Mateo 7 - NandevaBiblia

Avy ijeta porããhe ndapisha

¹ Avy pimbijiche papisha, hãrã Tũpa pinimbijicheãpo jyve.

² Papisha mbai porãmba pijapoheva rãĩmipo; Tũpa japo jyve pyndyrehekui.

³ Marã'ĩrãra rỹmaĩrihe yvyraku'i ndyryvy hesape'õ, yvyra marẽyva ndyresape'õra ryheshããjy?

⁴ Marãrapo rereshu ndyryvy: “Taheky ndyhevi yvyra ku'i ndyresape'õ”, ndeave ryrekova yvyra marẽyva ndyresape?

⁵ Hova mokue'ia! Hekyrãni yvyra marẽyva ndyresape'õ ryheshakavi verã, hãrãpo ryhekyshi yvyra ku'i ndyryvy hesape'õ.

⁶ Avy pymeẽshu ñaũmba mbai kyambaa, mahẽ jere pykotyrã opa pususukui, avy pymomboshu mãĩnũnga hepyva kushire hỹnonde, mahẽ opareii pyrõhekui.

Pirure, pyheka, hareka punũpa õche

⁷ Pirure, hareka Tũpa meẽpo pee; pyhekava hareka hai heshakapo pee; pyhẽnoshu hõchepe, hãrã hai peapopekui.

⁸ Jurureva rãnga me'ẽãposhu, hekava vãhẽposhu; hareka õche nũpava pe'aposhu.

⁹ Mbara peeva, tay jurureshu pãhãra, meẽposhu ita pysẽvẽ?

¹⁰ Pira jurureshurãra, meẽposhu mboi?

¹¹ Pee piniñarõva, mbai haikavivaĩ pymeẽshu pyndyrayre, ñopyĩara hai Peru vate arapy'õ, mbai haikavivapo meẽshu jurureshuare.

¹² Hãrã pijapo kavi jyvehe papishare, yngavare pipota japo kavi pyndyreherã. Kyrã hei ñande Moisés mbypara vekua hareka Tũpa ĩñee mbeu'iare jykuatiape.

Õche mishĩĩva

¹³ Piche õche mishĩĩvaipi pyryrahava Tũpa huvisharã'õpe. Shara tivisha hai õche hareka pe pyryrahava Ãña ẽvãpe, javaiã javatahupi, hãrã heta'ẽjy icheva hokava õcheipi.

¹⁴ Tẽvã õche hareka pe ohova tykove kyty mishĩĩ hai, javai javatahupi. Hãrã mbovyĩ'ẽ vãhẽshuva.

Yvyra iareĩ kuaaha marãvara

¹⁵ Pingareko pindijeheshi Tũpa ĩñee mbeu rã'ãnga'iare. Avisha rãĩmi jyverupe peĩvape, tẽvã pyape avaravasu ñarõ vekua rãĩmi.

¹⁶ Hãrã japova reheĩpo pikuashu retakui: “Po'ohãã uva ñanaivi, hareka igo kapiãtivi”.

¹⁷ Kyrã opaiteva yvyra haikaviva ia kavi, tẽvã yvyra porãmbava ia porãã jyve.

¹⁸ Katuãpo yvyra haikaviva ia porãã, hareka yvyra porãmbava katuããpo ia kavi.

¹⁹ Hãrã opaiteva yvyra ia porãmbava, jasyjaha hareka momboha tatape.

²⁰ Kyrãpo Tũpa ĩñee mbeu'iare japuva, japo vekua reheĩpo pikuaa kavi jyve.

Opaãpo ichekui Tũpa huvisha vasurã ẽvãpe

²¹ Ha'ẽã opaiteva heisheva: “Sheja, Sheja”, iche verã vate arapy huvisha vasurã ẽvãpe, koñeĩ Sheru vate arapy'õ potava japovãĩpo ichekui.

²² Hokava ara vãhẽmarã, hetapo'ẽ heisheva: “Sheja, Sheja, ndyreepe rãnga ore ñimiñe'ẽhate'i jyve, ndyreepe mohẽha'i mbaiposhyre, ndyreepe heta japoha mbaikavi heshaha verã”.

²³ Tẽvã she haiposhu reta: “Mapeã rãnga apyrykuaa. Pysyry shyhevi, pee mbai porãmba japo'iare!”

Mokue kuimbai hoorã mupuã vekuare

²⁴ Hãrã ĩme'ẽ henduva shiñee hareka hekope kavi japova, ova pente kuimbai ñy'ãrãnduva, hoorã mupuãva ita ĩãrẽ.

²⁵ Haivi ou haivirã, ysyry jitivisha, yvytu ñakua pejurã oho'ẽhe oo, tẽvã o'ãã, shara ita vasu jypyrã'ẽshurã.

²⁶ Hãrã opaite henduva ko shiñee, tẽvã japoãrã, ova ko kuimbai mbaimba kuava hoorã mupuã vekua yvyku'i ĩãrẽ.

²⁷ Hãma ou haivirã, ysyryva jitivisha, yvytu ñakua pejurã oho'ẽhe oo, haipe oarã opa ñymambaishi.

²⁸ Jesús kova mbai heirã, kuaretare mbyry maĩhe reta pyrỹmboiheva,

²⁹ shara Jesús pyrỹmboi ñymbaikatu'ia rãĩmi ryheve, ha'ẽãmba Moisés mbypara vekua pyrỹmboi'iheare rãĩmi.