Romano 1 - NandevaBiblia

Ñymarãndu

¹ She Pablo, Cristo Jesús jokueva hẽnohava apostol, pyhỹrõhava mbeu verã Ñee Kaviva Tũpa ryheva,

² Hai ĩñee meẽmaĩmba hokava Ñee Kaviva Tũpa ĩñee mbeu'iare rupii Mbyparahavare kyambavapy.

³ Kova Ñee Kaviva hei ñande Jesucristo Tyray, ou ko yvy'ĩãrẽ kuareta rãĩmi, mburuvisha vasu David mimoñava rãĩmi,

⁴ tẽvã kuerajyrã, hareka Espiritu Santo ñymbaikatu rupii heshahakamba Jesucristo Ñandeja haiva Tũpa Tay.

⁵ Jesucristo rupii, Tũpa shiñono Apostolrã hareka kova hai mbai vasu she pevarã, hai heepe ambeu verã opaĩ tenta vasu retaipi roja verãre hareka Tũpa heiva japo verãre.

⁶ Hokava paũpe rãnga opama pee pinimĩjea jyve, hẽnoha Jesucristo ryhevarã.

⁷ Opaite Romape peĩva Tũpa haihuvare hareka hẽnohava iko pyndyhevi henta ĩrũre pyhyrõãva: Ñanderu Tũpa hareka Ñandeja Jesucristo tymaĩ kavi hareka tyheshaka pyavapy.

Pablo meẽ jy ajetekue

⁸ Tynondepo ameẽ Tũpape ajetekue pyndyrehe, Jesucristo rupii, shara oparupi mbe'uha jyrojakue pyrekoheva.

⁹ Tũpa rãnga, hai shypya ryheve aikohea ambeuva Ñee Kaviva Tayre'õ, hai shyresha shymanduañoĩ pyndyreherã,

¹⁰ hareka airure asyñoĩ Tũpape ñono she verã hai potamarã aha apohype verã.

¹¹ Shara aipota aha apyryresha tykovepy'õre me'ẽ verã mbai katukue Espiritu Santoivi ouva, hareka kyrãrãpo jyrojakue Tũpa pyrekoheva pyrãtave ohokui.

¹² Jaishu, pepenteĩ ñaĩmykyrẽy verã jyrojakue ñambeu ijuperã.

¹³ Shyryvyre, aipota pikuaa jyve hetajy potatẽ aha Romape apyryresha verã, tẽvã mba'etyãjy shochava. Shykyrẽypo aha haityrã aheshakui hykove jyrojavape ñymbyhetava, ẽẽmava rãĩmi Judiomba retaipi.

¹⁴ Ambeuñoĩpo ko Ñee Kaviva opavape, griego retape hareka haimba griegova retape, ñymboi pytambare hareka ñymboimba'iare.

¹⁵ Hãme rãnga shykyrẽ'yĩte aha ambeu jyvepe Ñee Kaviva Romapepeĩva.

Ñee Kaviva hai Tũpa ñymbaikatukue

¹⁶ Ãnotiã ãmbeu ko Ñee kaviva, shara hai Tũpa ñymbaikatukue mondojepeva opaite jyrojaheare, Judio reta rãni hareka jyve haimba Judiovare.

¹⁷ Ñee kaviva rãnga ñanymboihe Tũpa mbyheko kaviva Jesús jyrojahea. Mbyparahava heiva rãĩmi: “Heko kaviva Tũpa jyrojaherã rupiipo iko”.

Mbai porãmba kuaretare japova

¹⁸ Hãme vate araivi Tũpa heshakashu poshykue kuareta pyryparekombare hareka heko jyvachembare, hareka ñañarõvare añeteva jocharea.

¹⁹ Kova kuaretare opa kuaa Tũpa jaikuaashi verã, shara Tũpatei mbyheshaka reta.

²⁰ Tũpa opava japovare rupii heshaka katumba heshahaheva, ñymbaikatukue opamba ryheva hareka haiteiva hai Tũpa. Hãme rãnga mba'etyma hei verãre.

²¹ Shara ajemaĩ kuaatẽ reta Tũpa, tẽvã õmomba'ẽãshu reta Tũpa rãĩmi hareka jy ajetekueĩmba meẽshuare. Kyrãtẽ verã õñepyrõ pya mbijetahe reta ñee mbaimba vekua Tũpa rehe hareka pya mbaimba kuava tynyhẽ pyntukue.

²² Ajemaĩ hei ijehe reta ĩñarãnduva, tẽvã ou mbai'ãĩteve kuaajy reta,

²³ hareka ynga ñonojy reta Tũpa jyhaihu hendakuepe, õmombaitẽ verãre Tũpa ikova opa ara, haire õmombai tarã'ãnga kuimbai manova ryheva hã'anga; vyrare, mymba urũndy ipyreva hareka mymba pitiareĩ vatavare.

²⁴ Hãme rãnga Tũpa hejashu reta porãmba haire pyape ẽvã, pyape mbijetava raha hetepe mbai pyrỹmymarãkava.

²⁵ Haire myngovia Tũpa añeteva japureiiva retape; ohohe reta hareka õmombaijyre maĩnungare Tũpa japo vekua, Tũpa pyrapo vekuatẽ verã, haiñoĩ ẽẽshu opa arape õmomba'ea verã, Amén.

²⁶ Hãme rãnga, Tũpa hejashu reta haire potava pyrỹmymarãkavape, ñukuña retave ñateỹ iko hãndi kuimbaire, koñeĩ pota iko hãndi yngava taupere.

²⁷ Kyrãmi jyve kuimbaire, taupere kyrãrãte'i handi verã vekua, ha'ei retai opa haku ijehe, kuimbaire japo mbai pyrỹmymarãkava yngava kuimbaire handi, hareka kova mbai porãmba rupii veru, iko'asy reta ha'ire hetepe ñunupa japovare rupii hipityva.

²⁸ Mba'eveãma Tũpa pota kuashi retarã, Tũpa ma'ẽĩhe japo reta mbai porãmba pya mbijetahea japokashua.

²⁹ Hãme rãnga haire tynyhẽ mbai hekopemba'õ opaĩ marãrãngatu vekua, haire heko porãã, mbai potavereii jyre, porãmbavaĩ pya mbijetahe reta, pyryreshatãã, mbai potarai, puruka, ñyrãrõse, japu, katu ñono pỹrỹmbytavypy verã hareka ñee ryheva,

³⁰ ijeta porãhe yngare, heshatãã reta Tũpa, pya mbijetavape hei reta haire haikaviveva hareka kuareta retape heiñoĩjyre haire haikaviveva, nohẽñoĩ reta py'ahuva marãrapo japo reta mbai porãmba, hareka ñee henduãshu reta tuure.

³¹ Potãã pya mbijetarãni reta, katuã jyrojahahe, pyryraihuã, hareka pyryparekoã.

³² Ajemaĩ kuamateãre Tũpa heko jyvachekue mbeumateã, opaite kova japo'iare manoñoĩ potarã, ha'ẽã japopeveĩjyrea mbyhaikavi jyvyĩ reta kyrã japo hãndiare.