: Tũpa mbijicherashu hai ryheva reta? Mba'ety. She hai jyve israelita, Abraham ñymoñashia, Benjamín henta ĩrũre.

² Tũpa hejareiã henta ĩrũ Israel hai arykaivaĩ pyhỹrõ vekua. Pikuããra jyve kuatia mbyparahavape heiva rãĩmi Elías rehe? Marãramba hei arykai pya jyrova Tũpa hỹnonderã Israelva retare? Tũpape ñymboirã? Heirã vekua:

³ “Sheja, jukama reta ñimiñee'iare hareka opa mambai reta ñymbatyhaseaipi. Sheĩĩma apyta hareka pota shukajyre jyve”.

⁴ Tẽvã Tũpa heishu: “She pevarã yngai ãñono 7.000 kuimbaire, Baal hỹnonde ĩñesumba vekuare”.

⁵ Kyrãi jyve, ã'ẽpeve Tũpa myhemby vekuamire haire retaivi mbovyĩ pyta Tũpa pya kavikue rupii pyhỹrõvare.

⁶ Kova rãnga iko Tũpa pya kavi rupii. Ha'ẽã haire mbai japo kavirã. Kyrãrã Tũpa pya kavikue haiveãmapo pya kavi.

⁷ Hãmera, mbaivara? Israelitare vãhẽãshu reta haire hekava, tẽvã pyhỹrõãvare vãhẽshu hai, hareka ĩrũre Tũpa pya mytãntashi hai,

⁸ kuatia mbyparahavape heiva rãĩmi: “Tũpa meẽshu reta pente espiritu mbaimba ñanduva mbaimbaa ñandu verãre, ã'ẽ peve, hesare hesha jyvyã hareka japysare henduã”.

⁹ David hei jyve: “Vy'aseape tikoshi mbai mykatỹrõãvare hareka jypysa, oapy retarã, jaheahe verã!

¹⁰ Hesare opa tymbotyhashi hareka heshamba verã kũvãĩpi; kupe opa tijapashi reta opa ara pevarã”.

Ñymondo jepe Judiomba retape

¹¹ Ã'ẽ apyrãndu: Israelitare oa retarã, haipemaĩra pyta pũãmbape? Mba'ety! Ha'eã kyrãva, haikaviveva hai, Judiore ñee henduã retarã, haimbaa Judiovare Tũpa mondojepeshu, Israelitare ñyngareko jyre verã.

¹² Hãme, Judiore ñee hendumbaa veru ikokatukue opaite yvy ĩãrẽ pevarã hareka Judiore javyva rupii veru ikokatukue haimbaa Judio retape, ñañonoshu mbaivarapo verukui Judiore ñymbypy'aujymarã!

¹³ Tẽvã ĩme'are hai pee verã, pee Judiombare. Tũpa shymbou ĩñee ambeu ai verã pynymbytepe hareka ãmombai kova ajapova.

¹⁴ Aipota a'ãmore shyryhevare ñyngareko pyndyrehe, kyrãrã a'ãmo hipitypo ñymondojepeva.

¹⁵ Shara Tũpa Judiore mbijicheape, he'ise opaite yvy jerekue Tũpa ñymbeujyshuva, mbaivara he'isepo Judiore myvãheãjyshurã? He'iserapo haire ĩmerapore reta tykove, shara aryka'e manova rãĩmi jyre.

¹⁶ Shara tynonde muhũ'ũãva pãhã Tũpa me'ẽãshua ky'arã, ky'ã jyve muhũ'ũãva hembyva, hareka jypy ky'ãrã, hãkare ky'ã jyve.

¹⁷ Hokava olivoivi, hai Judiore, ã'ãmo hãkãre jasyjaha hareka minjehahe olivo ñanaipi'õ, nde hai hokava haimba Judiova. Hãme rãnga hapopeve rẽĩhe, tykove meẽshua olivo.

¹⁸ Tẽvã avypo rirojahe haikavive rẽĩshia Judiore opa mbijicheavare. Nymanduapohe ha'eã nde rijoko rĩñonova hapo, katynga ndoko niñonova hai hapo.

¹⁹ Katupo nde rere: “Ẽẽ, tẽvã yvyra hãkãre jasyjaha shimbihi'aha verã”.

²⁰ Haikavi, opa jasyjaha reta shara jyrojãã reta, hareka nde tanta rẽĩ jyrojakuepe. Hãrã avypo riroja ndijehekui; koñeĩ jyrykyje.

²¹ Shara Tũpa hejareiããshu yvyrahãkare, ha'eã jyve nde hejareii ndyhevi verã.

²² Maĩhe, Tũpa pyakavi tẽvã katu poshy jyve. Pya poshy hãndi opaite oa vekuare hareka pyakavi nendie. Tẽvã rikoã hai potava rãĩmirã, nde ndijasyjahapo jyve.

²³ Hãma Judiore oujy jyrojajyhe Tũparã, mbihi'ajypokui, shara Tũpa ĩmere mbaikatu hykuaĩ mbihiajy verã.

²⁴ Nde ndijypyivive hai nde olivo ñanaipi'õ, haivi ndijasyjaha hareka nimbihi'a olivo haikavivare hareka javai'ãĩtevemapo mbihi'aha Judio retare, arykaima hai peeva olivo haikaviva hãka.

Opaite Israelvare ohojepepo

²⁵ Shyryvyre, aipota pikuaa kavi ko mbai ñemiãpe'õ, mahẽ pyrojakui pyny ãrãndurã: A'ãmo israelvare pya mytãnta reta, tẽvã koñeĩpo opama ẽẽ papahava haimba Judiovare vãhẽ Cristo hendaperã.

²⁶ Hãma kova ikomarã, opaite israelvare ohojepepokui, kuatia mbyparahavape heiva rãĩmi: “Pyrỹmondojepe'ia oupokui Sionvi hareka opapo joheshikui mbai porãmba vekua Jacob ñymoñashi vekuare.

²⁷ Kova hai ñee me'ẽãva ajapo handiare, opama ahejareishi mbai porãmba vekuarã”.

²⁸ Hãma Ñee kaviva rehe, Tũpa japohe Judiore hai hyvaishorã rãĩmi; tẽvã Tũpa haihushu reta hãĩrã pyhyrõrã vekua ñytynondeva retape hai ryhevare japo verã.

²⁹ Shara me'ẽhãĩva Tũpa meẽva hekyjyvyã, hareka sareãhe hai pyhỹrõva.

³⁰ Shara ara hasavape, ñee pyhenduããshu Tũpa; tẽvã ã'ẽ israelitare ñee henduãã retarã, Tũpa pyndypareko.

³¹ Kyrãi jyve, ã'ẽ haire ñee hẽnduveã, tẽvã pe pyndyparekova rãĩmi Tũpa pareko jyveshu reta.

³² Shara Tũpa opa jokoshu reta ñeẽ hẽndumbape, opaiteva parekoshu verã.

³³ Tũpa iko katukue ojaiã, ãrãndukue hareka mbaikuaakue Tũpaivi ouva. Mba'ety katu mbeu kavi verã hai potava hareka kuaa verã hai japova.

³⁴ Shara, mbavara kuaa marãra Teja pya mbijeta? Mbavarapo mbarakuaashu?

³⁵ Mbavara tynonde meẽshu Tũpa, haivi Tũpa mbyhekoviashu verã?

³⁶ Shara opaite Tũpaivi ouva, hai rupii hareka hai pevarã. Hĩmbipekue opa ara Tũpa pevarã! Amén.