Mateo 9 - NandevaBiblia

Jesús mynguera pente kuimbai vatamba vekua

¹ Jesús jupi pente kanoaperã yy hyvaisho kyty hasarã, vãhẽ oho tenta Capernaumpe hai iko'i vekuape.

² Haipe veruashu hupa ryheve pente kuimbai vatambava; Jesús heshama ko kuaretare jyrojaherã, heishu kuimbai hasyva: “Yrẽĩ shyray, mbai porãmba rijapo vekua hejareiima ndyhevi”.

³ Haipe Moisés mbypara vekua pyrỹmboi'iheare hei ijupe reta: “Ko kuimbai rãnga ijeta porããhe Tũpa”.

⁴ Jesús kuaa mbaivara heijyre pyaperã, heishu reta: Marã'ĩrãra porã'ãĩte pypya pimbijeta?

⁵ Mbaivara javaĩã jaishu ko kuimbai: “Mbai porãmba rijapo vekua hejareiima ndyhevi”. Maĩrã jairaposhu: “Pũã hareka vata”.

⁶ Aheshakapo pee, kuareta Tay ĩmere mbaikatu hejareii pyndyhevi verã mbai porãmba pijapova ko yvy'ĩãrẽ. Haipe heishu kuimbai vatamba'ia: “Pũ'ã, mupuã ndurupa, ekuajy nyrẽntape.

⁷ Haipe kuimbai vatamba'ia pũã hareka ohojy hentape.

⁸ Kuaretare hesha kovarã kyje, hãrã õmombaishu Tũpa meẽshurã rehe mbaikatu kuaretare”.

Jesús hẽno Mateo

⁹ Jesús oho haivirã hesha pente kuimbai Mateo he'iashua, kyrypoti mbatyhasea Roma pevãrã hyvache vapy'õ. Hãrã heishu: “Ei, shimi'ĩrũ”. Mateo pũã hareka oho hãndi.

¹⁰ Mateo hentape Jesús hareka mboireare karu ñynoĩ verãpe, haipe jyveru jyve, kyrypoti mbatyse'iare Roma pevarã, hareka heta mbai porãmba japo'iare.

¹¹ Fariseore hokava hesharã pyrãndushu Jesús mboireare: Marã'ĩrãra pynymboi'ia vapy karu hãndi kyrypoti mbatyse'iare Roma pevarã, hareka mbai porãmba japo'iare?

¹² Jesús hendu fariseore heivarã heishu: Mambaimba'ia ikotẽvẽãhe pyrỹpỹhãno'iare; koñeĩ ñymbairasy'ivaĩ.

¹³ Pekua pikuaa mbaivara he'ise Tũpa ĩñeepe heirã vekua: “She rãnga aipota pypareko papishare hareka ha'eã mymba jukahavare”. She aĩã ãhẽno heko kavivape, koñeĩ heko porãmba'iare opa heja verã mbai porãmba japo vekua.

Pyrãnduashu Jesús karuamba ryheva

¹⁴ Haipe Juan Bautista mboireare ou Jesús ẽvãpe, hãrã pyrãndushu: “Ore hareka fariseore karumbape ikoha, marã'ĩrãra rỹmboiryreare japoã hai reta?”

¹⁵ Jesús heishu reta: Pimoãrapo omendaha'õpe ĩme'õre vy'ãã ñynoĩ, temerã ẽẽteri hãndi retarã? Tẽvã, vãhẽpokui ara ẽẽveama ñynoĩ hãndi verã; haiperãmapo karumbape ñynoĩkui.

¹⁶ Mba'etypo mondeava pysevẽ py'ahuva mbyvyvyhe verã mondeava ndeshivare; shara johearã mantapo py'ahuva mondeava ndeshiva, hãrã tivishavepo myndoro.

¹⁷ Hãrã vino py'ahuva mbyhyruhãpo vakapi ndeshivapy; kyrã japoarã vakapi sororã vino opapo jyvare ijehe; hãrã vino py'ahuva mbyhyruañoĩpo vakapi py'ahuvapy, hãmerãpo mokuevea kỹỹ nantuhapy.

Jairo tajy hareka taupe Jesús mondeva pokohe vekua

¹⁸ Jesús ijetateri'ẽshuva kuaretare vãhe ou pente Judiore juhuvisha, ĩñesu hỹnonderã heishu: “Shyrajy rãnga kurite mano, tẽvã reho ndepo rĩñono'ĩãrẽrã, kuerajypo”.

¹⁹ Jesús pũãrã ohohipi hareka mboireare hãndi.

²⁰ Hãrã kuaretare mbytepe'ẽ pente taupe hasyva tuvyvasuivi, hareka japoma 12 ãño, ñymboja Jesús haykueivi mondeva pokohe verã.

²¹ Shara pyapeĩmba hei: “Mondevarẽĩ apokorã akueramapokui”.

²² Jesús jerepy, hesha tauperã heishu: “Ỹrẽĩ shyrajy, shara rirojarãmeĩ rykuera”. Haipevãĩ ko taupe kuera.

²³ Vãhẽma Jesús mburuvisha hentaperã, hesha ñimimby'õre, hareka heta jaheo ñynoĩva.

²⁴ Hãrã heishu reta: “Opa pẽhẽ koivi! Ko kuñataĩray manoã, ocheĩ'ẽ”. Hãrã haipe kuaretare õñepyrõ joje jyre.

²⁵ Tẽvã opama mohẽhã hetava katuaperã, Jesús iche kuñataĩ ẽvãperã pysy ipope, haipe kuñataĩray pũã.

²⁶ Hãrã opaite hokava tentaipi kuaaha kova, Jesús japova.

Jesús mynguera mokue heshamba kũvãĩpiare

²⁷ Jesús õhẽjy haivirã, haykueivi ou mokue kuareta heshamba kũvãĩpiare, sapuke jyveru: Yryparekomĩnteve David tay!

²⁸ Jesús ichema o'iperã, vãhẽ jyveru mokue kuareta heshamba kũvãĩpia, haivi Jesús pyrãndushu reta: Pyrojara she apyrỹmynguera verã? Haire hei: Yreja, rojaha rãnga.

²⁹ Jesús hesare pokorã heishu: Tiko pee pyrojava rãĩmi.

³⁰ Hãma hesare opa kueraherã hesha kavijy reta. Jesús hei kavijyshu: Avy mbava pymbeushukui kova ikova.

³¹ Tẽvã haire haivi õhẽĩ opa mbeushu kuaretare hoka yvy ẽvãipi mbaivara Jesús japohe reta.

Jesús, pente ña'ẽnguva mbijetajy

³² Haire õhẽjymarã, ĩme'ẽ kuaretare veruva Jesús ẽvãpe, pente kuimbai ña'ẽnguva mbaiposhy ĩmere vekua.

³³ Jesús mohẽshi mbaiposhyrã, ña'ẽngu'ia õñepỹrõ ijetajy, hãrã kuaretare haĩrã hesha retarã heijyre: “Mapeã kyrãva mbai heshaha Israelpe”.

³⁴ Tẽvã fariseore hei: “Ko kuimbai mbaiposhy juhuvisha ñymbaikatu rupii rãnga mohẽ mbaiposhyre”.

Jesús pareko opava retape

³⁵ Jesús vata opaite tentamire'õĩpi, hareka tenta vasu retaipi pyrỹmboihe Ñee kaviva Judiore ñymbatyseape mbeu Mburuvisha vasurã vate araivi ouva ryheva, hareka mynguera ñymbairasyvare.

³⁶ Jesús maĩhe kuareta retarã, parekoshu reta, shara haire kangyrã opa ipy reta, avishare ijamba rãĩmi jyre.

³⁷ Haipe Jesús heishu mboireare: “Ãñete ñotyãvare hetate'õ, tẽvã mynõõ'ia reta mbovyĩ jyre.

³⁸ Hãrã pirureshu koo ija hareka tymboushu kuaretare mba'apo verãre”.