Mateo 6 - NandevaBiblia

Jesús pyrỹmboihe marãrapo mboryha ikotẽvẽvare

¹ Avy pijapo mbaikavi kuaretare hỹnonde, pijeshakashu verã retaĩ. Kyrã pijaporã Peru vate arapy'õ, maĩnungapeãpo mbyhekoviape.

² Hãrã rymbory ikotẽvẽvarã, avy mbeu'i oparupi. Japosea rãĩmi hova mokue'iare Judiore ñymbatyseape hareka vataha'õ retaipi; haire kyrã japo ijetaha kavihe verãre. She haima pee kyrã haire opama mbyhekoviashu reta.

³ Hãma ĩme'ẽ peeva pavete'iare mboryshuva, avy mbavape tymbeu.

⁴ Ñemiãpẽipo rijapo hareka Nderu opa hesha ñemiãpeĩ rijapova, haipo mbyhekoviandekui.

Jesús pỹrỹmboi marãrapo jairureshu

⁵ Hãma pirurerã, avy pirure hova mokue'iare rãĩmi, hai reta rãnga haikavishu ñymboyvape jurure Judiore ñymbatyseape hareka vataha'õ retaipi ijeshakashu verã kuaretare. Ãñeteĩte hai pee, kyrã haire opama myngoviahashu reta.

⁶ Nde rirure potarã, iche ndero'ipe, mboty nyrõche, hãma jurureshu Nderu neĩĩ rẽĩvape. Kyrã Nderu hesha ko neĩĩ rijapovarã, hetavare hỹnondepo opa mbyhekoviajyndekui.

⁷ Pirurerã avy pukureii pijeta, Tũpare jyrojamba japosea rãĩmi. Mõate heta ijetarã Tũpa hẽnduveposhu reta.

⁸ Avypo haire rãĩmipi, shara Peru ndei pirurerãvãĩ opa kuaa mbaivara mba'etype.

⁹ Tẽvã pee kyrãpo pirure: Yreru vate arapy rĩmerẽĩva, avy tymyngy'aha ndyree.

¹⁰ Tou ỹrẽãrẽ mburuvisha vasurãrẽĩvavive vateivi ouva. Tijapoha nde ripotava ko yvy'ĩãrẽ, vate arapeva rãĩmi.

¹¹ Meẽ ore ho'ua verã ko ara pevãrã.

¹² Hejareii yryhevi mbai porãmba vekua, ore hejareiishia rãĩmi japo porãmba'i yryreheare.

¹³ Avy ma'ẽĩhe to'aha jepyarããpe, koñeĩ porãmbaivi yryrekyshi. Shara na'ãpova hai mburuvisha vasurãrẽĩvape, mbaikatukue hareka himbipekue, opa ara pevarã. Amén.

¹⁴ Pee pyhejareiishi mbai porãmba japo pyndyrehevarã, Peru vate arapy'õ hejareiipo jyve pyndyhevi mbai porãmba pijapo vekua,

¹⁵ tẽvã pyhejareĩãshu mbai porãmba japo pyndyrehevarã, kyrã jyve Peru vate arapy'õ hejareiiãpo jyve pyndyhevi mbai porãmba pijapo vekua.

Jesús pyrỹmboihe karumba ryheva

¹⁶ Hãrã pykarumbapepeĩrã, avy pyvy'ããpi hova mokue'iare rãĩmi; kyrã haire japo kuaretare heshahe verãre karuã ñynõĩrã. Ãñete hai pee, myngoviahamashu haire.

¹⁷ Mbaimba reuvape rẽĩrã, jyvahe hareka ijakatu,

¹⁸ hãrãpo kuaretare kuãã rykarumbape rẽĩrã. Koñẽĩ Nderu vate arapy'õ heshapo ñemiãpẽi rijapova; hãrã myngoviapo nde hetavare hỹnonde.

Mãĩnunga hetava vate arapy'õ

¹⁹ Avy pymbaty maĩnunga hetava yvy'ĩãrẽ, kupii opa houvaipi, maĩnungakuere opa tujavape, hareka mãnãrõ'iare icheseaipi opa ñomi verã.

²⁰ Pymbatyĩ heta maĩnunga vate arapy, kupii ẽẽmbape, maĩnunga ñymbaimbape, hareka mãnarõ'iare ichembaa manarõpe verãpe.

²¹ Shara maĩnunga heta ryrevape, haipepo ẽẽjyve ndypya.

Ñandyretepy sapeva

²² Tyresa reta rãnga hai tyretepy sapeva, hãrã ndyresare haikavirã, sape kavipo ndyretepe.

²³ Tẽvã ndyresa porããrã, ndyretepy opapo pỹntu, hãma ndyretepy sapeva opa pỹntu ndyhevirã, pỹntuĩtevepopy.

Penteĩpojare Ñandeja

²⁴ Mbavẽãpo ijokuekashu mõkue ija pyrokue'ia. Mỹmorããpo penteva, tẽvã ĩrũpo haihuve; maĩrã japoveposhu penteva heishuva, tẽvã ĩrũpo mymorãã. Hãrã katuããpo Tũpa jairojatẽheva, jahaihujy kyrypoti.

Tũpa ñyngarekohe tayre

²⁵ Hãrã she hai pee: Avy pejepy'apyhe peu verãre, hareka pymonde verãre. Ha'eãra hai mbai vasuveva ñandykove timbiuvi hareka ñandyrete mondeavaivi?

²⁶ Pymãihe vyrare haire ñimityãã hai, myno'õavaĩjy hareka mbatyã ñonokavi. Tẽvã Peru vate'õ hareka arapy'õ myngarushu reta, pee rãnga mbai vasuveshi hai reta.

²⁷ Mbavara ojepy'apyve'irã, iko pukuvepota?

²⁸ Marã'ĩrãra pejepy'apy pymonde verãre? Pymaihe yvoty ñuhupi'õre mãrãra heñorã vate oho, mba'apombaa ñymonde verã.

²⁹ She haipe mburuvisha Salomon opaite hĩmbipe ryheve, ñimimonde hai mashyãvape yvoty rãĩmi.

³⁰ Tũpa kyrãĩ mimonde ñana ñuupe puãva, parejyra hapyha tatape, tẽvã japoãrapo jyve pyndyrehe, pee kuareta sa'i jyrojava!

³¹ Hãmeara avy pejepy'apy pypyrãndupi pijupe: Mbaivara jaupo? Mbaivara ñambusururutẽpo? Mbaivara ñamõndetẽpo?

³² Opaitea kovare ojepy'apy Tũpa rojambare, tẽvã pyreko pente Peru vate'õ, opa kuaava mbaivara pikotẽvẽ.

³³ Haikaviveva rãnga pyheka tynonde Tũpa huvisharã'õpe'õ ryheva hareka hekope kavi'õ. Tũpa meẽpope opaite jy'arape mba'etypeva.

³⁴ Avy pejepy'apy paree verãre, shara paree verã rekojy yngaa jepy'apy. Opaiteva arare, reko heta jepy'apy.